Nittartakkatigut inuit attaveqatigiittarfii — inuit koorporpalaatut eqqartuussiviat

Nittartakkatigut inuit attaveqatigiittarfii ukiualuit atorsimanagit maanna uterfigaakka, tusagassiuutit nittartagaanni allaaserisat assigiinngitsut imaluunniit allat tusagassiuutitigut allaaserisat allanik siammarterneqarsimasut, atuartarlugillu oqaaseqarfigisarniarlugit. Tamanna assigiinngitsunik misinnarpoq.

Nittartakkatigut inuit attaveqatigiittarfii ukiualuit matuma siorna naammagilerpakka. Kalaallit Nunaanni Danmarkimilu ukiuni arlalinni politikkerioreerlunga oqaloriaatsimik, pimoorussinermik ataqqeqatigiinnermillu amigaateqarluinnarlunga isumaqarpunga, taamaattumillu Facebookera nittartakkatigullu inuit attaveqaqatigiittarfii allat atorunnaarpakka.

Tamanna pisariaqartilluinnarpara, iluaalliuutikka ikinnerulerput piffissaqarluarnerulerlungalu, oqariartuutit allaaserisallu nittartakkatigut inuit attaveqatigiittarfiini siammarterneqartut eqqarsaatigiunnaarpakka.

Nittartakkatigut inuit attaveqatigiittarfiinik atuisut qanoq pisoqarneranik nakkutiginnillutik nukippassuarnik atuisartut ilisimavara, aamma "eqqartuussisuusarput“ oqallittarfiminnit uteriitsunik piiaasarlutik peersilluinnartarlutilluunniit. Tamanna ajunngilluinnarpoq.

Kigutileriviutinnulli attuumassuteqartumik suliffimmut tunngatillugu oqallitaarfinni peqataasinnaajumallunga Facebookera ammaqqittariaqarpara. Oqallittarfiillu allat misissuataarnissaanut periarfissaqalerama tinguarteqqippunga.

Facebookimi oqaaseqartarfiit assigiinngitsut uterfigaakka, tassa siusinnerusukkut piffissartorfigiunnaarniarlugit aalajangiunnikuusakka.. Tamatumuunali allaaneruvoq. Qinikkatut sulinngilanga, arlaannaannilluunniik aamma illersugassaqanngilanga. Imminut illersornissara eqqaassanngikkaanni.

"Inuiaqatigiit eqqartuussiviannut" ilannguppunga, assigiinngitsorpassuarnik eqqortuunngikkaluartunik allassinnaallunga. Sallu oqarmioralugu pisuutitsillungalu uanga allanneq atugarinngilara, taamaattorli ataqqinnittumik oqallittoqarnissaanik aamma oqaloqatigiittoqarnissaanik nittartakkatigut inuit attaveqatigiittarfianni oqallittoqartarnissaa kissaatigaara.

Tunginniit isigissagaanni, oqallinnerit paasissutissat eqqortut qulequttallu pissutsinut pitsaanerusunut alloriartitsisinnaasut sammineqarsinnaasut isumaqarpunga. "Aaqqissuussaanermiit" peqataatitsisoqarnissaa matumani amigaatigaara.

Assersuuteqariarta.

Tunup avannaani Nunap Qeqqani qillerinermut aatsitassarsiornermullu atortunik ilioraasoqarsimanera sakkortuumik oqallinnermik pilersitsivoq. Naluara kikkut sumut qinnuteqarnersut, aamma naluara Naalakkersuisut tamatumunnga atatillugu qanoq pilersaaruteqarnersut.

Aamma uanga tamanna ilisimaneriga pingaaruteqarpallaanngilaq, kisianni innuttaasut namminneq nunamullu attuumassuteqartunik piaarnerpaamik ilisimasaqalernissaat pingaaruteqarpoq. Nittartakkatigut inuit attaveqatigiittarfiini oqallinneq ingerlaannaq akerleriissutaalerpoq, tassanilu Naalakkersuisut qanoq pisoqarsimaneranik naqqiuteqarnissaat amigaatigaara.

Ilulissani russit ikiortigalugit unioqqutitsilluni umiartortoqarpoq. Taama allattoqarpoq. Tamannalu uannut eqqumiilluinnarmat nammineq – inuinnartut–  oqaaseqarpunga.

Inuit taakkua, qulequtaq pinnagu uannut malersuisut, oqallinnermut akuliupput. Oqartussaniit paasissutissat eqqortut kingumut amigaatiginarsinnaapput, innuttaasut eqqartuussivianiit inuit pisuunngitsut pisuuteqinagit. Suut tamarmik nittartakkatigut inuit attaveqatigiittarfinni maannakkut suliarineqartussaanngillat, kisianni nittartakkatigut inuit attaveqatigiittarfinni ”matulerisoq” sulinngiffeqarsimagunarpoq, taava paasissutissat eqqortut iluaqutigalugit oqallinnermi puullaaqineq annikillisarneqarsinnaavoq. Tamanna iluaqutaasarpoq.

Nittartakkatigut inuit attaveqatigiittarfiini ataatsimoorfivut koorporpalaartutut ’inuit eqqartuussiviattut’ ineriartunnginnissaa anguniarlugu, tamatta immikkut annertuumik akisussaaffeqarlutalu pisussaaffeqarpugut. Oqallilluarisi.