Naleqqap qinersisinnaalernissamut najugaqarnissamut piumasaqaatip sivitsortinniaqqaariarlugu siunnersuut tunuartippaa
Naleqqap qinersisinnaatitaanermut piumasaqaatip sivitsorneqarnissaanik siunnersuutaa Inatsisinut Ataatsimiititaliamut ingerlateqqinneqarpasileraluapoq, partiilli naggataatigut isummani allanngortippaa.
Kuno Fenckerip siunnersuutini sisamanngormat tunuartippaa. IA-p Inatsisinut Ataatsimiititaliamut ingerlatitseqqikkusunngimmat, taamaalillunilu aalajangiinissamut amerlanerussuteqartoqanngimmat taamaaliorpoq.
Assi Johan Nilsson/TT/Ritzau Scanpix
Kuno Fenckerip Naleqqameersup Kalaallit Nunaanni qinersisinnaatitaalissagaanni qaammatit arfinilinnit sivisunermik najugaqaqqaarsimasariaqarneq siunnersuutigaa.
Qallunaat innuttaassusillit Kalaallit Nunaanni ukiup affaani najugaqareersimagunik maanna qinersisinnaatitaalertarput.
Kalaallit amerlassusaat pissutigalugu innuttaasut katitigaaneranni annikitsumik allannguineq nunanut allanut sanilliullugu annerusumik sunniuteqarsinnaasoq Kuno Fencker aalajangiiffigisassatut siunnersuummi allappoq.
Naleraq Inatsisartunut qinersisinnaanermut malittarisassat nunamut piujuartumik atassuteqarnerup ersersinneqartariaqarnera isumaqarpoq.
Qanoq sivisutigisumik Kalaallit Nunaanni najugaqarsimanissaq siunnersuummi oqaatigineqanngilaq, tamannalu Inatsisartuni oqallisissiarineqarluni.
Siunnersuut Inatsisartut sisamanngormat apriilip 30-ani siullermeerpaat.
Siunnersuut tunuartikkaa
Qinersisinnaanermut malittarisassat allanngortinneqarnissaannut pissutissaqartoq partiit ilaat isumaqataagaluartut, siunnersuutip itigartitsissutigineqarnissaa Naalakkersuisut innersuussutigaat.
- Innuttaasut katitigaanerannik allannguinissat politikkimut pingaaruteqarsinnaasut siunnersuummi allassimavoq. Naalakkersuisut tamanna maluginiagassatut isigaat, maannakkulli qaammatini arfinilinni najugaqarsinnaatitaanermik piumasaqaatip ajornartorsiortitsineranik takussutissaqanngilaq, imaluunniit inuit sivikinnerusumik najugaqarsimasut qinersinerup inerneranut Inatsisartullu aalajangiinerinut immikkut sunniuteqarsimaneranik misissuisoqarnikuunani.
- Taamaattumik tamaaneereersutut aaqqiissutaasumik tassannga allanngortitsinissamut
uppernarsaasersukkanik pisariaqartitsinernik pigisaqartoqanngitsoq Naalakkersuisut
naliliissutigaat, isumaginninnermut,
suliffeqarnermut ilaqutariinnut nunamullu namminermut naalakkersuisoq Maritha Broberg oqaluttarfimmiit oqarpoq.
Siumulli, IA Nalerarlu siunnersuut Inatsisinut Ataatsimiititaliamut ingerlateqqinneqarnissaa innersuussutigigaluarpaat. Taamaammat Naalakkersuisut itigartitseqqusinerat amerlanerussuteqartunit itigartitsissutaarpasileraluarluni.
Siullermeerneqarneranili oqallinnerup sakkortusivallaarnerata kinguneranik siunnersuut IA-mit itigartinniarlugu aalajangerneqarpoq. Ane Hansen (IA) ataatsimiittarfimmi taama oqarpoq.
Taama pisoqarmat Kuno Fencker oqaluuserisassaq tunuartinniarlugu aalajangerpoq, siunnersuutimmi ataatsimiititaliamut ingerlateqqinnissaanut amerlanerussuteqartoqarunnaarpoq.
