KL

DK

Naligiimmik Pinninnissaq Pillugu Aalajangiisartunit arlaannaalluunniit taperserneqarsimanngitsoq

Naligiimmik Pinninnissaq Pillugu Aalajangiisartunut ukiuni marlunni maalaaruteqartoqarsinnaagaluartoq, suliassaq ataaseq naliliiffigineqarsimavoq, arlaannaalluunniit tapersiisoqarani. Taamaattorli maalaarutit arlallit suliarineqarnissaminnut utaqqiinnarput.

Naligiissitaanissaq anguniarlugu assigiinngisitsinerlu akiorniarlugu, Inatsisartut Naligiimmik Pinninnissaq Pillugu Aalajangiisartut pilersinneqarnissaat 2024-mi aalajangiuppaat.
Morten Okkels Morten Okkels Tusagassiortoq
Saqqummersinneqarpoq

Assigiinngisitaasutut misigisimagaanni Naligiimmik Pinninnissaq Pillugu Aalajangiisartunut, 2024-mi juulip aallaqqaataanniilli maalaaruteqartoqarsinnaalerpoq. Soorlu suiaassuseq, inuiannit kikkunnit kingoqqisuuneq, upperisaq imaluunniit kinguaassiuutinik atueriaaseq pissutigalugu, assigiinngisitaasimagaanni maalaaruteqartoqarsinnaalluni.

Taamaattorli maalaaruteqarsimasut arlaannaalluunniit – maannamut – taperserneqarsimanngilaq.

Aalajangiisartunit maalaarutit arfinillit maannamut aalajangiiffigineqarput. Maalaarutigineqartoq ataaseq maannamut suliarineqarmat, maalaaruteqartoq taperserneqanngilaq, sinnerilu tallimat itigartinneqarlutik. Atuisartoqarnermut Unammilleqatigiinnermullu Aqutsisoqarfik Sermitsiamut taama ilisimatitsivoq.

Suliassaq ataaseq Aalajangiisartunit suliarineqarsimasoq tassaavoq Nunatsinni peqqissutsimut isumaginnittunut assigiinngisitsinermik maalaaruteqarneq. Suliassaq tamanna allaaserisami allami immikkut sammineqarnerujumaarpoq.

Suliarineqartussat tallimat itigartinneqarnerannut patsisaalluni Aalajangiisartut suliassanik taakkuninnga suliarinninnissaminnut inatsisitigut pisinnaatitaaffeqannginnerat.

Sermitsiap suliassat itigartinneqarsimasut ilisimasaqarfiginngilai. Itigartitsinermulli pissutaasinnaasut ilaat tassaasinnaallutik maalaarutigineqartut aalajangiisartut suliassaqarfiata avataaniinnerat imaluunniit 2024-mi juulip aallaqqaataa sioqqullugu pisimasinnaanerat. Maalaarutigineqartut eqqartuussivimmi suliassaanerat patsisigalugu, Aalajangiisartunit aamma suliarineqanngitsoorsinnaapput. 

Atuisartoqarnermut Unammilleqatigiinnermullu Aqutsisoqarfimmit oqaatigineqartut naapertorlugit, maalaarutigineqartut arfinillit Naligiimmik Pinninnissaq Pillugu Ataatsimiititaliamit suli aalajangiiffigineqanngillat.

Allatut oqaatigalugu maalaarutigineqartumik Aalajangiisartut ukiuni marlunni atuuffiini siullerni nassiussisimagaanni, maalaaruteqartup taperserneqarsinnaanissaanut suli periarfissaqarpoq. 

assigiinngisitsineq atuisartoqarnermut unammilleqatigiinnermullu aqutsisoqarfik inuiaqatigiit kalaallit nunaat naligiimmik pinninnissaq pillugu aalajangiisartut maalaarutit

Atorfiit tamaasa takukkit

PODCASTI

Powered by Labrador CMS