Nunatta karsia 100 millionit sinnerlugit amigartoortoq
Nunatta karsiata 2025-mut naatsorsuutai saqqummerput. Karsip aningaasat tigoriaannaatai suli ikiliartorput. Amigartooruteqarneq naatsorsuutigisamit annikinnerulaartoq, naalakkersuisup ilisimatitsissutigaa. Taamaattoq Naalakkersuisup nunap aningaasaqarnera ernumagaa.
- Utoqqaat amerliartornerat inuussutissarsiortullu ikiliartornerat malunnarsivoq, Aqqaluaq B. Egede oqarpoq.
Assi: Oscar Scott Carl
Nunatta karsia siorna qanoq aqunneqarpa? Tamanna maanna saqqummerpoq. Aningaasaqarnermut Naalakkersuisup, Aqqaluaq B. Egedep (IA), nunatta karsiata naatsorsuutai, Inatsisartunut sisamanngornermi saqqummiuppai.
Nunatta karsia ingerlatsinermi sanaartornermilu siorna 109 millionit koruuninik amigartoorpoq. Amigartoornerunissaq missingersuutaagaluarpoq. Angusarli amigartoorfiugaluartoq missingersuutaasumit 25 millionit koruuninik pitsaaneruvoq.
Nunap karsia 257 millionit koruuninik 2024-imi aamma amigartoorpoq.
Ukiut marluk tulleriisiinnarlugit amigartoorneq aningaasaqarnerup ernumanarsineranik ersersitsisoq partiit oqaaseqartui arlallit oqarput. Aningaasaqarnermullumi Naalakkersuisumit aamma ernummatigineqarpoq.
- Killiffik ernumanarsisoq oqaatigineqarpoq, taakkua isumaqatigaakka. Taamaattumik aaqqissuusseqqittariaqarpugut, Aqqaluaq B. Egede oqarpoq.
Kukkunersiuisut attuumassuteqanngitsut, BDO-meersut, naatsorsuutit annerusumik uparuarnagit akuerigaat naatsorsuutini atuarneqarsinnaavoq.
Akiliisinnaassusikilliartortoq
Naak nunatta karsiata 2025-imi 2024-imit amigartoorutai ikinnerugaluartut aningaasat tigoriaannaat ikinnerulerput. Aningaasat tigoriaannaat ikinnerpaamik 700-800 millionit missaanniinnissaat tamatigut anguniarneqartarpoq. Taakkuali affaannaat maanna uninngasuutaapput.
Aningaasat tigoriaannaat 2024-imi 695 millionit koruuniusut maanna 433 millionit koruuniinnanngorput.
Nunap karsiata ukiuni kingullerni aningaasarliornera qineqqusaarutinik neriorsuutinillu allanik piviusunngortitsisoqarsinnaajunnaaneranik malitseqartoq Naalakkersuisoq erseqqissaavoq.
- Oqallinneq takussutissiivoq neriorsuuterpassuit tamaasa aningaasassaqartinngikkigut. Utoqqaat amerliartornerat inuussutissarsiortullu ikiliartornerat malunnarsivoq, Aqqaluaq B. Egede oqarpoq.
Suliaq Kukkunersiuinermut Ataatsimiititaliamut aappassaaneerneqatigani suliarineqartussanngortinneqarpoq. Suliaq ukiaru aappassaaneerneqassaaq.
