Nuummi anorlerneranit sarfaaruttoortoqartoq - Atortut sarfatortut pisariaqanngitsut attaveeqquneqarput

Nuummi innuttaasut arlallit tamat attaveqatigiiffianni allapput Nuuk sarfaaruttoq. Imermik pilersuineq aamma kipisimavoq.

Innaallagiamik pilersuineq nal. 22.30 missaani kipineqarpoq.

Nukissiorfiit nalunaarput iluarsiiniarluni sulisoqartoq.

- Ajutoortoqarnera peqqutaalluni kallerup inneranik qamittoorneq pivoq. Nukissiorfiit innaallagissamik pilersuineq nødgenerator atorlugu innaallagiaq ikeqqinnissaa sulissutigaa, Nukissiorfiit ilisimatitsipput.

Kalaallit Nunaanni Politiit ilisimatitsipput politiit oqarasuaataat sianerfissaq innaallagiaarunnermi attaveerussimasinnaasoq:

- Nuummi sarfaaruppoq, politiit oqarasuaataannut attaveqarneq akornuserneqarsinnaavoq. Innuttaasut uunga saaffiginnissinnaapput 56 01 12.

- Innaallagiaaruttoqarnerani mobilit attaveerussappata pisariaqartitsinermi politiinut ornigulluni saaffiginnittoqarsinnaavoq, Kalaallit Nunaanni Politiit Facebookimi quppernerminni allapput.

Ulapungaarsimasut sulillutik aallartipput

Oqartussat assersuutigalugu piffissami sivisuumi sarfaaruttoornermi ullunut tallimanut sillimasinnaanissamut innersuussutinik oqartussat pingasunngormat saqqummiussaqarput.

AAMMA ATUARUK

Naalakkersuisut ajornartoornermi ilitsersuut saqqummiuppaat: Innuttaasut ulluni tallimani imminut napatissinnaasariaqarput

Kommuneqarfik Sermersooq facebookimini allappoq oqartussani upalungaarsimasut maanna suliaqartut:

- Nuuk tamarmi qamittooqqavoq, Nukissiorfiit innaallagissamik pilersuineq maanna aallarteqqissallugu sulissutigaat. Qamittooorneq ajutoortoqarneranik peqqutaatinneqarpoq. Innuttaasut qinnuigissavagut eqqissisimaqqullugit, oqartussallu malinnaavigeqqullugit. Kommune paasissutisseeqqikkumaarpoq nutaamik pisoqaqqippat, kommuni allappoq.

Anorlerujussuarnerani ajutoortoqartoq

Nukissiorfiit nal. 00.00 nalunaarput Utoqqarmiut Kangerluarsunnguani anorip sakkortuneranit ajutoortoqartoq: 

- Utoqqarmiut Kangerluarsunnguani anorlingaatsianera pissutaalluni innaallagissamik pilersuineq unikkallarpoq. Pisoq kangerluit ikaarfianiinngilaq. Illoqarfiullu saffaqaqqilernissaanut suliaqarpugut, Nukissiorfiit allapput.

Nutaamik nalunaaruteqartoqaqqissaaq nal. 00.30.

Nal. 00.40 nutarterneqarpoq

Nukissiorfiit ilisimatitsipput imermik pilersuineq aamma kipisaqattaartoq. Ilanngullugu innuttaasut kaammattorneqarput atortorissaarutit innaallagiatortut attaveerneqassasut:

- Erngup nukissiorfianik innaallagissiorneq unikkallaqqippoq. Sakkortuunik anorlerunnaarnissaata tungaanut, sarfamik pilersuineq innaallagissiorfiimmit sillimmataasumit ingerlanneqarallassaaq. Atortunik pisariaqanngitsunik sarfamik atuisunik ikumatitsinngikkallarneq iluaqutigissavarput. Nerisassiornermi uunnaaviit sarfamik atuisut ikumatissimagukkit, qaminnissaat eqqaamajuk, pilersuineq aallarteqqippat ikinnginniassammata, Nukissiorfiit allapput.

Sermitsiami tusagassiortutta Birgitte Keldsenip inuiattut erfalasorput filmiliarileruttoraa innaallagiaarunneq pivoq. Video takuuk: