Nittartakkatigut aappassarsiornermut siunnersuutitsialaat arfinillit

Filmeraangatta asannittulersaarutini tiinganeq asanninnilersaarnerlu swipertuarnermit Tinderimilu kinaanermik ilisarititsiniutinit ilisarnanngitsunit allaanerulluinnarsinnaavoq. 

App-it aappassarsiortarfiit allaat inuusuttuni The New York Timesimi allaaserineqartuni ’aappassarsiukatannermik’ pilersitsisinnaavoq.

Tamanna aamma Danmarkimi atuuttoq aappassarsiornermik ilisimatusartoq Malthe Rye Thomsen oqarpoq. Københavnip ilisimatusarfiani antropologitut ph.d.-nngorniartutullu Danmarkimi inuusuttut aappassarsiorfimmik aap-imik atuikatallutillu kipiluttunartorsiortut oqaloqatigisimavai. Taakkuli iluamik atoraanni appit soorlu Tinder, Hinge allalluunniit nuannersumik naapinnermik kinguneqarsinnaapput.

Maani ilisimatusartut ’love doktoriannit’ siunnersuutit arfinillit atuarsinnaavatit, appit aappassarsiortarfiit qanoq iluaqutigisinnaaneritit.

1. Siunertat unneqqarissumik allaguk

Inuit tulluartut takusalerukkit nassuernissat isumaliutigissavat: Inuuninni asasannik nassaarniarpit? Imaluunniit unnukkut kiserliornaveersaatiginiakkannik?

Elisabeth Muth Andersen Attaveqatigiinnermut ingerlatsivimmi lektoriuvoq, Tinderimillu atuisut akornanni attaveqatigiinneq misissuiffigisimavaa. Paasisimavaa aallaqqaammullu unneqqarinneq iluatsitsiffiusartoq.

- Takusinnaavara sooq appi atornerlugu oqaluttuarigaanni arlalitsigut akisoqartartoq – tassalu angutaagaanni, Elisabeth Muth Andersen oqarpoq.

Matumani pimoorussineq arnanullu unneqqarinneq oqariartuutigineqartarpoq, nassuiaavoq. Taava illuatungerisap aamma nalilissavaa tulluarisaq sammiinnarneqassanersoq.

2. Qanoq isikkoqarnerit pillugu piviusorsiorit

Pissutsit piviusut silarsuaani isikkumut tunngasut suliariuminarnerusarput, soqutigeqatigiinneq malugineqarsinnaasarmat, illuatungerisallu kinaassusaa qanorlu ittuunera, Malthe Rye Thomsen nassuiaavoq. Appimili aappassarsiortarfimmi taamaaliortoqarsinnaanngilaq. Matumani isigalugu naapinneq pingaartupilussuuvoq.

- Ilisimatusaatiginerani ima isikkoqarpoq inuit inuiaqatigiinni imaluunniit inuiaqatigiinni nammineq akuuffigisani pinnissutsikkut assiginerusat naapinnissaat iluartitsiffiunerusartoq, oqarpoq.

Tassalu inuit assiginerusat ujartornissaat pitsaanerulluni.

- Taava imaassinnaavoq pitsaanerusumik ilassineqarneq, Poul Poder Københavnip ilisimatusarfiani Sociologisk Institutimi lektoriusoq ullutsinnilu asanninnilersaarnermik nutaaliaasumik ilisimatusartoq isumaqataalluni oqarpoq.

Tigussaasumik naapikkaanni soqutigisat naleqartitallu erseqqissarneqarsinnaapput. Imaannerusarpormi inuit assiginerusavut inooqatigiumanerusarivut.

Malthe Rye Thomsenip matumani takutippaa sunarpiaq ujartorneripput ersarilluinnartumik oqaatigissagipput. Assersuutigalugu ilisimatusarnermi peqataasut ilaannut Crossfitertartumut pingaaruteqarsinnaavoq pineqartoq aamma Crossfitertartoq imaluunniit timigissartarluni.

