Nuummi timmisartumik angallannermik aqutsisoqalernissamik isumaqatigiissut atsiorneqarpoq
Nuummi timmisartunik angallannermik aqutsisoqalernissaq Greenland Airportsimit Naviair-imillu atsioqatigiissutigineqarpoq. Suliffeqarfiit pingasunngornermi uppernarsarpaat.
Nuup mittarfianut timmisartut akunnermut marluinnaat missinnaanngortillugit maanna killilersuisoqarpoq. Timmisartumik angallannermik aqutsisoqalernikkut tamanna allanngortinneqartussanngorpoq.
Assi: Oscar Scott Carl
Ilimasaarutigineqareerpoq, maannalu atsiorneqarluni: Nuummi mittarfimmi timmisartumik angallannermik aqutsisoqalissaaq, Naviair-ilu taakkuninnga isumaginnittuussalluni.
– Isumaqatigiissut siunissamut aningaasaliineruvoq. Timmisartunik angallannermik aqutsisoqalernissaq Nuup mittarfiani ineriartornermut pitsaassutsimullu sunniuteqarluartumik tunngaviliissaaq. Naviair-imi piginnaasat qularinngilagut, suleqatigiilluarnissarpullu qilanaaraarput, Greenland Airportsimi pisortaaneq Jens Lauridsen oqarpoq.
Isumaqatigiissut TMA-mik taaneqartartoq, tassa timmisartumik aqangallannermik aqutsineq marloqiusaasoq, isumaqatigiissutigineqarpoq. Tassani timmisartunik angallannermik aqutsisup timmisartup qutsissusaanut aalajangersimasut tungaanut aqutsissaaq, kingorna Nuummi AFIS-it nangittassallugu. AFIS-it timmisartunik aqutsisinnaanngillat, timmisartortartumulli paasissutissiisartuullutik.
Maajimiit atuutilersinneqassaaq
Aaqqiissut nutaaq 2026-mi maajimi atuutilernissaa naatsorsuutigineqarpoq, angallannermullu aqutsisoqarfiup septembarimi timmisartuussisinnaanermut killilersuinera atorunnaarsinneqassalluni, Greenland Airports allappoq.
Timmisartumik angallannermik aqutsisoqarneq isumannaallisaanermut ajoqutaanngitsumik timmisartut amerlanerusunik tikittoqarsinnaalernissaanut iluaqutaangaarsinnaavoq.
Naviair, naalagaaffimmit pigineqartoq, Kalaallit Nunaata silaannartaani timmisartuussinermik misilittagaqarluarpoq Danmarkimilu mittarfinni anginerusuni timmisartuussinermik aqutsinermik suliaqareerluni.
– Nuup mittarfiani siunissami angallannermik ingerlatsinermut suleqataasinnaanerput nuannaarutigeqaarput, tamannalu silaannakkut angallassinermik atuisunut inuiaqatigiinnullu iluaqutaassaaq. Naviair ukiorpassuarni Kalaallit Nunaanni silaannakkut angallannermik sullissisimavoq, Greenland Airportsimillu suleqateqarnerup ingerlateqqinnissaanut ineriartortinnissaanullu qilanaaqaagut, Naviairimi pisortaaneq Anders Rex oqarpoq.
Aningaasat qanoq amerlatigisut pineqarnersut imaluunniit aaqqiissutissaq qanoq aningaasalersorneqassanersoq, pingasunngornermi nalunaarummi paasissutissiissutigineqanngilaq.
