Naalakkersuisut Siulittaasuat: Siunissarput akuleruffigineqassanngilaq

USA-p præsidentiata, Donald Trumpip, Kalaallit Nunaata USA-mit aqunneqarnissaa suli kissaatigalugu ippassaq oqaatigaa.

Naalakkersuisut Siulittaasuat, Jens Frederik Nielsen (D), tamatumunnga maanna qisuariarpoq.

- Allatut ajornartumik uteqqittariaqarpara: Kalaallit Nunaat tuniniagaanngilaq. Killeqarfiit, Nunat Tamat akornanni inatsisit uagullu namminiussuseqarnerput ataqqineqassaaq, Naalakkersuisut Siulittaasuat Naalakkersuisut nittartagaatigut allappoq. Nangipporlu:

- Kalaallit Nunaata siunissaa uagutsinniit aalajangigassaavoq tamannalu allat akuleruffigissanngilaat. Tamanna Nunatsinnik tiguaarusunnermik aqutserusunnermillu oqaaseqaqattaarnerup allanngortinnavianngilaa.

Nunanut allanut Naalakkersuisoq, Múte B. Egede (IA), Donald Trumpip kissaataanut ippassaq aamma akerliliilluni Facebookkikkut qisuariaateqarpoq.

Nato-p Ankarami ataatsimeersuarnera "ajunngitsoq", Løkke oqarpoq, Trump Kalaallit Nunaat Spanialu pillugit sakkortuumik oqaaseqaraluartoq taama oqarpoq.

Nato-mi ataatsimeersuarneq "ajunngitsumik" ingerlasoq, Nato-lu "aatsaat taama nukittutigisoq" isumaqatigiissutigineqarsimalluni.

Nunanut allanut ministeri Lars Løkke Rasmussen (M) Nato-p Ankarami ataatsimeersuarnerani oqarpoq.

Kalaallit Nunaallu pillugit illersornissamut aningaasartuutit Trumpimiit isorineqaraluartut taama pimoorunneqartisariaqanngitsutut pivaa.

- Eisenhowerilli nalaani USA-p præsidentiisa USA-p Europallu illersornissamut aningaasartuutaasa assigiinngissuteqarnerat tikkuarneqartarpoq.

- Trumpip nalinginnaanngitsumik periaaseqarnerata Ukrainemilu sorsunnerup kingunerisaanik pissutsit allanngorsimapput, Lars Løkke Rasmussen oqarpoq.

Isumaqarpoq ataatsimeersuarnermi angusat eqqarsaatigalugit "nilliaatigineqartut" sammineqarpallaartariaqannginnerarpai.

- Ataatsimiinnermi oqaatigineqartut allaapput. USA-p nassuerutigaa Europap akisussaaffik annertunerusumik tigusariaqaraa, Lars Løkke Rasmussen oqarpoq.

Danmarkip, Kalaallit Nunaata USA-llu suleqatigiissitaasa sulissutigisinnaasaat Kalaallit Nunaat pillugu akerleriissutip aaqqinnissaanut iluaqutaasinnaasoq aamma isumaqarpoq.

- Præsidentip Kalaallit Nunaat pillugu oqaasii maluginiarluarsimavakka. Nalunngeriikkatsinnik uppernarsaataapput, tassa Trumpip suut tamaasa aalajangersinnaasuuppagut Kalaallit Nunaat Amerikap aqagu pigilissagaluarpaa.

- Kalaallit Nunaanni amerikamut ilanngukkusunngilaq. Isumaqatigiippugut suleqatigiissitap USA-p sillimaniarnermi soqutigisai naapertuilluartut aaqqiissutissarsiumaarai. Tamanna piviusunngorsinnaanera upperilluinnarparput, Lars Løkke Rasmussen oqarpoq.

Ritzau/

Trumpip aqutsinissamik piumasaqaqqinnerata kingorna Natop generalsekretæriata Mark Ruttep Kalaallit Nunaat pillugu aaqqiagiinngitsoqarnera annikillisinniarsaraa.

Kalaallit Nunaat pillugu "pitsaasumik suliniuteqartoqarpoq".

Natop generalsekretæria Mark Rutte Ankarami Natop ullumi ataatsimeersuarnissaanut isilerluni taama oqarpoq.

Ritzau taama allappoq.

USA-p præsidentiata Donald Trumpip Ankarami Kalaallit Nunaata tigunissaanik kissaateqarnini marlunngornermi uteqqereeraalu taanna qisuariarpoq.

