Norge Nuummi sinniisoqarfittaarpoq

Norge nunat issittormiut allat peqatigalugit Issittoq pillugu periusissiamik nutaamik suliaqarpoq, Kalaallit Nunaannilu sinniisoqarfimmik pilersitsilluni.

Norgep ministeriunerata Jonas Gahr Størep oqaatigaa, nunat allat assigalugit Norge siunissami Nuummi sinniisoqalerumaartoq.(Toqqorsivimmit assi)

Assi: Javad Parsa/EPA/Ritzau Scanpix

Ritzau Ritzau

Saqqummersinneqarpoq 19. Juuni 2026 - 10:22

Norge Nuummi sinniisoqarfeqalerniarluni aalajangertoq.

Nutaarsiassaqartitsivik NTB aviisilu VG naapertorlugit Norgemi ministeriuneq Jonas Gahr Støre tusagassiortunik katersortitsinermi taama oqarpoq.

- Kalaallit Nunaanni oqartussaasut suleqatigilluarnerujumallugit aalajangerpugut Nuummi generalkonsulateqalerniarluta, oqarpoq.

Ussassaarut

Jonas Gahr Størep aamma oqaatigaa nunat issittormiut arfineq-marluk Natomit illersornissamut peqatigiit Issittoq pillugu periusissiamik nutaamik suliaqartut, erseqqissarlugulu Kalaallit Nunaanni pissutsit Danmarkimit inuiannillu kalaallinit aqunneqartariaqartut.

Nunat issittormiut Nato-mut ilaasortaasut tassaapput Norge, Danmark, Canada, USA, Sverige, Finland Islandilu. Kalaallit Nunaat Danmarkimi naalagaaffeqatigiinnermut peqataammat, kisartaalluni taaneqarpoq.

Støre naapertorlugu sinniisoqarfimmik pilersitsinikkut, issittoq Norgep soqutigisaani pingaarutilimmik inissisimasoq ersersippaa.

– Kalaallit Nunaat Norgemut qanimut suleqataavoq, Nuummilu generalkonsuleqarfimmik pilersitsinikkut politikkikkut attaveqatigiinneq nunallu immikkoortuani ataatsimoorussamik soqutigisat pillugit suleqatigiinneq nukittorsarniarpavut, ministeriuneq tusagassiuutinut nalunaarummi nangilluni oqarpoq.

Norgemi nunanut allanut ministeri: Tamanna pissusissamisoorpoq

Danmarkimi nunanut allanut ministeri Lars Løkke Rasmussen (M) aamma Kalaallit Nunaanni nunanut allanut tunngasunut Naalakkersuisoq Múte B. Egede sinniisoqarfiup pilersinneqarnissaa pillugu ilisimatinneqarsimasut, Norgep nunanut allanut ministeria Espen Barth Eide oqarpoq

Nunat allat arlallit Kalaallit Nunaanni sinniisoqarfeqalereersimasut, Eidep tikkuarpaa

– Misigisimavunga tamanna Kalaallit Nunaanni Danmarkimilu tigulluarneqangaartoq. Canada, Frankrigi, Island, USA aamma EU Nuummi sinniisoqarfeqarput, taamaattumik pissusissamisoorpoq Norge aamma taamaaliornissaa, Espen B. Eide oqarpoq.

Donald Trump USA-mi januaarimi 2025-mi præsidentinngormalli Kalaallit Nunaat, Issittullu isumannaatsuunissaa ukkatarineqalerpoq.

Danmarkip Kalaallit Nunaanni isumannaallisaanikkut naammattumik aqutsinnginnerarlugu, USA-p Kalaallit Nunaat aquttariaqaraa Trumpip oqaatigisarsimavaa.

/ritzau/