Nunatta Eqqartuussisuuneqarfianut suliassanngorteqqitaq, angummut 32-nik ukiulimmut nakuusersimasutut eqqartuunneqartumut aalajangiiffiusoq, ataasinngormat ualikkut suliarineqarpoq.
Angut Nuussuarmi oktobarip 31-ani savimmik kapisinikuummat Eqqartuussisoqarfik Sermersuumi killiligaanngitsunik pineqaatissinneqarsimasunut inissiisarfimmiittussanngorlugu pineqaatissinneqarpoq. Killiligaanngitsumilli pineqaatissinneqarnera Nunatta Eqqartuussisuuneqarfiani ataasinngormat allanngortinneqarluni, pineqartoq qaammatini arfinilinni pineqaatissinneqarsimasunut inissiisarfimiittussaanngortinneqarpoq.
Nunatta Eqqartuussisuuneqarfianut suliassanngorteqqitaq, angummut 32-nik ukiulimmut nakuusersimasutut eqqartuunneqartumut aalajangiiffiusoq, ataasinngormat ualikkut suliarineqarpoq.
Angut Nuussuarmi oktobarip 31-ani savimmik kapisinikuummat Eqqartuussisoqarfik Sermersuumi killiligaanngitsunik pineqaatissinneqarsimasunut inissiisarfimmiittussanngorlugu pineqaatissinneqarpoq. Killiligaanngitsumilli pineqaatissinneqarnera Nunatta Eqqartuussisuuneqarfiani ataasinngormat allanngortinneqarluni, pineqartoq qaammatini arfinilinni pineqaatissinneqarsimasunut inissiisarfimiittussaanngortinneqarpoq.
Angut taanna ukiup aappaa avillugu pineqaatissinneqarsimasunut inissiisarfimmeereernikuummat eqqartuussut naammassereeramiuk ingerlaannaq iperagaavoq.
Angut angummut allamut savimmik kapisisimasutut Eqqartuussisoqarfik Sermersuumi pisuutinneqarluni killiligaanngitsumik pineqaatissinneqarsimasunut inissiisarfimmiittussanngortinneqarpoq. Tamanna Nuussuarmi Pub Nuanip silataani juunip 30-ani 2024-mi pivoq.
Angut eqqartuussisoqarfimmi pinngitsuunerarpoq, pisuunnginnerarnerminullu tunngasoq Nunatta Eqqartuussisuuneqarfiani suliareqqitassanngortinnagu. Taamaammat pineqaatissiissut pisumut naleqquttoq Nunatta Eqqartuussisuuneqarfiani taamaallaat aalajangiiffigineqartussalluni.
32-nik ukiullip eqqarsartaasaa pillugu tarnip nakorsaata allagaqaataa unnerluussisup saqqummiuppaa. Unnerluussisup Andrias Kjølbrop illersuisullu Naja Joelsenip Nakorsat eqqartuussinermi siunersiorneqartartut oqaaseqaataat aalajangersimasoq eqqartuussinermi qanoq sunniuteqartigissanersoq isumaqatigiinngissutigaat.
- Inatsisit naapertorlugit killiligaanngitsumik pineqaatissinneqarsimasunut inissiisarfimmiittussassanngortitsissagaanni ajornerujussuarmik pisoqaqqaarsimasussaavoq, Naja Joelsen erseqqissaavoq.
Nakuuserneq eqqumiitsoq
Angutip 32-nik ukiullip arlaleriarluni nakuusertarsimanera, ilaatigut Maniitsumi, unnerluussisup aamma maluginiarpaa.
Angut nakuuserfigisaminut qimissisarsivoq kimmaallunilu. Inuit arlallit kiinaasigut, iviangiisigut, assaasigut isigaasigullu kimmarnikuusimavai.
- Nakuuserneruvoq eqqumiitsoq, unnerluussisoq oqarpoq.
Saassussinerit ilaat toqutseriarsimasutut 2016-imi pineqaatissiissutaavoq. Nuussuarmi 2024-mi pisimasumi toqutseriaraluarsimasutut eqqartuunneqarnera aallarteqqaaraluarpoq, angulli nakuusersimasutut unnerluutigineqarlunilu pineqaatissinneqarpoq.
Naggataatigullu nakuusernermut nalinginnaasumiit sakkortunerusumik pineqaatissinneqarpoq:
- Eqqartuussisoqatigiit tamarmik isumaqatigiillutik, Nakorsat eqqartuussinermi siunersiorneqartartut naliliinerat apeqqutaatinnagu, killiligaanngitsumik pineqaatissiinissamut suliami matumani tunngavissaqanngitsoq aalajangerpaat, eqqartuussisoq oqarpoq.
Angutip pinerluutaa pineqaatissinneqarsimasunut inissiisarfimmiittussanngortinneqarnissaanut ukiumit ataatsimit sivisunerussanngitsoq illersuisoq isumaqarpoq.
Unnerluussisussaatitaasup angut aallaqqaammut toqutseriaraluarsimasutut nalilermagu killiligaanngitsumik pineqaatissinneqarsimasoq illersuisoq isumaqarpoq. Tamanna ilumuunngitsoq, unnerluussisoq akivoq.
Angut 32-nik ukiulik savimmik kapisaminut 18.000 koruuninik aamma akiliisussanngortinneqarpoq.
Aammattaaq pinerluttoq aningaasassaqarsinnaavoq, tassami inaarutaasumik pineqaatissiissummit sivunerusumik pineqaatissinneqarsimasunut inissiisarfimmiinnikuuvoq.