3. Quianartulersaariaaseq pingaarluinnarsinnaavoq

Tinderimiinneq inooqataanermi aarlerinartorpassuaqarsinnaavoq, illuatungerisamit peerneqarnissaq akinaveersaarnissarluunniit ajornaatsuummat. Matumani quianartulersaarneq qiimmallatsitsisinnaavoq:

- Ajuutiginnittutut pissusilersornissamut aallarniutissaqqippoq, Elisabeth Muth Andersen oqarpoq.

Tulluarsinnaavoq emojit atornissaat imaluunniit pisuusaartitsilaarluni, ilisimatusartoq oqarpoq. Assersuutigineqarsinnaavoq kunngip erniusaarneq imaluunniit kunngip pania imaluunniit allaat nakorsaq napparsimasorlu atorlugit pisuusaarluni.

- Taamaaliornikkut attaveqatigiinneq navianannginnerusinnaavoq, oqarpoq.

Datingappi soorlu Hinge ajornaannerulersitsisimavoq ’promptsit’ akisinnaagaanni, tassalu apeqqutit kinaassutsimik annertunermik takutitsisinnaasut.

4. Naapikkitsi

Siunnersuut pingaarutilik tassaavoq appip attaveqaatitut atornissaa. Asanninnerujussuaq appini pilersinneqarneq ajortoq.

- Arlaanut tulluarsimagaanni ulluni 14-ersuarni allaqatigiittoqassanngilaq. Malugisinnaassavat pineqartoq ilumut naapikkusunnerlugu, Poul Poder oqarpoq.

Taamaattumik siunnersuutigineqarpoq piaakannersumik naapisimaartariaqartoq. Tigussaasumik naapilluni malugineqarnerusinnaavoq ilumut ajuutiginerlugu, attaveqarfiginera malugalugu, oqaloqatigiilluarsinnaanerlugu – allaffigeqatigiinnermut assersuutissagaanni.

Naapeqatigiikkaanni pingaartuuvoq cafémi pisorpaloqalunilu inoqarpallaartumi naapinnginnissaq.

- Iliuuseqaqatigiigitsi tamatigoornerusumik ilisarilerfiusinnaasunik, Poul Roder oqarpoq.

Datingappini peqataasut tamatigut angalaaqatigiittarnerat imaluunniit silami sammisaqartarnerat nalaatsornerinnaanngilaaq.

Ataasinnguartorluni oqaloqatigeerujuuinnaraanni imaakkajuttarpoq suliffigisami inuttulluunniit pitsaanerit eqqartorumasarnerat. Pisuni assigiinngitsuni qisuariarnerit takusinnaagaanni inoqat ilisarineqarnerusinnaavoq – aamma soqutaanngikkaluamik utaqqisuni tunuleriiaattuniitilluni.

- Pinnguaammi paintballimi utaqqigissi aapparisaq naammagittarpa imaluunniit? Imaassinnaavoq isumalioqqaartutit: ’Eqqissisimangaarami’, tassanngaannarli takusinnaallugu kamaqqajaasoq, Poul Poder oqarpoq.

5. Isumaqarluartunik aperigit

Daternermi sukujuit oqaluuserinissaat akilersinnaanngilaq, Poul Poder oqarpoq. Akerlianik isumaqarnerusunik aperisoqartariaqarpoq.

- Imaassinnaavoq aperigit: ’Inooqatiginissat sutigut ajornakusoorsinnaava? Poul Poder oqarpoq.

Itinerusumik oqaloqatigiinnikkut aamma imminut paasineruneq takutinneqarsinnaavoq, aappariinnermilu akisussaaffeqarsinnaalluni. Aapparisaq iliuuserisaminut akisussaaffimmik tigusisinnaanngippat paasineqarsinnaavoq aappariinnissami qanoq pissusilersorsinnaanersoq.

- Aapparisimasartik pisuutippassuk ingasattajaarnerarlugillu, imaakkajuttarpoq namminneq aappaqarnissamut piginnaaneqanngitsut, oqarpoq.

