Naluttarfiup matunissaa kinguarpoq

Nuummi naluttarfiup Maliup matunissaa 2026-mi marsip aallaqqaataanut kinguartinneqartoq, Kommuneqarfik Sermersooq allappoq.

Naluttarfiup iluarsartuunneqarnerani suliarinnittussat sulinissaminnut pilersaarutitik pissutigalugit kinguartitserusummata, pilersaarummik kinguartitsisoqartoq, kommunimit allapput:

- Tassa imaappoq siornatigut nalunaarutigineqaraluartutut naluttarfik januaarip aallaqqaataani 2026-mi matussanngilaq. Iluarsartuussinissamulli atatillugu naluttarfiup matuneqarnissaa marsip ulluisa aallaqqaataata 2026-p kingorna aatsaat pisinnaassaaq, kommunimit allapput.

Naluttarfimmili silaannarissarfiit pitsaannginnerat erseqqissaatigineqarpoq. Taakku atorsinnaajunnaassagaluarpata naluttarfik matulertorneqartariaqalersinnaavoq.

Naluttarfik iluarsartuunneqarujussuartussaavoq, ilaatigut naqqit, qulliit silaannarissarfiillu taarsersorneqassallutik.

Iluarsartuussinermi ukioq ilivitsoq atorneqarsinnaasoq siusinnerusukkut nalunaarutigineqarnikuuvoq.