Nuna annertuumik sajoreertorlu Japan  tassaarsuaqarsinnaaneranik mianersoqqusivoq 

Aarlerinartoqarpoq japanip avannamut kangiani sineriaa tassaarsuup 3 meterit tikillugit portutigisumik malissuartallip Japanip avannamut kangimut sineriaanut ataasinngornermi apuussinnaanissaa pillugu.

Taama nalunaaruteqarpoq japanip silaannarmik nalunaarsuiffia.

Nunap sajunnera 7,6-imik sakkortussuseqarsimavoq.

Nunap sajunnera  50 kilometerinik itissusilimmi 80 kilometerillu sineriaanit ungasissusilimmi pisimavoq, nalunaarsuiffik nalunaarpoq.

Tassaarsuaqarsinnaaneranik aarlerisaarut  sumiiffinnut Hokkaidomut, Aomorimut aamma Iwatemut atuuppoq.

Hokkaido tassaavoq japanip qeqertaasa annerpaat tulliat taannalu avannarpasissumi inissisimavoq. Sumiiffiit sinneri marluk Japanip qeqertaasa annersaata Honshup avannaaniipput.

Sumiiffinni najugaqartut kaammattorneqarnikuupput qimaguteqqullugit.

Nunap sajunnera pivoq nal. 23.15 sumiiffimmi piffissaq malillugu - 15.15 danskit nalunaaqutaat malillugu.

Japanimi unnuap qeqqanngitsiarnerani takuneqarsimapput qarsutsinerit 40 centimeterinik portutigisut illoqarfimmi umiarsualivimmi urakawami hokkaidomi.

Japan tassaavoq nunarsuarmi nunap sajunneranik nalaataqarnerpaasartut ilaat, tassani 5 minutsit ingerlaneranni minnerpaamik ataasiarluni nuna sajuttarpoq.

Taamatuttaaq nunarsuarmi nunap sajuttarnerata 20 procentiisa missaat 6,0-imik sakkortussusillit naalagaaffimmi Asiap kangianiittumi tassani pisarput.

/ritzau/Reuters