Trump Kalaallit Nunaata pigilernissaanik anguniagaqarnani Issittumi isumannaallisaanerup nukittorsarneqarnissaanik suliaqarnerulernissaanut Davosimi World Economic Forumimi upernaaq ataatsimiinnerani Ruttep isumaqatigiinniaqatugalugu akuersitippaa.

Tyrkialli præsidentianik Erdoganimik, Nato-p Ankarami ataatsimeersuarnerani qaaqqusisumik, ataatsimeeqateqareerluni, Trumpip piumasaqarnini marlunngornermi oqaatigeqqimmagu, akerleriinneq aallarteqqippoq.

- Kalaallit Nunaat USA-mit aqunneqartariaqarpoq,, Danmarkimiunngitsoq, Trump marlunngornermi oqarpoq.

Aammattaaq ukioq oqaatigeriikkani uteqqillugu Danmark isornartorsiorpaa Kalaallit Nunaannut illersornissamut iliuuserisai naammannginnerarlugit.

- Kalaallit Nunaata Danmark ikiunngilaa. Danmarkip Kalaallit Nunaat ikiornissaanut aningaasat naammanngitsut atortarpai, tamannali USA-mut pingaaruteqarpoq, Trump oqarpoq.

USA-p præsidentiata, Donald Trumpip, Kalaallit Nunaata USA-mit aqunneqarnissaa suli kissaatigaa. Tamanna præsidentip nunat killiit illersoqatigiiffiata, NATO-p, ataatsimiinnerani marlunngornermi oqaartigaa.

Nunanut allanut Naalakkersuisoq, Múte B. Egede (IA), Facebookkikkut tamatumunnga qisuariaateqarpoq.

- Ullumi USA-p præsidentia Nunarput pillugu oqariartuuteqaqqippoq. Oqaaseqarnerani aammaarluni erserpoq nunatta aqunneqarnissaanik suli kissaateqartoq. Tatineqarnerpullu suli piviusuusoq, pissutsillu suli ilungersunartutut isigisariaqarivut, Naalakkersuisoq allappoq.

Taassuma ataatsimoornissaq suleqatigiinnissarlu oqariartuutaannut ilaapput.

- Killiffipput eqqissisimasumik, ataatsimoorluta aalajangersimasumillu tunngaveqarluta suli inissisimaffigissavagut. Nunatsinni ataatsimoortariaqarpugut, iligut suleqatigullu aamma qanimut suleqatigalugit. Peqatigisaanillu oqaloqatigiinneq ataqqeqatigiinnerlu tunngavigalugit aaqqiissutissanik nassaarnissarput aalajangiusimassavarput, taanna allappoq.

Kalaallit Nunaata siunissaa sumi aamma kikkunnit aalajangerneqassanersoq naalakkersuisup pisarnini malillugu naqissuseqqippaa.

- Siunissarput uatsinnit nunatsinni aalajangerneqassaaq. Taamaattuarsimavoq. Taamaattuassaarlu, Múte B. Egede allappoq.

Nunanik allanik suleqateqarnermik annertusaaneq piginneqataanermut assersuunneqarsinnaanngilaq, Naleqqami politikkeri Jens NapãtôK´ oqarpoq.

Taassuma USA-p Kalaallit Nunaannut immikkut aallartitaata, Jeff Landryp, oqaaseqaatai qisuariarfigai.

USA-p Kalaallit Nunaat “pigilernissaanut” periarfissaqarluartoq, aamma præsident Donald Trumpip nammineq siunnersuutini suli puiorsimanngikkaa, tassa USA-p Kalaallit Nunaannik tiguaanissaa, Landry apersorneqarnermini kingullertigut oqaatigaa.

Jens NapãtôK’ naapertorlugu nunat tamalaat akornanni suleqatigiinnerulernissamut tunngatillugu Kalaallit Nunaat ammagaluartoq, Kalaallit Nunaat pillugu Washingtonimiit Københavnimiilluunniit aalajangiisoqartassanngilaq.

- Amerikamiuunissarput kissaatiginngilarput, soorlu aamma qallunaajunissarput kissaatiginngikkipput. Kalaaliunissarput kissaatigaarput, aammalu nunarput nammineq kinaassusilik, nammineq oqaasilik aammalu nammineq aalajangiisinnaatitaasoq ineriartortikkusupparput, politikeri tusagassiuutinut nalunaarummi allappoq, tassanili Danmarkimut attaveqarnertik erseqqissarlugu:

- Ilutigisaanik Qallunaat nunaanni ukiuni amerlasuuni oqaluttuarisaanikkut, kulturikkut ilaqutariinnillu attaveqatigiinnikkut attuumassuteqarnerput isiginngitsuusaaginnarneqarsinnaanngilaq. Taakku ataqqineqarlutik naligiissumik suleqatigiinnikkut ineriartortinneqartariaqartut isumaqarfigaakka.

