Natop Issittumi suliassaanut pilersaarusiorneq aallartippoq

Natop illersornissaq pillugu suleqatigiivi Issittumi suliaqarnissamik pilersaarusiorpoq.

Natop oqaaseqartartua Martin O’Donnell AFP-mut marlunngornermi taama oqarpoq.

- Natop nakkutilliinerulernissaanik pilersaarutit aallartinneqarput, taannalu "Arctic Sentry"-mik (Issittumi nakkutilliisut, aaqq.) taaguuserneqarpoq, oqaaseqartartoq oqarpoq.

Illersornissamut ministerip Troels Lund Poulsenip (V) tamanna nuannaarutigalugu X-imi allappoq.

- Natop sakkutooqarnikkut pilersaarutip "Arctic Sentry" aallartinneqarsimanera Natop uppernarsarmagu nuannaarutigaara. Natop Kalaallit Nunaanniinnerunissaa eqqaanilu Danmarkip Kalaallit Nunaatalu sukataarutiginikuuaat.

- Issittumi Atlantikullu avannaani isumannaallisaanerup annertusarneqarnissaa anguniarlugu Natomi suleqativut peqatigalugit ataatsimoorluta iliuuseqarnissarput pingaaruteqarpoq, Troels Lund Poulsen allappoq.

Troels Lund Poulsen ministeriunerlu Mette Frederiksen (S) Danmarkip Nato Kalaallit Nunaanni Issittumilu ataavartumik najuutissasoq kissaatigalugu oqarnikuupput.

Kalaallit Nunaanni naalakkersuisut siulittaasuat Jens-Frederik Nielsen aamma taama kissaateqarpoq.

Kalaallit Nunaannut tunngatillugu maannakkut marloqiusamik pisoqartoq Mette Frederiksenip aamma oqaatigaa.

Ilaatigut Nato Issittumilu sakkutooqarnerup annertusineqarnera, alla Danmarkip Kalaallit Nunaata USA-llu akornanni atorfilittatigut isumaqatigiinniarnerit.

USA-p præsidentiata Donald Trumpip Kalaallit Nunaata USA-mit tiguarneqarnissaanik kimigiisernerata kingorna Kalaallit Nunaat Issittumilu isumannaallisaanissaq sammineqartorujussuanngorput.

/ritzau/