Nuup puttasuani ikuallattoq: Angallatit pingasut ajoqusertut – politiit takunnittussarsiorput

OBS: Politiit pigaartuisa pisortaannit paasissutissat nutaat pissarsiarineqarmata allaaserisaq nutarterneqarpoq.

Nuummi umiarsualiviup eqqaanit tallimanngornermi ullaakkut pujuliortoqalerpoq.

Umiatsiaaraq ataaseq arlallilluunniit ikuallassimanissaat ilimagineqarpoq. Nittartakkatigut inuit attaveqaqatigiittarfiini ikuallannerup, umiatsiaq ikuallattoq assilineqarsimasoq takuneqarsinnaavoq.

Ikuallanneq annertuumik pujuliortitsivoq nalunaaquttali 07.30 missaani qaminneqareerpoq.

Sermitsiap tusagassiortua oqaluttuarpoq umiatsiaq ataaseq marlunnilluunniit ikuallannermik eqqugaasut.

Qatserisartut biilii marluk sumiiffimmiipput, sulilu qatserisoqarpoq.

Nutarterneqarpoq: Politiit takunnissimasinnaasunik ujaasipput

Kalaallit Nunaanni Politiini pigaartut pisortaat, Aputsiaq Hansen, oqaluttuarpoq ikuallattoqarneranik politiit tallimanngornermi nal. 06.47 nalunaarfigineqarsimasut.

Politiit sumiiffimmukaramik paasivaat umiatsiaaraq ikuallattoq.

Umiatsiaaqqami ikuallattoqarnerani angallatit qanittuaniittut aamma ikuallalerput, ikuallanneq siaruaatsiterluni. Ikuallannerli qatserisunit qamilertorneqarpoq. Aputsiaq Hansen oqaluttuarpoq angallatit sisamat ajoqusersimasut.

Ilanngullugu oqaluttuarpoq suliamut tunngatillugu politiit takunnissimasinnaasunik oqaloqateqarusuttut:

– Sumiiffimmi pasinarsinnaasunik takunnittoqarsimanersoq maluginiagaqartoqarsimanersorluunniit paaserusupparput. Suliamut tunngatillugu arlaannik ilisimasaqaraanni politiini pigaartunut 70 14 48-mut sianertoqarsinnaavoq, pigaartut pisortaat oqarpoq.

Ikuallanneq qanoq aallartissimanersoq politiit suli ilisimanngilaat, suliamilu maanna paasiniaapput.

Inunnik ajoqusertoqarsimasinnaaneranik nalunaaruteqartoqarsimanngilaq.