USA-p nunanut allanut ministeriata Marco Rubiop pingasunngornermi tusarniaanermi Kalaallit Nunaat pillugu oqaaseqaaterpassui pillugit, Nunanut allanut naalakkersuisoq IA-milu siulittaasoq Múte B. Egede (IA) Facebookikkut qisuariarpoq.

Rubio ilaatigut aperineqarpoq Donald Trumpip Kalaallit Nunaat pillugu oqaaserisai qanoq isumaqarfiginerai, tassanilu Rubiop præsidentip oqaasia nuna nammineq pigalugu illersoruminarnerusoq isumaqatigalugu oqarpoq.

Múte B. Egedep Facebookimi allakkamini erseqqissaqqippaa Kalaallit Nunaat nammineersinnaassuseqarnermut pisinnaatitaaffeqartoq:

– Nunatta siunissaa, uatsinnit nunatsinni aalajangerneqassaaq. Qaqugumulluunniit tamanna allanngornavianngilaq aamma USA-miit oqariartuutit qanorluunniit ikkaluarpata, Múte B. Egede allappoq.

Nangilluni oqarpoq USA-mik oqaloqateqarneq ingerlalluartoq:

– Maanna USA-p, Danmarkip nunattalu akornanni oqaloqatigiinnerit ingerlappavut - uani aamma illersornissaq sillimaniarnerlu pillugit. Torersumik ataqqeqatigiissumillu tamanna ingerlanneqarpoq, iligiit akunnerminni pissuserisassaat atorneqarluni. Sulineq tamanna attanneqarli, Múte B. Egede allappoq.

Marco Rubio tusarniaanermi pingasunngornermi ingerlanneqartumi isumaqatigiinniarnerit pillugit aamma oqaaseqarpoq, oqarluni maannakkut qaammatit tamaasa isumaqatigiinniartoqartartoq nutaarsiassallu nuannersut ilimasuutigineqarsinnaasut: - Isumaqarpunga piffissap ilaani tamanna pillugu nuannersunik nutaarsiassiiumaartugut, Robio oqarpoq.

- USA-p, ukioq manna inuiattut ullorsiornermi ukiuni 250-inngortorsiortup, Kalaallit Nunaat pisiarerusummagu tupinnaqaaq. Nunaavugut tamat oqartussaaqataanerannik tunngavilik namminiilivinnermik kissaateqartoq, Aqqalukkuluk Fontain sinniisoqarfiup eqqaani oqalugiarnermini oqarpoq.

Inuit 500-t missaanniittut akerliussutsimik takutitsinermi peqataapput. Kalaallit Nunaanni Politiit akerliussutsimik takutitsisut ingerlaarneranni akornuserneqannginniassammata aqquserngit assersorsimavaat.

- Tusaanialaartigu – tuniniagaanngilagut sakkutooqarnikkullu atortussiaanata. Inuiaqatigiiuvugut angerlarsimaffigisatsinniittut. USA-mit sioorasaarinerit akuersaassanngilagut. USA nammineersinnaassuseqarnermik namminerlu aalajangiisinnaatitaanermik upperisaqaruni paasissavaatigut. Kalaallit Nunaat uppippat nunat allat tamarmik uppissinnaapput. “No means no”, Aqqalukkuluk Fontain oqarpoq.

Taava akerliussutsimik takutitsisut "Kalaallit Nunaat, kalaallit pigaat!" suaartalerput. Akerliussutsimik takutitsineq nalunaaqutaq tallimat missaani naammassivoq.

“Kalaallit Nunaat!” akerliussutsimik takutitsisut ilaat Nuummi siniisoqarfimmut ingerlaaqatigiinnermi suaarpoq.

Inuit hunnorujulikkaat sisamanngormat akerliussutsimik takutitsinermi peqataapput, taakkua ilaasa Erfalasorput tigummivaat. Allagartarsuit Donald Trumpip Jeffrey Epsteinillu assigannik assitallit aamma allagartaq “USA ASU”-mik allannillit tigummiarneqarput.

Akerliussutsimik takutitsisut USA-p sinniisoqarfiannut apuukkamik illu tunullugu minutsinilu marlunni nipangersimallutik USA-mik naammaginninnginnertik takutippaat.