Inuusuttut inersimasut ilaat inuttut misigisartakkatik pillugit itinerusumik oqaloqatigiissinnaapput, allalli isumaqarlutik apeqqutit isumartuut naapeqatigeeqqaarnermi »ingasappallaartut«, ilisimatusarnermi peqataasut pillugit Malthe Rye Thomsen oqarpoq.

Taarsiullugu allat ajornannginnerutittarpaat sammisat soorlu: ’Kingullermik sisorariarnerit qanoq ippa?’ imaluunniit: ’Suut nuannaraagit?’

Taamaattumik oqimaaqatigiinneq ujartorneqartariaqarpoq: Unneqqarilluni sukkavallaamik pimoorussinani – saniatigut illuatungerisaq sunik pisariaqartitsinersoq maluginiarlugu, oqarpoq.

6. Ammasuugit piviusorsiorlutillu

Naapinnermi pitsaanerpaamik misigisaqassaagut piviusumik attavissarsiorutta sammisarlu ilumut soqutigalugu, Elisabeth Muth Andersen oqarpoq. Saniatigut nassuerutigineqartariaqarpoq tulluarisat tamarmik peqatigineqalersinnaanngitsut.

- Ajattorneqarneq annertuumik mamiagineqarsinnaavoq. Akuerineqartariaqarporli aamma nittartakkatigut imminut ilinniarneq tassaasinnaammat isumaqatigiinniarlunilusooq, inuit ilaat piukkunneqaratik, Elisabeth Muth Andersen oqarpoq.

Pingaartuuvorli aamma inoqatip isaannit isigalugit allaanerunerpit paasinissaa, postdoc Siri Christine Kvernmo Næss, Norgemi teknikkimut pinngortitalerinermullu ilisimatusarfimmi (NTNU) nittartakkatigut aappassarsiorneq pillugu ilisimatusarsimasoq ilaliivoq.

Online datingimi taamaallaat immitsinnut saamaffigissanngilagut, allanulli aamma.

- Illuatungerisap ajattorpatit imaluunniit akinaveersaarlutit, imaanngilaq taana inuusoq imminuinnaq eqqarsaatigisoq. Naak akunnermi attaveqatigiinnerugaluartoq suut tamarmik inummut tunnganngillat, Siri Christine Kvernmo Næss oqarpoq.

Nittartakkatigut aappassarsiortarnerup allanngortippaatigut

- Nittartakkatigut aappassarsiorneq imaannaanngissinnaavoq, appit peqqutaallutik asanninnerup silarsuaa imaannaannginnerulersimammat, Siri Christine Kvernmo Næss oqarpoq. Amerlanerit naapinnissaannut periarfissaqalersimavugut. Saniatigulli aamma aarlerinartortaqarsinnaavoq, ilisimaneqanngissinnaasarmat inuk skærmip illuatungaaniittoq tatigineqarsinnaanersoq. Inuusuttullu taama sissuertariaqarnerisigut suut tamarmik pitsaaqqissaarnissaat najoqqutarineqalersimavoq:

- Inuunerminni inissikkaangamik inuuneq tamaat atuuttussaatinneqartarpoq. Taamaattumik iluamik qulakkeerusuttarpaat inuk eqqortuusoq. Imaappoq kukkorusunngillat, Siri Christine Kvernmo Næss oqarpoq.

Taamatut ingerlasariaqarneq ’toqqaanerup naalagaaneranik’ pilersinneqartarpoq, Malthe Rye Thomsen nassuiaavoq. Aappassarsiornissamut periarfissarpassuaqaraangat tassanngaannaq toqqaanissaq tunuarsimaarfigineqalersarpoq, soorlu tamanna ilisimatusaammi peqataasup arnap misigisimagaa:

- Angutitsialammik naapitaqarsinnaagaanni eqqarsaatai sumut tamaanga ingerlalersinnaapput. Tullianimi naapitassaq maannakkut naapitannit quianarneruppat?

