Oqallinnermi kalaallit uummarissaaqataasut

Kalaallit Danmarkimiittut Danmarkimi politikikkut oqallinnernut akuliunnerusariaqarput. Aalborgimi Kalaallit Illuutaannit aviisi Politiken suleqatigalugu suliniummi tamanna anguniarneqarpoq.

- Piffissami kingullermi Kalaallit Nunaat pillugu sakkortuumik oqallittoqarnera eqqarsaatigalugu, isumaqaratta oqallinneq siamasinnerusariaqartoq, taamaalilluni kalaallit amerlanerusut peqataasinnaaniassammata, Aalborgimi Kalaallit Illuutaanni pisortaq Jeppe Bülow Sørensen oqarpoq. 

- Inuit tusagassiuutitigut takusartakkavut amerlanertigut taakkuinnaanerusarput - tamakku pikkorissuullutillu suliaminnik ilisimasaqarluartuusarput, taamaattorli kalaallit nalinginnaasut tusagassiuutini tusagaqarfiginissaat maqaasisarparput. Tamanna iliuuseqarfiginiarlugu Politikenimit neqeroorfigineqaratta iliuuseqarniarluta aalajangerpugut. 

Oqallinnernik aqutsisuusartut misilittagaqarluartut

Aviisimi Politikenimi oqallittarnernut aaqqissuisuusartut Susan Knorrenborg Kenneth Lundilu atuartartut allagaannik oqallinnernullu ilanngutassianik sunniuteqarluartussanik allaaserinnittarneq ilinniartitsissutigaat.

Politikenimi oqallinnermut aaqqissuisut marluk, Susan Knorrenborg aamma Kenneth Lund, pikkorissartitsisuupput. Taakkua peqataasut allattariarsornermut sunniuteqarsinnaanerminnillu aviisimi atuartartutut allannissaannik oqallinnernilu qanoq allattoqarsinnaaneranik ilinniartippaat. Aamma oqallinnernut peqataanissamut qunusarnerup qanoq qaangerneqarsinnaaneranik iliuusissaminnik siunnersorneqarlutik.

Pikkorissartinneqartut unnuit pikkorissarfiusut akornanni atuartartutut allakkatik pillugit isornartorsiorneqartarlutillu nersualaarneqartarput – pikkorissarnerullu kingorna atuartartutut allagaat immaqa Politikenimi ilanngunneqarsinnaassapput.

Pikkorissarnerup taaguutigaa 'Hørups Talenter' Politikenimik tunngaviliisoq aaqqissuisuusorlu siulleq Viggo Hørup taaguusiullugu. Tamanna suliniutip ukiuni tallimani atuuttussap ilagaa, tamatumani oqallittarnernik aaqqissuisuusartut marluullutik Danmarkimi angalallutik eqimattat tusagassiuutitigut tusarsaavallaartanngitsut pikkorissartittassallugit.

- Ukiut tamaasa holdit sisamat pikkorissartinneqartassapput, Aalborgimilu kalaallinut pikkorissartitsinerup saniatigut ukioq manna isumaginninnermut peqqinnissamullu ilinniartitsinernut marluusunut nunalerinermullu ilinniarfimmi pikkorissaasoqarluni, taakkununngami tusagassiuutitigut saqqummiussisinnaaneq ajornakusoortuusarmat.

Pilerisaarut immikkut ittoq

Ukiuni tallimani suliniutigineqartussami immikkut pilerisaaruteqarpoq, ukiummi tamaasa Hørupimi piginnaanillit oqallisissiamik pitsaanerpaamik allanneqarsimasumik toqqaasassammata, tamannalu Politikenip saqqummiiviani Bornholmimi Folkemødemi aasakkut nersornaasiinermik malunnartinneqartassalluni.

Aalborgimi pikkorissartitsinermi arfinillit peqataapput - ilaatigut ilinniarnertuunngorniarfimmi ilinniartitsisoq Sorlannguaq Lind Ravn aamma qilaatersortartoq kulturimillu attaveqaqatigiinnermik suliaqartartoq Josepha Kuitse Kunak Thomsen peqataallutik.

- Peqatigiiffik Uagut Julie Rademacherilu Kalaallit Illuutaanni ataatsimiititsimmat marluulluta peqataagatta, tassanilu oqaluuserigatsigu Qallunaat tusagassiorfii Kalaallit Danmarkimiittut pillugit annertunerusumik paasissutissiisannginnerat – aamma tamanna qanoq iliuuseqarfigisinnaaneripput.

