Nunatta Eqqartuussisuuneqarfia eqqartuussummik attassivoq: 42-nik ukiulik Blok 5-imi toqutsisuuvoq

Blok 5-imi 2024-mi oktobarip aallartinnerani toqutsisoqarneranut tunngatillugu suliarujussuaq Nunatta Eqqartuussisuuneqarfiani pingasunngornermi aalajangiiffigineqarpoq. Eqqartuussisoqarfimmi apriilimi pineqaatissiineq allanngortinneqanngilaq.

Angut 42-nik ukiulik angummut 20-nik ukiulimmut Nuummi Blok 5-ip pequusiviani toqutsisimasutut pisuutinneqarluni eqqartuunneqaqqippoq. Angut 42-nik ukiulik pisumi pinngitsuunerarluni eqqartuussinerup ingerlanerani nipaarluuvoq.

Blok 5-imi toqutsineq 2024-mi oktobarip aallartinnerani pivoq. Angut maanna eqqartuussaasoq toqutaasorlu Nuummi angerlarsimaffeqanngitsutut atugarliorlutik inuupput.

Angut inuusuttoq niaqqumigut sakkortuumik anaaneqarnini toqqutigaa, qularnanngitsumik ujaqqamik pinerluffiusumi nassaarineqartumik.

Toqutsisoqarnerata nalaani takunnittoqanngilaq, kisianni DNA-p inuaallu ipai naqqup ataani nassaarineqartut 42-nik ukiuliminngaanneersuusut takussutissaqarput. Suliami misissuisoqaqqaarnerani taakku nassaarineqareermata eqqartuunneqartup toqutsisuusimasinnaanera pasitsaanneqarnikuuvoq.

Politiit angut pillugu paasissutissanik pisariaqartunik peqareerput, taannami toqutsisimasutut toqungasullu timaannik assuarnartuliorsimasutut siornatigut eqqartuunneqarnikuuvoq. Pineqaatissinneqarnikuunerminiit iperagaareerluni ukioq ataaseq qaammatialuillu qaangiuttut blok 5-imi pisoq pivoq.

Tarnikkut nappaatilinnut inissiisarfimmittussanngortinneqartoq

AAMMA ATUARUK

Blok 5-imi suliamut atatillugu angummut allamut unnerluussineq atorunnaarsinneqartoq

Angutip allap suliami pasineqarnikuugaluartup ilisimannittutut qaaqquneqarnera, Nunatta Eqqartuussisuuneqarfiani suliarineqarnerani nutaartaavoq pingaarutilik. Taamaalilluni suliami paasissutissanik nutaanik pissarsisoqarpoq. Ilisimannittutulli nassuiaataa eqqartuussummut allannguinngilaq.

Angut 42-nik ukiulik eqqarsartaatsimigut nappaateqarnini pissutigalugu parnaarussivimmut nalinginnaasumut inissinneqarsinnaanngilaq. Taamaattumik Danmarkimi tarnikkut nappaatillit napparsimmavimmiittussanngorlugu eqqartuunneqarpoq. Suliap eqqartuussisuuneqarfimmi Nunattalu Eqqartuussisuuneqarfiani ingerlanerani tassani aamma najugaqarpoq.

Angut skizofreneqartutut nakorsat nalilipput. Taanna peqatigiilluni ajortumeerniarneqarsoraaq inuillu piviusuunngitsut nipituumik oqaluussinnaasarlugit, nakorsat oqaaseqaataat eqqartuussinerup ingerlanerani pingasunngornermi atuarneqarpoq.

Angut piffissaligaanngitsumik paarisassanngortinneqarpoq. Taannali pitsanngoriaateqartutut nalilerneqaruni inuiaqatigiinnut akuleruteqqissinnaanera periarfissaavoq. Eqqartuussivimmili suliarineqaqqeqqaarluni aalajangiiffigineqaqqaassaaq.