Nunatta Eqqartuussisuuneqarfia allannguinngitsoq: Imarsiornermik Ilinniarfimmi pisortap ilinniartoq pinngitsaalivaa

Niels Lorentzen kujanninngikkaluarluni allatigut pinngitsaaliisimasutut Nunatta Eqqartuussisuuneqarfiani pisuutinneqaqqammerpoq. Arnaq ilinniartoq 20-t sinnerlugit ukiulik 2024-mi upernaakkut allaffimmini pinngitsaalivaa.

Lorentzen Imarsiornermik Ilisimatusarfiup ataaniittumi Paamiuni taamani pisortatut atorfeqarpoq, ilinniartut inaanni nakkutillisuullunilu ilinniartunut aqqutissiuussisuuvoq.

Eqqartuussisoqarfik Sermersuumi 2025-mi novembarip 25-ani siullermik pineqaatissinneqarpoq, suliallu ingerlanerani pisuunnginnerarluni. Eqqartuussutip suliareqqitassanngortinnera aamma taamatut inerneqarpoq, tassa pinngitsaaliisimasutut pisuutinneqarluni ukiup affaani pineqaatissinneqarsimasunut inissiisarfimmiittussanngortinneqarpoq.

AAMMA ATUARUK

Arnaq meerarsiaminut piffissami sivisuumi nakuusertarsimasutut eqqartuunneqartoq

Nunatta Eqqartuussisuuneqarfiani 2026-mi apriilip 17-iani suliaq aalajangiiffigineqarmat Sermitsiamit peqataasoqarsinnaanngilaq. Suliallu allaaserinissaanut eqqartuussutip allaganngorlugu saqqummiunneqarnissaa utaqqeqqaarnikuullugu.

Lorentzenip arnallu nassuiaataat assigiissuteqarput. Arnaq atuanngitsoortarnini pillugu oqaloqatiginnikkiartorluni allaffimmukarpoq. Eqipput, tamatumalu kingorna Lorentzenip arnaq attuualerpaa.

Kinali aallartissimanersoq pillugu nassuiaatit assigiinngillat. Taamaattoq arnaq inuusuttoq attuuaneqarnissaminut akuersisimanngitsoq Nunatta Eqqartuussisuuneqarfiani aalajangerneqarpoq.

Qaffasissumik atuuffeqarnera maluginiarneqartoq

Lorentzenip arnamiit qaffasinnerusumik atuuffeqarnera Nunatta Eqqartuussisuuneqarfiani isiginiarneqarpoq. Taanna ilinniarfimmi pisortaavoq, arnallu atuannginnikuunini arlaatigut kinguneqartinneqarsinnaasoq pillugu saaffiginnilluni. Aamma angutip ukiui soraarninngornissamut qallisut arnallu 20-t sinnilaarlugit ukioqarnera isiginiarneqarput.

Nunatta Eqqartuussisuuneqarfiata eqqartuussut pillugu ima allappoq:

- Pissutsit taamaatsillugit unnerluutigineqartup pinerlineqartup taama pineqarnissani akuerineraa qulakkeeqqaarsimasussaagaluarpaa.

- Uppernarsaatit saqqummiunneqartut aallaavigalugit unnerluutigineqartup pinerlineqartup kinguaassiuutitigut attualaarneqarnini qanoq igineranut isummernissaanut periarfisseqqaarsimanngilaa. Unnerluutigineqartup pisut ingerlatiinnarlugit pinerlineqartup unitsitsinissaanut akisussaaffik tunniuppaa.

Niels Lorentzenip 2024-mi maajip 24-ani pisup kinguninngua politiinut nalunaaruteqartoqarsimanera paasigamiu ilinniarfimmi atorfiminit soraarpoq. KNAPK-mi siulittaasup tulliatut 2024-mi juulimi qinigaavoq, 2025-mili tunuarluni.

Allaaserisap suliarineqarnerani Sermitsiap Niels Lorentzen oqaaseqartissallugu saaffigaa, taassumalli periarfissaatillugu uterfigisimanngilaatigut.

Sermitsiap eqqartuunneqartut aqqi nalinginnaasumik saqqummiunneq ajoraluarpai. Eqqartuunneqartorli inuiaqatigiinni pingaarutilimmik inissisimaffeqartillugu taamaliortarluni.