Naalakkersuisut qarasaasiatigut saassussisoqarnera qisuariarfigaat
Kalaallit nittartagaat arlallit tallimanngornermi DDoS-imik taaneqartartumik saassunneqarput. Naalakkersuisut pisoq malinnaaffigigaat, piffissamilu sivikitsumi nittartakkat iserfigineqarsinnaannginnerannik kinguneqarsinnaasut, taamaattorli saassussinerit paasissutissanut ajoqusiiunnanngitsutut nalilerpaat.
Oqartussaasut pisimasoq misissorpaat.
Assi: Anne Bæk / Ritzau Scanpix
Kalaallit nittartagaat DDoS-imik maanna saassunneqartarput. Digitalinngortitsinermut Aqutsisoqarfiup aamma Inuiaqatigiinni Isumannaallisaanermut Aqutsisoqarfik taama ilisimatitsivoq.
Saassussinerit paasissutissanut ulorianartuunngitsutut nalilerneqarput, nittartakkallu piffissami sivikitsumi iserfigineqarsinnaajunnaartartut, naalakkersuisoq Peter Borg (D) tusagassiuutitigut nalunaarummi oqarpoq.
Naalakkersuisut pisoq malinnaaffigeqqissaaraat oqartussaasullu misissuiffigigaat oqarpoq:
DDoS-imik saassussineq
DDoS-imik saassussineq qarasaasiakkut saassussineruvoq, assersuutigalugu nittartagaq piaaraluni artukkerneqartarluni taamaalillunilu iserfigineqarsinnaajunnaanngikkuni ajorsisarluni.
Tusarfik: Inuiaqatigiinni Isumannaallisaanermut Aqutsisoqarfik
- Pisut malinnaaffigeqqissaarpagut, aammalu oqartussaasut attuumassutillit pisumut misissuileruttorput ingerlaavartumillu attaveqarfigaagut.
- Saassussinerit taamaattut uloriananngimmata erseqqissassallugu pingaaruteqarpoq. Pisumut ingerlaavartumik paasissutissiisassaagut, aalisarnermut, piniarnermut, nunalerinermut, imminullu pilersornermut avatangiisinullu naalakkersuisoq Peter Borg oqarpoq.
Pisortat nittartagaani saassunneqartut ilagaat Kommuneqarfik Sermersuup nittartagaa, taanna tallimanngornermi ullaap tungaani ajornartorsiuteqarpoq.
Kommunimit Sermitsiamut ajornartorsiut pillugu itinerusumik ima paasissutissiisoqarpoq:
- Kommuneqarfik Sermersuumit kommunip teknikkikkut ingerlatsinera ullaap tungaani akornuserneqarsimasoq uppernarsarneqarsinnaavoq. Kommunimi IT-mut immikkoortortaqarfimmit ingerlatsisut suleqataasut peqatigalugit nalinginnaasumik ingerlanerup piaarnerpaamik pilerseqqinneqarnissaa sulissutigineqartoq ilisimatitsissutigineqarpoq.
Kommuneqarfik Sermersooq pisoq pillugu maanna oqaaseqaqqissinnaanngilaq.
