Nathanielsenip akuersissutit nakkutiginerlunneqarnerat nassuerutigaa
Akuersissutinik nakkutilliinerup pitsaavallaannginnera Kalaallit Nunaanni isumannaallisaanermut navianartorsiortitsisinnaaneranik immikkut ilisimasallit mianersoqqusereersullu, qanoq sukaterisoqarsinnaanersoq aatsitassanut naalakkersuisup maanna misissuiffiginialerpaa.
“Aningaasaliisartut siusissukkut misissorneqartariaqarnerat pillugu isornartorsiuineq paasilluarpara, tamannalu nangaanngivillunga ilassivara,” Naaja H. Nathanielsen Danwatchimut allappoq.
Assi: Oscar Scott Carl
Nunanit allanit suliffeqarfinnik Kalaallit Nunaanni aatsitassanik misissuinissamut akuersissummik qinnuteqartoqaraangat piginnittut siusinnerusukkut misissorneqartariaqarput.
Aatsitassanut naalakkersuisup Naaja H. Nathanielsenip (IA) tusagassiuutinut misissuisartunut Danwatch-imut mailikkut ima nassuerpoq:
“Aningaasaliisartut siusissukkut misissorneqartariaqarnerat pillugu isornartorsiuineq paasilluarpara, tamannalu nangaanngivillunga ilassivara,” Naaja H. Nathanielsen allappoq.
Aatsitassarsiorfimmik aningaasaliisartoq Australiamiu, Michael Shemesian pasinarsinnaasoq oqartussanit kina piginnittuunersoq misissorneqaqqaarnani aatsitassanik ujaasinissamut akuersissutinik tunineqarsimasoq, Danwatchip misissuinermini akunneq kingulleq sisamanngornermi qulaarpaa.
Ulorianarsinnaasut amerlasuut
Tamanna ilaatigut, isumannaallisaanermut siunnersortimit illersornissamullu tunngasunik paasiniaanermi pisortaasimasumit, Jacob Kaarsbomit isornartorsiorneqarpoq:
"Tamanna ilungersunartorujussuuvoq. Sillimaniarnermut politikki eqqarsaatigalugu ulorianarsinnaasut amerlasuut akornanniippugut, piginnittut nakkutiginngikkaanni Kinami naalagaaffimmut attuumassuteqartoq imaluunniit Trumpip aqutsisoqarfianeersoq Naalagaaffeqatigiinnermik akornusersuiniarluni ingerlatseqatigiiffimmik piginnittunngorsinnaavoq“, oqarpoq nangillunilu:
"Aatsitassanut Naalakkersuisoqarfik ilisimatinnagu taanna (Michael Shemesian, aaqq.) akuersissutinik pissarsisinnaappat taava kikkut allat taamaaliorsinnaappat? Tamanna ajornartorsiut annertoorujuuvoq."
Suleriuseq illersoraa
Naaja Nathanielsen Kalaallit Nunaanni aatsitassarsiornermi pissutsit aqunneqannginnerarlugit oqaatigineqartut tunngaviatigut isumaqatiginagit Danwatchimut mailikkut allappoq. Taamaasilluni ullumikkut Kalaallit Nunaat ”misissueqqaarani” akuersissutinik tunniussisartoq imaluunniit Kunngeqarfiup isumannaatsuuneranik akornusersuisoq ilumuunnginnerarpaa, erseqqissarpaalu oqartussat piumasaqaatinik allannguisinnaasut imaluunniit naggataatigut akuersissummik arsaarsinnaasut akuersissutinut piumasaqaatit naammassineqanngippata.
“Taanna oqaatigereerlugu oqartussaasut akisussaaffillit tamarmik pissutsinut naleqqussartuartariaqarnerat isumaqatigaara,” allappoq.
Aatsitassarsiorneq nunanit tamalaanit tatineqaleraluttuinnarnera ilutigalungu nakkutilliineq allanngortittariaqarpoq naalakkersuisup nassuerutigaa:
“Taamaattumik qaammatini 14-ini kingullerni avataaneersunit tatineqarneq eqqarsaatigalugu Naalakkersuisuni nunanit allanit aningaasaliissuteqarnissamut sinaakkutissat misissulereerparput, tassungalu atatillugu periarfissaavoq aningaasaliisartunik misissuisarnerup sukaternissaa.”
Misissuisarnissamut inatsit suliarineqarpoq
Nunanit allanit aningaasaliissutit Kalaallit Nunaata isumannaatsuuneranut inuiaqatigiinniluunniit eqqissinermut navianartorsiortitsinissaat pinngitsoortinniarlugu misissuinissamut inatsisiliortoqalerpoq.
Inatsit ukioq manna januaarip aallaqqaataani atuutilersussaagaluarpoq, Pisortalli Illersuisuat naapertorlugu aappassaaneerneqarnissaa pingajussaaneerneqaqqinnissaalu upernaamut kinguartinneqarpoq.
