Napãtûp Gabrielsenip akinissaa utaqqikatappaa

Avannaata Kommuniani borgmesterip tullia siulleq, Jens Napãtôk’ (N) kommunimi politikkikkut suleqatiminut qaninnerpaamut, borgmester Lars Erik Gabrielsenimut, kommunimilu pisortaanermut, Nick Nielsenimut, juunip arfineq-pingajuanni allakkani akineqarneq ajormata akueriuminaatsippaa.

- Ajoraluarmik kiisa pingajussaanneerlunga akinissaannik tuavisaarummik nassiussivunga, Jens Napãtôk’ Sermitsiamut oqarpoq.

Taanna suleqatiminut ilaatigut allappoq paaserusullugu kommunimi nunaqarfinni qulimiguullit mittarfiisa eqqaanni eqqakkanik nakkutilliisoqarnersoq. Taassuma aamma saaffiginnissummini allappaa eqqakkat katersuukkiartortut timmisartuussinermi isumannaallisaanermut akornutaalinnginnissaat qulakkeerniarlugu iliuuseqarluni matusooqqinnginnissamik pinaveersaartitsoqarnersoq paaserusullugu. 

- Tamatuma saniatigut kissaatigaara paasissutissiissutigineqassasoq kommuni qulimiguulinnut mittarfiit eqqaanni aalajangersimasunik nakkutilliinermik saliinermillu periaaseqarnersoq, kiisalu allaffeqarfiup nalilerneraa ullumikkut iliuuserineqartut naammanersut. Siunissamilu qulimiguulinnut mittarfiit eqqakkat pissutigalugit killilersorneqarnissaat imaluunniit matuneqarnissaat pinngitsoortinniarlugu ataavartumik nakkutilliillunilu upalungaarsimasoqarnersoq, Jens Napãtôk’ borgmesterimut kommunillu pisortaaneranut allappoq.

AAMMA ATUARUK:

Napãtôk’ Gabrielsenimut: Mianersorit

Savissivimmiittoq matugallartoq

Taassuma saaffiginnissutaa pereersoq, tassa sisamanngornermi juunip 18-ani, Greenland Airports nalunaarpoq Qaanaap eqqaani nunaqarfimmi Savissivimmi qulimiguulinnut mittarfiup eqqaa eqqagassaqarpallaarmat mittarfik killiligaanngitsumik matusoq.

- Nunaqarfimmiortatta ukioq kaperlannerani qulimiguulimmik angalanissaralui tamaatiinnarneqaqattaariarlutik maannakkut upernarluni silagittalernerani tikinneqarsinnaalersullu mittarfiit matusarnerat pinnginniassammat, sakkortuumik allagaqaraluarpunga. 

- Iliuuseqartoqartoqanngilaq, aamma tusagaqannginnera akueriuminaatsippara. Apuussagut isumaqarpunga akineqartariaqartut aaqqinneqartariaqartullu, Jens Napãtôk’ oqarpoq.

Taassuma akineqarnissani tikillugu akisussaasut kimigiiserfiginiarpai.

- Mittarfinnik matusinerit pinaveersaartariaqarput, taamaammanuna allagaqaqattaartunga, aamma aaqqinnissaata tungaanut ujartussuara, taanna oqarpoq.

Nersualaarisoq

Jens Napãtûp kommunimi suleqatiminut qaninnerpaanut ilungersuuteqarnini kisiat oqaluttuarinngilaa. Ingerlatseqatigiiffimmi Namminersorlutik Oqartussat pigisaata aalajangiinerannut nersualaarpaa.

AAMMA ATUARUK:

Eqqakkat timmisartuussinerup isumannaatsuuneranut navianartorsiortitsipput: Qulimiguulimmut mittarfik matugallarneqarpoq

- Mittarfeqarfiit nersualaarusupakka ajutoortoqannginnissaa pillugu taamannak nakkutiginnittuarmata. Pikkorik. Toqqissisimanaq. Ulorianartorsiortoqarsinnaasoq takugaangamikku isumannaallisaallutik matusisarput. Kisianni taamaattoqannginnissaanut pikkorinnerusariaqarpugut, Jens Napãtôk’ oqarpoq.

Sermitsiap isornartorsiukkat, Lars Erik Gabrielsen aamma Nick Nielsen isornartorsiut pillugu attaveqarfigai. Taakkua allaaserisap suliarineqarnerani akinngillat.