Nukissiorfiit: Uummannaq tamarmi innaallagiaqaqqilerpoq

Nukissiorfiit Uummannami innaallagissamik pilersuineq tamakkiisunngoqqittoq nalunaarutigaat.

Uummannami innaallagissiorfik ataasinngormat ikuallappoq.

Assi: Leiff Josefsen.

Thomas Munk Veirum Thomas Munk Veirum Tusagassiortoq

Saqqummersinneqarpoq 25. Juuni 2026 - 09:00

Nukissiorfiit sulisuisa Uummannaq tamakkerlugu innaallagissamik pilersueqqilernissaq iluatsikkat pingasunngornermi unnukkut nalunaarput.

Innaallagissiorfik ataasinngormat ikuallammat illoqarfiup annersaa innaallagiaaruttoq, maanna tamakkiisumik pilersorneqaqqilerpoq.

Nukissiorfiit suliassaq annertusimasoq, sulisullu illoqarfimmi najugallit, ikiuukkiartorlutik tikisitat kiisalu suleqatigineqartut sulinerisigut iluarsiiniartoqarsimasoq paasissutissiipput.

Ussassaarut

- Uummannamut innaallagissamik tamakkiisumik pilersueqqilerneq nuannaarutigisorujussuuarput. Pilersuineq tamakkiisumik ingerlaqqilereeraluartoq sivikitsumik innaallagiaaruttoqartarsinnaassaaq, atortulli innaallagissamik pilersuissutaasut nakkutigeqqissaarneqarput, nalimmassarneqarlutik inississoqqissaarneqarlutillu pilersuinerup patajaatsumik ingerlaqqilernissaa anguniarlugu, Nukissiorfiit allapput.

Uummannami innuttaasut naammagittarnerat, paasinninnerat tapersersuinerallu Nukissiorfiit qujassuteqarfigaat. Aamma Nukissiorfinni sulisut suleqatigineqartullu unnuaarullutik innaallagissamik pilersueqqilernissaq naammassiniarlugu sulerujussuarnerat immikkut ittumik aamma qujassuteqarfigineqarpoq.