Naartunaveersaasersuisimaneq pillugu nalunaarusiat utaqqisaasut saqqummersinneqalersut

Niviarsiaqqanut arnanullu 1960-ikkunnit maannamut naartunaveersaasersuisimanermut suliami inuit pisinnaatitaaffiinut tunngasunik immikkut ilisimasallit misissuereernerannit nalunaarusiat nutserneqarneri piareerput.

Nalunaarusiat aggustip 28-ani tamanit atuarneqarsinnaalerlutillu saqqummersinneqassasut, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Mariane Paviasen Jensen (IA) tusagassiorfinnut ilisimatitsivoq.

- Naartunaveersaasersuisimanermut suliami inuit pisinnaatitaaffiinut tunngasortaannik immikkut ilisimasallit misissuineri tamanut saqqummiussinnaanngorpagut.

- Oqaluttuarisaanitsinni pisimasut ilungersunartut ilaat, nalunaarusiani allaaserineqartut saqqummiussapput. Tassunga killinniarneq imaannaasimanngilaq, kisiannili aamma piffissatigut, peqqissaarussinissamut, periarfissaqartitaanissamullu pisariaqartitaq atorneqartariaqarluni suliaq pisariusimalluni. Immikkut ilisimasallit misissuineri saqqummiutissallugit piariilerpoq, Naalakkersuisoq tusagassiorfinnut nalunaarummi oqarpoq.

Nalunaarusiami niviarsiaqqanut arnanullu 4500-it missaanniittunut akuersititseqqaarnani naartunaveersaatinik spiralilersuisimaneq inuiannik toqoraanerunersoq aammalu iliuusaasut inuit pisinnaatitaaffiinik unioqqutitsinerunersut akissutissartaata ilaatigut saqqummersinnaalerput.

AAMMA ATUARUK:

Spiralilersuinikuuneq pillugu nalunaarusiat saqqummersinneqarnissaat kinguaattooqqittoq

Naartunaveersaasersuisimaneq inuiannik toqoraanerunerarlugu, Múte Bourup Egede (IA), Naalakkersuisunut Siulittaasuunermi nalaani, 2024-imi decembarip qiteqqunnerani, DR-imit apersorneqarnermini, inerniliivoq. Maannakkulli ilisimasallit inerniliinerat saqqummertussanngorpoq.

Mianersoqqusisoq

Naalakkersuisoq tusagassiortunik nalunaarusiat saqqummersinneqarnerannut atatillugu aggersaavoq. Tamanna ullormi tassani nalunaaqutaq 13.00 pissaaq.

- Soqutiginnittut internetikkut malinnaasinnaapput, naalakkersuisoqarfik allappoq.

Naalakkersuisup kikkut tamaasa suliamut atatillugu qisuariarnerminni mianersornissaannik kaammattorpai. 

- Tassunga atatillugu pingaarutilimmik erseqqissaatigerusuppara, suliap aamma nalunaarutit imarisaat innimigalugit, pineqartullu ataqqillugit atorneqassammata. Arnat, niviarsiaqqallu ajoraluartumik namminneq toqqagarinngisaminnik oqaluttuassartatsinni ilungersunartumi pingaarnertut pineqartut pillugit, Mariane Paviasen Jensen oqarpoq.