Nuuk Centerip kiileriani biilinut innaallagissiutit atorunnaarsinneqartut

Nuuk Centerip kiileriani biilinut innaallagissiutit matuneqassasut, tamannalu piginnittut aalajangigaat, Nukissiorfiit nalunaarput.

Tamanna Nuuk Centerip siulersuisuini siulittaasup uppernarsarpaa:

AAMMA ATUAKKIT

Biilinut umiatsianullu saqqummersitsiviit piffissarissaraat

– Ikuallattoqartillugu isumannaallisaanissaq eqqarsaatigalugu taamaaliorpugut. Ilaatigut ernummatigaarput kiilerimi ikuallattoqarnerata kingunerisaanik, pisiniarfissuaq piffissami sivisuumi matusariaqarsinnaanera. Kiilerimilu biilinut innaallagissiuteqarneq sillimmasiisarfitsinnut aamma akisutitsivoq, Stefen Ittu Hviid oqarpoq.

Qujanartumik biilit innaallagissiutinut ikkusimasut ikuallannissaat qaqutigoortorujussuuvoq. Taamatulli pisoqarpat batterimit ikuallattumit silaannaq ulorianartoq aniasinnaasarpoq. Pisiniarfissuarmilu taamatut ikuallattoqalissagaluarpat, biilit kiilerimiit peernissaanut atortut eqqortut pigineqanngillat.

- Taamaattumik silami biilinut innaallagissiuteqarnissaanik piginnittut isumaqatigiillutik aalajangernerat isumaqatigaara, siulersuisuni siulittaasoq oqarpoq.

Pilersaarut malillugu biilinut innaallagissiutit sisamanngorpat juulip 31-ani 2026-mi atorunnaarsinneqassasut, Nukissiorfiit ilisimatitsipput.