Nuummut Nuummiillu sisamanngorpat timmisartuussinissat taamaatiinnarneqartut

Anorersuarnissaa aarlerisaarutigineqarmat sisamanngornermi timmisartuussinissat taamaatiinnarneqarput.

DMI-p Ikersuarmi Davisimi anorlernissaanik ilimasaaruteqarnera, Nuummik sinerissamilu illoqarfinnik arlalinnik eqquissasoq, Air Greenlandip nittartagaani ilisimatitsissutigineqarpoq.

- Taamaammat Nuummiit Nuummullu sisamanngorpat novembarip 13-iani angalasussat taammaatiinnartariaqarpagut, Air Greenland allappoq.

Angalasussat allamut inissinnissaat Air Greenlandimiit sulissutigineqarpoq, angalanissamullu pilersaarutit nutaat ullumi nalunaaqutaq sisamanngortinnagu nassiunneqassallutik.

DMI-p Nuummi silassamik ilimasaarutaa naapertorlugu sisamanngornermi anori sekundimut 20 meterit angusarsinnaavai, sakkortunerpaaffianilu sekundimut 29 meterit anguneqarsinnaasassallutik.

Angalasut Air Greenlandip nittartagaani paasisaqarnerusinnaapput.