NATO: Isumaqatigiissut nutaaq ataatsimoorluni isumannaallisaanermik nukittorsaataassaaq

Danmarkip, Kalaallit Nunaata USA-llu isumannaallisaanermut illersornissamullu isumaqatigiissutaat nutaaq ataatsimut isumannaallisaanermik nukittorsaavoq.

Nato-mi generalsekretær Mark Rutte taama allappoq.

- Isumaqatigiissut tamanna – Nato-llu nunap immikkoortuani pingaarutilimmi tamatumani isumannaallisaanermi inissisimaffianik annertusiartortitsinera peqatigalugit – ataatsimut isumannaallisaanermik tamatsinnut siunissami isumannaatsumik aalajaatsuliornermillu nukittorsaataassapput, allappoq.

Nunatsinni marlunngornermi ualisoq ministeriuneq Mette Frederiksen (Soc), naalakkersuisut siulittaasuat Jens-Frederik Nielsen (D) USA-llu præsidentia Donald Trump isumaqatigiissummik atsioqatigiipput.

Tamanna pivoq Donald Trumpip FN-ip ataatsimeersuarnerani oqalugiareernerata kinguninngua, FN-ip allaffeqarfiani.

Isumaqatigiissummi ilaatigut allassimavoq USA Narsarsuarmi Mestersvigimilu illersornissamut nutaamik pilersitsissasoq.

Marlunngornermi atsioqatigiinnerup kingorna isumaqatigiissut siullermik Kalaallit Nunaanni, taavalu Danmarkimi inatsisartuni akuerineqartussanngorpoq, tassanilu inaarutaasumik taasissutigineqassalluni.

Rutte aamma allappoq Issittumi isumannaallisaanerup annertusarneqarnissaa pingaaruteqartoq.

- Aarlerinartut ilisimavavut, Issittumilu Atlantikullu avannaani isumannaallisaanerup annertusarneqarnissaa Europamut Amerikamullu Avannarlermut pingaaruteqarpoq, allappoq.

EU-p præsidentiata, António Costap, Mette Frederiksen aamma Jens-Frederik Nielsen isumaqatigiissuteqarnertik pillugu pilluaqquai.

- Atlantikoq qulaallugu suleqatigiinnermut Issittumilu isumannaatsuunissamut alloriarneruvoq pitsaasoq, nunat namminersortut oqartussaassusiannik ataqqinninnermik, nunap immikkoortuisa ataqatigiinnerannik kalaallillu namminneq aalajangiisinnaatitaanerannik tunngaveqartoq.

EU-p kommissioniata siulittaasuata Ursula von der Leyenip isumaqatigiissut aamma nuannaarutigaa.

- Qaammatip matuma aallartinnerani Kalaallit Nunaannut tikeraarninni erseqqissarneqarpoq nunap pingaaruteqarnera unammilligassarpassuilu, X-imi allappoq.

- EU-p Danmarki, Kalaallit Nunaat nunanilu allani suleqatigisavut qanimut suleqatigiinnassavagut.

Isumaqatigiissut atsiorlugu USA-p præsidentia Donald Trump oqarpoq isumaqatigiissut “inunnik nuannersunik suleqateqarluni ingerlalluarsimasoq”.

- Sivisuumik nuannersumillu suleqatigiinneq ingerlassaaq, Trump isumaqatigiissummik atsioqatigiinnermi oqarpoq.

Ritzau