Kalaallit Nunaanni Politiit akerliussutsimik takutitsinermi nakkutilliisut amerlapput, taakkulu 500-t missaanniittut peqataasut nalilerpaat.

USA-mut akerliussutsimik takutitsinissaq nal. 16.30 aallartissaaq. Akerliussutsimilli takutitsinissaq sioqqullugu ammaanersiornermut peqataasut ingerlakaapput.

Akerliussutsimik takutitsinissaq Facebookimi pisussatut saqqummiunneqarmat innuttaasut 300-t sinneqartut soqutiginnillutik nalunaarsimapput.

Nalunaaqutaq sisamanut qiteqquttoq peqataasut 50-it missaannaaniilersimasut Sermitsiamiit tusagassiortoq malinaasoq paasissutissiivoq. Taamaalilluni Nuuummi sinniisoqarfiup sisamanngornermi ammaanersiorneqarnerani peqataasut 70-it missaanniittut ingerlaannaq ingerlaqqissimapput.

Politikerit inuussutissarsiornermilu siuttut ilaat malunnartitsinermi peqataasut ilagaat.

Peqataasut ilagaat borgmesteri Malene Vahl Rasmussen.

Taanna sinniisoqarfimmi sivikitsumik peqataavoq, kommunillu innuttaasui sinnerlugit aallartitamut Ken Howerymut akerliunermut allagaq tunniullugu.

Malene Vahl Rasmussenip iligisap iliusai nuanninngitsut, innuttaasullu nunamik USA-miit tiguagaasinnaanera suli ernummatigigaat TV2-mut oqaatigaa.

Aallartitap Kenneth Howeryp qaaqqusat 120-t missaanniittut nalunaaqutaq pingasunut tikilluaqquai.

Sinniisoq Susan Wilson Inatsisartunilu ilaasortat immikkut tikilluaqquai, oqalugiarnerminilu Kalaallit Nunaata siunissaa kalaallit namminneq aalajangissagaat pingaartillugu eqqaallugu.

Inatsisartunut ilaasortat Napaartoq Petrussen (D) aamma Vivian Motzfeldt (D) peqataapput.

Sinniisoqarfiup sisamanngornermi ammaanersiornera malunnartinniarlugu ilassinninnermut 300-t qaaqquneqarput, Naalakkersuisuniit peqataasoqanngilaq.

Sinniisoqarfiup ammaanersiorneqarneranut atatillugu ilassinninnermi peqataasut allattaavinnut inuulluaqqussummik allassinnaapput.

Atuakkap allattaaviup nerriviup inissisimaffiata tunuani USA-p præsidentiata Donald Trumpip, nunanut allanut tunngasunut ministerip Marco Rubiop præsidentillu tulliata JD Vancep assingi nivingapput.

Aammattaaq sinniisoqarfik kalaaliminernik, champagnemik viinnimillu sassaalliuteqarpoq.

Nuummi sinniisoqarfiup illutaata nutaap matui ammarneqarput. Sermitsiaq ammaanersiornermi peqataavoq kingusinnerusukkullu akerliussutsimik takutitsinermi aamma malinnaassalluni.

Aallartitaq Kenneth Howery Kalaallit Nunaannilu sinnisoq Susan Wilson ammaanersiornermi peqataasunut tikulluaqqusipput.

Politiit pisortaat Bjørn Tegner Bay, sinniisoqarfiup pisortaa Jacob Isbosethsen aamma Naalaakkersuisut siulittaasuata nalakkersuisoqarfiani pisortaq Hans Peter Barlach Christensen sinniisoqarfiup ammaanersiorneqarneranut peqataasunut ilaallutik qaaqqusisunut ilassinnikkiartorput.

Qaaqqusat arlallit, ilaatigut Naalakkersuisut Siulittaasuat, Jens-Frederik Nielsen, ammaanersiornermi peqataassanatik nalunaarsimapput nunarsuarmi pissutsit ilungersunarsinnaaneri pissutigalugit.

Nuummi sinniisoqarfiup tungaanut ualera akerliussutsimik takutitsisoqalerpat politiit najuutissasut, Kalaallit Nunaanni Politiit paasissutissiipput.

Politit Facebookimi quppernerminni allapput.

