Issittumi - Kalaallit Nunaat tassunga ilanngullugu NATO-p sakkutooqarnikkut suliai annertusarneqassapput.Tamanna nunat NATO-mut ilaasortat, issittumiittut, tallimanngornermi ataatsimiinnerminni isumaqatigiissutigaat.
Sakkutooqarneq, nakkutilliineq sungiusaqatigiittarnerlu nukittorsarneqartussanngorput.
Issittumi - Kalaallit Nunaat tassunga ilanngullugu NATO-p sakkutooqarnikkut suliai annertusarneqassapput.Tamanna nunat NATO-mut ilaasortat, issittumiittut, tallimanngornermi ataatsimiinnerminni isumaqatigiissutigaat.
Sakkutooqarneq, nakkutilliineq sungiusaqatigiittarnerlu nukittorsarneqartussanngorput.
Nunanut allanut, Inuussutissarsiornermut, Aatsitassanullu Naalakkersuisoq, Múte Bourup Egede (IA), ataatsimiinnermi isumaqatigiinnermilu peqataavoq. Taassuma Canadap Danmarkip, Savalimmiut, Finlandip, Islandip Norgep, Sverigep USA-llu nunanut allanut ministerii isumaqatigiissusioqatigai.
- NATO-mut ilaasortat iligiit isumaqatigiissutigaarput patajaatsumik aammalu siunissami sillimaniarnikkut patajaatsumik ineriartornissaq tunngavilerniarlugu suleqatigiinneq annertusarneqassasoq, Múte Bourup Egede Sermitsiamut oqarpoq.
Sakkutuut takussaanerulissasut
Nunanut allanut naalakkersuisut, issittumi sakkutuut sungiusarneri ataavarnerulissasut isumaqatigiissutaannut ilaavoq. Sakkutuut sungiusarneri arlallit ukiuni kingullerni takusagut tassani pineqarput.
- Sungiusarnerit ukiuni kingullerni takusagut ataavarnerusumik ingerlattalernissaat taamaalillunilu aamma issittumi nunarsuarmi pissutsit aallaavigisaannik ineriartornermut patajaatsumik tulluussarnissaq toqqammavilerneqarpoq, Múte Bourup Egede oqarpoq.
USA-p ministerianik immikkut oqaloqateqanngitsoq
USA-p nunanut allanut ministeria, Marco Rubio, ataatsimiinnermut peqataavoq. Taamaakkaluartoq Kalaallit Nunaata, Danmarkip USA-llu akunneranni pissutsit maanna eqqartorneqanngitsut, Naalakkersuisoq oqarpoq.
- Nunat pingasut akornatsinni oqaloqatigiinnigut uani ataatsimiinnermi ingerlanneqanngillat. Taakkua suleqatigiissitami qaffasissumik inuttalersorneqarsimasumi suliaralugit ingerlanneqassasut isumaqatigiissutaanikuummat. Marloqiusamik sulisoqassanngilaq, naalakkersuisoq oqarpoq.
Ruslandip issittumi sakkutooqarnikkut annertusaanera Kinallu soqutiginninnerata alliartornera maanna nukittorsaanissamut peqqutaasut, NATO-mut ilaasortat allapput.
