Nalunaarusiaq: Angerlarsimaffimmi imigassamik ajornartorsiuteqarneq, meeqqap inuunerata sinneranut sunniuteqartarpoq

Meeqqat angerlarsimaffimmi imigassamik atornerluiffiusumi peroriartortut toqqissisimananngitsumik angerlarsimaffeqartarput.

Immikkut ilisimasallit, suliamillu ilisimasallit arlallit ukiuni qulikkuutaani arlalinni tamanna oqaaseqarfigisarpaat. Immikkut ilisimasallit, suliamik ilisimasallit oqartussallu oqalliseqatigiinnerisa kingorna maannakkut oqaatsit taakku, uteqqinneqarput. Oqallinneq Meeqqat Pisinnaatitaaffiinik Sullissivimmit MIO-mit aaqqissuunneqarpoq, nalunaarusiamilu "Børn før alkohold"-mi angerlarsimaffinni meerartalinni imigassaq pillugu allaaserisaqarpoq.

Nalunaarusiami inerniliunneqarpoq angerlarsimaffimmi imigassamik atornerluineq meeqqap inuunerata sinneranut sunniuteqartartoq, aamma inersimasutut inuunerannut.

Nalunaarusiaq naapertorlugu Ilisimatusarfimmi SDU-milu professorip Christina Viskum Larsenip ilaqutariit meerartallit quliugaangata sisamat imigassamik ajornartorsiuteqarsinnaanerat tikkuarpaa:

- Ilisimavarput angerlarsimaffimmi nakuusertoqarsinnaanera, meeqqat imigassamik ajornartorsiorfiusumik peroriartortut inuusuttuunerminni inersimasunngornerminnilu peqqiilliortarnissaat imminut toqoriartarnissaat annertuseriarsinnaavoq, oqarpoq

Taassuma aamma paasissutissiissutigisinnaavaa meeqqat mikisuuneranniilli aalakoortarneq ileqquliunneqartalersimasoq. Meeqqat ilarpassui meeqqat atuarfianniilli imerneq inuiaqatigiinnut ilaasutut ilinniarpaat.

Inunngornermiit toqumut

Oqallinnerni ilaqutariinnut sullissivimmiit, atuarfinniillu suliami ilisimasallit peqataapput. Taakku nakkutilliinerat naapertorlugu meeraaqqerivimmiut - aamma meeqqerivimmiut paatsiveerusimaarlutillu kamaqqajaanerusartut. Meeqqat atuarfianni atuartut angerlarsimaffimmi imigassamik ajornartorsiuteqartut, ilikkagaqarnissamut nukissaqaratik pisartut IMAK naliliivoq.

Angerlarsimaffimmi imigassamik ajornartorsiorfiusunut meerartalinnut orniguttarneq sulinerminni politiit ulluinnarsiutigaat:

- Meeqqat aqqusinermi ualikkut kingusissukkut, unnuaannakkullu naapittarpavut. Meeqqat nuannariinnarlugu aqqusinermiinneq ajorput, angerlarsimaffimminniilli aqquserngit toqqissisimanartinneruaat. Angerlarsimaffianni imigassamik atornerluineq meeqqallu pinerluttuliorfigineqarneri, ilaatigut kinguaassiuutitigut atornerlunneqartarnerat ataqatigiinnerannik takunnissinnaavugut.

- Meeqqat angerlarsimaffimmiikkusugatik, amerlanertigut sumiiffinni iluamik nakkutigineqanngitsuni unnuisarlutillu najugaqartarput. Avatangiisit isumannaatsuuneq ajorput, taamatullu pisoqartillugu pinerluttup meeqqat atornerlussinnaavai, politimesteri Bjørn Tegner Bay nalunaarusiami oqarpoq.

Allorfimmi nakorsat siunnersortaasa pisortaata Birgit Nicklasenip oqallinnermi saqqummiussamini erseqqissarpaa meeraanermi misigisat inuunerup sinneranut sunniuteqartartut.

Innersuutit allat

Oqallinnermi peqataasut, imigassaq meeqqat inuunerannut sunniuteqarnerlussinnaasut pinngitsoortikkumallugit assigiinngitsorpassuarnik innersuuteqarput.

Ilaatigut innersuutigineqarpoq, meeqqat inuusuttullu siusissukkut imigassamik misiliinissaanik kaammattorneqartassanngitsut. Aamma immikkut ilisimasallit arlallit apeqquserpaat imigassartorsinnaanermut ukiukinnerpaaffik 18-inik ukioqalersimanissaq siusinaarnerusoq, inuusuttummi 25-nik ukioqalernissartik angullugu inerikkiartortarmata.

Aammattaaq meeqqat amerlanerpaat eqqissisimasumik toqqissisimasumillu peroriartornissaat qulakkeerniarlugu sunngiffimmi neqeroorutit imigassaqanngitsut amerlanerusut kiisalu atornerluisunut katsorsaariaatsit akeqanngitsut amerlanerusut inassutigineqarput. Avatangiisit peqqissut, imigassartaqanngitsut, toqqissisimasut akuutitsisullu pilersinneqarnissaat meeqqanut inuusuttunullu ingerlalluarfiusinnaasut ineriartorfiusinnaasutillu, MIO-p ilaatigut kaammattuutigaa. Oqallinnermi pingaarnertut saqqummiunneqartut aamma inassutigineqarsimasut kiisalu MIO-p kajumissaarutai nalunaarusiami "Børn før aækohold"-mi atuarsinnaavatit.