- Akerliussutsimik takutitsineq nalunaaqutaq 16.30-p missaanniit NC-miit (Nuuk Center) USA-p aallartitaqarfittaavata tungaanut ingerlanneqassaaq. Akerliussutsimik takutitsinerup toqqissisimasumik isumannaatsumillu ingerlanneqarnissaa qulakkeerniarlugu, aammalu piffimmi pineqartumi aqqusinertigut angallannerup sapinngisamik eqqorneqannginnissaa anguniarlugu najuutissaagut, politiit allapput.

Akerliussutsimik takutitsinissamik aaqqissuussisut eqqissisimasumik pisoqarnissaa aamma kaammattuutigaat.

Trumpip immikkut aallartitaa, Louisianami guvenøri, Jeff Landry, ullut pingasut Nuummeereerluni nal. 19.00 aallaqqippoq.

Jeff Landry Future Greenlandip ingerlanneqarnerani malinnaassalluni Nuummiippoq, piffissalli annerpaa Nuummi inuussutissarsiutinik ingerlatsisut innuttaasullu naapinniarlugit periarfissarsiorsimalluni.

Landry præsident Donald Trumpimit immikkut aallartitatut taaneqarpoq, Kalaallit Nunaata USA-mut atalernissaanut suleqataasussatut toqqagaalluni. Landrymik ataatsimeeqateqareernerup kingorna Naalakkersuisut siulittaasuat, Jens-Frederik Nielsen ataasinngornermi ullaakkut oqarpoq Kalaallit Nunaannit isuma allanngunngitsoq, nunattalu tuniniagaannginneranik oqariartuut apuunneqaqqittoq.

Landry Sermitsiamut oqaluttuarpoq Trumpimut oqassalluni nunatsinnit niueqateqarnermik periarfissaqarluartoq.

USA-p immikkut aallartitaa Jeff Landry tikeraarnermini niuernermik inuussutissarsiuteqartunik ataatsimeeqateqarpoq.

Landryp inuussutissarsiorluni namminersortoq politikeriunikorlu Jørgen Wæver Johansen Nuummi kaffisorniartarfimmi ataasinngormat ullaap tungaani sivisuumik ataatsimeeqatigaa.

Sermitsiap Jørgen Wæver Johansen ataatsimiinneq pillugu oqaaseqarusunnersoq aperaa, taamaaliorusunngilarli.

Jørgen Wæver Johansen Amerikamiunut attaveqartareerpoq. Amerikamiu aningaasaliisartoq ingerlatseqatigiiffimmut Greenland Water Bankimut, Jørgen Wæver Johansenip Svend Hardenbergillu pigisaannut, siorna ilannguttoq nalunaarutiginikuuaa.

Jørgen Wæver Johansenip Amerikamiunut attaveqarnermut ernumassutissaqartoqanngitsoq 2025-mi decembarimi ima oqaaseqarfigaa:

- Imermik nioqqutissiortuaraavugut, kiisami suleqatissamik nassaartut. Danskit suliffeqarfippassui arlallit aamma Amerikamiunik piginnittoqarnerat eqqaamaneqartariaqarpoq, Sermitsiamut taamani oqarpoq.

USA-p Nuummi sinniisoqarfia nutaaq sisamanngornermi ammarneqarpat innuttaasut akerliussutsimik takutitsinissamut pilersaaruteqarput.

Facebookimi pisussatut pilersaarutigineqartutut tamanna takuneqarsinnaavoq.

Akerliussutsimik takutitsisut nalunaaqutaq 16.30 Inatsisartut silataanni aallartissapput sinniisoqarfiullu tungaanut ingerlaassallutik.

Akerliussutsimik takutitsisut sinnissoqarfimmut apuussimalerunik, sinniisoqarfik tununngassagaat aamma nassuiarneqarsimavoq.

Aaqqissuisut eqqaasitsissutigaat akerliussutsimik takutitsinerup eqqissisimasumik ingerlanneqarnissaa siunertarineqartoq.

Future Greenlandip ulluani siullermi GrønlandsBankenip Ukiup Aallarnisaasuanut nersornaasiuttagaa ualikkut tunniunneqarpoq.

Ukioq manna Pilu Nielsen aamma Camilla Berg Christensen, Qaqortumi qulimiguulimmik attartortitsisarnermik ingerlatsisumik Sermeq Helicoptersimik piginnittut, nersornaatisipput.

Piginnaanisi atorluarlugit, aammali sumiiffinni pisariaqartinneqartut malillugit suliaqarsimavusi, Maliina Abelsen, nersornaammik tunniussisoq, oqarpoq.