Aappassarsiornermi pissutsit imminut assortuuttoq

Aappassarsiornermi pissutsit aamma imminut assortuuttoqarpoq. Naak inuusuttorpassuit iluatsitsinngitsumik swipertuarneq qatsukkaluarlugu arlalissuit appit atortuarpaat. Inuunitsinnummi nutaaliaasumi ilaalersimapput.

- Isumaqarpunga appit aappassarsuirtarfiit atajuassasut, Siri Christine Kvernmo Næss oqarpoq.

Taamatut imminut assortuuttoqarnera ’aappassarsiornermi ingerlariaasianik’ nassuiarneqarsinnaavoq, Malthe Rye Thomsen oqarpoq:

· Inuusuttut appit aappassarsiortarfiit nuannaraat qinigassarpassuaqarmata tulluarisinnaasanillu ujaasineq pissanganarmat.

· Piffissap ingerlanerani misillerfiit amerlisarput. Naapinniagaq ullormi tassani taamaatitsiinnarluni, akinaveersaarneqarluni imaluunniit peqqutissaqanngitsumik tulluarisatut peerneqarluni. Tamanna angutinut pigajuttarpoq naapinnissaq pillugu attaveqatigiileqqaanermi. Arnat tamanna siullermik misigisarpaat qanittumik peqatigeereerluni imaluunniit sapaatit-akunnerini 3-6-ni sammereerluni soqutigineerulluni.

· Appit aappassarsiortarfiit unitsikkallarneqarlutik.

· Appinut uteqqittuaannarlutik

- Unitsiareerlutik uteqqittarput arlaanik annaasaqarsinnaasutut misigiartuleraangamik imaluunniit namminneq oqarnerattut asanninnerup piliaanik taamatut misigisarlutik, Malthe Rye Thomsen oqarpoq.

Allaatut oqaatigalugu inuusuttut asanninnerup annaanissaa ernumagisarpaat – qanorli issava angutaatigiligassartik/arnaatigiligassartik swipernermi tullermiippat?

Nittartakkatigut aappassarsiornerit periarfissai

- Naak nittartakkatigut aappassarsiorneq tusaamanerlugaagaluarluni imaannaanngittortaqarluarpoq. Ilami Siri Christine Kvernmo Næssip Malthe Rye Thomsenillu ilisimatusarnerisa tikkuarpaat nittartakkatigut aappassarsiorneq inuttut ineriartornertut ittumik kinguneqarsinnaasoq.

- Naak nittartakkatigut aappassarsiorneq atuisut siullerpaamik naapeqatigiinnissaminnut imminnut pinngitsaalisariaqaraluarlutik misigisarpaat marlussoriarlutik taamaalioraangamik ajortuinnaasanngitsoq. Oqaluttuartarput inooqataanissamik piginnaasatik piorsartarlugit, Siri Christine Kvernmo Næss oqarpoq.

Aappassarsiornermik misilittagaqarnerujartortillutik aamma ineriartortarput, pissutsillu allatut isiginissaat ilikkartarlugu, oqarpoq. Appip aappassarsiortarfiup atornerisigut nammineq inuunerisaq allatut ittumik isigilersinnaasarpaat, aammali allatut inooriaaseqarnerit inuillu kinaassusaat allatut ittumik takusinnaalersarlugit, immaqa naapissimasussaanngikkaluakkatik.

- Appimik aappassarsiortarfiup pitsaasunik misigisaqarsimasut aamma taakkuupput inunnik assigiinngitsorpassuarnik alapernaaserumallutillu soqutigisaqalersimasut, Malthe Rye Thomsen oqarpoq.

Appip aappassarsiortarfiup teknologi ima aaqqissuunneqarsimavoq sivikitsumik pituttuinngitsumillu peqatigiinnissaq swipernermi suut tamarmik sukkasussaammata.

Pituttuinnginnerusumik atoqateqarnissaq peqateqarnissarluunniit ujartoraanni appit aappassarsiortarfiit pitsaasuusinnaapput, Malthe Rye Thomsen oqarpoq.