Nanortalimmiut kommunimit avissaarusunnerlutik ullumi taasipput: Inuit qilanaarsimaqaat

Nanortalik ulluni kingullerni silaqqippallaarsimanngeriarluni ullumikkut seqinnarippoq. 

Seqinnarinnera, tallimanngornerunera imaluunniit isumasiuilluni taasinissap soqutigineqarnera peqqutaalluni katersortarfik ullaaq inugasannersoq inissikkuminaappoq. Innuttaasulli ullormut qilanaarsimaqaat.

- Inuit qilanaarsimaqaat. Takkussuuttut arlariippasipput. Takuakka aamma atuartut atuarfimminngaanniit malinnaajartortut, innuttaasut ilaat Augustinus Augustinussen Sermitsiamut taama oqarpoq. 

Taanna nanortalimmiutoqaavoq taasititsiviusorlu ullaaq qulingiluanut ammarmat malinnaajartortunut ilaalluni. Nanortallip Kommunia 2009-mi atorunnaarluni Kommune Kujallermut ilanngukkamik allanngortoqarsimasoq maluginiartarpaa.  

- Tassanngaanniit Nanortallip ineriartornera ammorpiaannaavik ingerlalernikuusoq isumaqarpunga, Augutinus Augustinussen oqarpoq. 

- Kommuninngorutta oqartussaaqataanerulissaagut

Ineriartornerup ammuinnaq aallarsimanera aqqusinerni takuneqarsinnaanerarpaa. 

- Soorlu assersuutigalugu ukiut tamaaviisa eqqaaneqartarpoq maani illoqarfitsinni aqqusineq ajortikkaluttuinnarpoq. Aqqusernit putuninnerit suamik ilaartorunik immerunikkit, tassa. Aamma allanik assersuutissanik peqarpoq, taanna oqarpoq. 

2009-mi kommunerujussuit atuutsinneqalermata borgmesterit kommunini illoqarfinni anginerusuniittarput.  Borgmesterillu illoqarfimmi takussaajunnaarnera innuttaasunut aamma sunniuteqarpoq

- Kommuninngoraluarutta illoqarfitsinni tamat oqartussaaqataaneranut ilaanerusinnaassuugut. Soorlu assersuutigalugu borgmestereqarpugut Qaqortumi. 2009-mili kommunerujussuanngoratta Qaqortumi borgmestereqartarpugut. Nanortalimmi borgmestereqarneq ajorpugut. Nanortalik kommuninngoraluarutta maani qinikkat saaffigiuminarnerulissapput borgmestereqarlutalu.

Ukumi kommunimut qinikkat atorluarnerusinnaanngilisigit? 

- Tassami atorluarneqarsinnaapput. Maannakkut maani illoqarfitsinni qinikkat, uanga isumaga malillugu, saqquminngippallaaramik Kommune Kujallermi, Nanortalik eqqarsaatigalugu, Augustinus Augustinussen oqarpoq. 

Taasisitsineq atorluarsinnaasoq neriuutigaa 

Isumasiuilluni taasititsineq isumasiuinerinnaavoq. Tassa imaappoq Nanortalimmi nunaqarfinnilu tallimaasuni amerlanerussuteqartut Kommune Kujallermit avissaarusussagaluarpata imaanngilaq ingerlaannarluni Nanortalik Kommuninngortoq. 

Taasititsinerup inernera nunatsinni kommunit qanoq aggulunneqarnissaat pillugu politikkikkut aalajangertoqalerpat Inatsisartut Naalakkersuisullu tunngavissaannut ilaassapput. Tassanilu isumasiuilluni taasititsinerup inernera atorluarneqarsinnaassasoq Augustinus Augustinussenip neriuutigaa.

- Siunissami Inatsisartut kommunit avissaartuutsinneqaqqinnissaat aalajangissappassuk, tassami aalajangiiffigigussaavaat, neriuppunga taasisitsineq takussutissaasinnaassasoq, taanna oqarpoq. 

Innuttaasut amerlanerit nammineq kommuninngoqqinnissaq kissaatigigaat taassuma maluginiarpaa. Akerliusummi imatut takussaanngillat.

- Ullaatungaa Facebookimi takuvunga taasinissamut eqqarsarluaqqusisoq, ilumut angissanerluni naaggaassanerluniluunniit. Aammami taanna ilumoorpoq, Augustinus Augustinussen oqarpoq.

Kommunit ilusilersorneqarnerat Inatsisartut aalajangiiffigisinnaavaat, taasisitsinerit tunngavigalugit allannguisoqartariaqarnersoq kommunalbestyrelsemi nalilerneqarpat, tamanna iliuuseqarfigineqartariaqartussatut Naalakkersuisoqarfimmut saaffiginnissinnaapput.