- Sullissinersi allanut namminersortunngorniartunut maligassiuineruvoq kusanartoq, suliassinnillu aallussiinnaqqullusi nersornaammik kajumissaaserneqarpusi.

GrønlandsBankenip Inuussutissarsiornermut Aningaasaateqarfia 2005-imiilli inunnut suliffeqarfinnullu siniuteqartunut nersortarialinnut nersornaasiisarpoq.

Kommune Kujallermi borgmesteri Malene Vahl nuannaarluni ajugaasut sinnerlugit nersornaammik tigusisoq ima oqarpoq:

- Nersornaatip inuttassaannut apuuttussanngorakkit tulluusimaarpunga. Nersorniarneqarnerat inissaminiippoq. Kujataani attaveqarnermut akisussaaffimmik annertuumik tigusinerinnaanngilaq, aammali inuiaqatigiinnut iluaqutaalluinnarpoq.

Nersornaat 25.000 koruuninik aningaasartalerneqarsimavoq.

Frankrigimi nunanut allanut niuernermut ministerip Nicolas Forissierip tusagassiortut marlunngornermi ullaap tungaani naapippai.

- Ataatsimeersuarnermi pingaaruteqartumi Future Greenlandimi peqataasinnaanera nuannaarutigaara. Ullaaq manna oqalugiartut torragaakka, ingammik arnat inuusuttut. Tinguartinnaqaat, Nicolas Forissier oqarpoq.

Frankrigimiup Uiloq Bak aamma Veronica Geisler, marlunngornermi ullaakkut oqalugiartut nuannarineqaqisut, pivai.

Nicolas Forissier Nuummiinnini inunnik naapitsinissamut atorniarlugu oqarpoq, taassumami politikerit inuussutissarsiornermilu suliaqartut amerlassut naapereersimavai.

Frankrigip Kalaallit Nunaatalu aatsitassat pisariaqartinneqartut pillugit suleqatigiinnerup nukittorsarnissaanut isumaqatigiissut ataasinngormat atsioqatigiissutigaat.

- Suleqatigiinnerup oqaatsitigut piinnarnani timitalerneqarnissaa uagutsinnut pingaaruteqarpoq, Nicolas Forissier oqarpoq.

Frankrigip Kalaallit Nunaanni suliniuteqarnera ingerlaannarlunilu nunaniit allaniit tatisisoqarnerata nalaani Kalaallit Nunaat Danmarkilu tapersersorneqarnerat attaveqartoq aamma naqissuserpaa.

- Kalaallit Nunaat nunaavoq pisiarineqarsinnaanngitsoq, Nicolas Forissier ilaatigut naqissusiivoq.

Frankrigimiit aallartitaq pingasunngornerup ullaavani ataatsimeersuarnermi oqalugiartussaavoq.

Nuup qeqqani pisuttuarujuussaguit allagartarpassuarnik aappaluttumik qaqortumillu qalipaatilinnik takunissat qularnanngilaq. Amerikamiut Future Greenlandimi peqataanerannut allagartarsuit "USA ASU"-mik allannillit akerliussutsimik takutitsissutitut iliorarneqarsimapput.

Amerikamiut nuimasut arlallit Sulisitsisut inuussutissarsiorneq pillugu ataatsimeersuartitsineranni Future Greenlandimi ulluni marlunni ingerlanneqartumi peqataapput. Trumpip aallartitaa Jeff Landry Future Greenland peqataaffiginiarlugu aamma inuussutissarsiortunik politikkerinillu naapitsiniarluni Nuummiippoq.

Kommunip Erfalasorut amugaa

Akerliulluni allagartarsualersortoqarsimanerani illoqarfimmi kisiartaalluni takussaanngilaq. Kommuneqarfik Sermersuup Kalaallit Nunaata inuiattut pisinnaatitaaffia takutinniarlugu Erfalasorput ulluni makkunani amusarniarlugu Facebookikkut nalunaarutigaa.

- Ulluni makkunani Nuuk tikeraartunut nunani tamalaaneersunut aaqqissuussisuuvoq. Piffissami Kalaallit Nunaata nunani tamalaani eqqumaffigineqarnerani pigisarput pillugu ataatsimoornissarput pingaaruteqarpoq.

- Erfalasorput Nunatsinnut, ataatsimoornitsinnut aamma kinaassutitsinnut ilisarnaataavoq. Taamaattumik Kommuneqarfik Sermersuumi ulluni makkunani Erfalasorput erfalatipparput, sulisugullu suliffimminni malunnartitsinissaannut kaammattorpagut, kommuni allappoq.