- Pikkorissarnissamut neqeroorfigineqaratta soorunami akuersivugut. Isumaqarattami Danmarkimi Nunarput pillugu politikikkut oqallinnermut akuliuttarnissarput pingaaruteqartoq. Kalaaliugatta Danmarkimi najugaqartut oqallinnernut ilanngussassaqarluarpugut, Sorlannguaq Lind Ravn aamma Josepha Kuitse Kunak Thomsen nassuiaapput.

Sermitsiap Qallunaat Nunaanni oqallinnermut peqataalerlaat marluk aviisimut atuartartutut allagaqarnissaannik qinnuigai. Taakku marluullutik nassuiaatigaat, pingaarnertut meeqqatik pissutigalugit oqallinnermut peqataarusullutik.

Atuartartut allagaat ataani atuarneqarsinnaavoq.

Meeqqavut pillugit taamaaliorpugut

All. Sorlannguaq Lind Ravn aamma Josepha Kuitse Kunak Thomsen

Kalaallit ikittunnguit marsimi unnunni pingasuni Aalborgimi Kalaallit Illuutaaniittarput, atuartartut allagaannik oqallinnernullu ilanngutassianik qanoq allassinnaanerminnik ilinniarlutik. Taama ilinniartitsinermi Danmarkimi aviisimi Politikenimi atuartartut oqallinnerannut akisussaallutik aaqqissuisuusartut marluk pikkorissaasuupput.

Uagut pikkorissarnermut peqataanissatsinnut pissutissarpassuaqarpugut, oqaloqatigiinnernili ataasiinnaq eqqaasarparput: Qitornavut Danmarkimi inunngorsimasut pillugit taamaaliorpugut.

Ukiorpassuarni Danmarkimiinnitsinni Kalaallinik tunuliaqutaminnik kanngusuutiginnittunik naapitsigajuttarpugut. Assigiinngitsutigut naapittarpavut. Kalaallit inersimasut Josephap Nunarput pillugu oqalugiaataanik tusarnaariartortut namminnerlu kulturikkut tunuliaqutiminnik ilisimasaqanngilluinnartut – tamatuminngalu kanngusuutiginnittut. Imaluunniit inuusuttut, soorlu Sorlannguup ilinniarnertuunngorniarfimmi ilinniartitsisutut sulinermini naapittagai, ilaqutariinni kalaallisut attaveqarnertik allanut isertortarpaat tunuliaquttaminnillu oqaluttuarnissartik merserisarlugu.

Meeqqat, inuusuttut inersimasullu amerlanerit kalaaliuneq pillugu oqaluttuanik illuatungaannarsiortunik assigiinngitsorpassuarnik tusarsimasarput. Allallu Kalaaliuneq kanngunarnerarlugu oqartuaannarpata, taakkua oqaasiinik upperinnilernissaq ajornanngitsunnguusarluni.

Taamaattumik isumaqarpugut Kalaallit Danmarkimi najugallit Qallunaat oqallinneranni akuusariaqarlutillu tusaaneqartariaqartut. Taamaaliorpugut neriuutigigatsigu Danmarkimi inuiaqatigiit isummatsinnik anitsigaangatta tusarnaarnissamut sungiussiumaartut. Taamaalilluta Kalaallit Danmarkimi najugallit kinguaariinni tulliuttuni inuiaqatigiinni tusagassiuutinilu Kalaallinik oqaluttuat pillugit siammarterneqarnerunissaat, assigiinngiiaarnerunissaat naapertuilluarnerunissaallu misigisinnaassammassuk.

Kalaaliuneq qanoq ittuunersoq pillugu assigiinngiiaarnerusumik paasissutisseerusuppugut, tamatumunnga nammineq oqaluttuassartatsinnik oqaluttuarnitsigut. Oqaluttuaralugit Kalaallit kikkuusut, soorlu oqaluttuaralugit Tuluit oqaasiinik ilinniartitsisoq eqqumiitsuliortoq, kulturimik soqutigisaqarluartoq uaajeertartoq aamma inuttut nalinginnaalluinnartutut inuusugut.

Oqallinnermut peqataalerutta kisitsisitigut paasissutissaannaajunnaassaagut.