KL

DK

Paakitsumi qaqqap nakkaanera Ilulissani innaallagiaaruttoqarneranut peqqutaasoq

Ilulissani innuttaasut arfininngormat iteramik innaallagiaqanngillat. Erngup nukinganik nukissiorfiup eqqaani qaqqap nakkaanera pissutaasoq Nukissiorfiit ilisimatitsipput. Erngup nukinganik nukissiorfimmut kingoraartissanik pissarsinissaq Nukissiorfiit maanna sulissutigaat.

Ilulissani arfininngormat innaallagiaaruppoq.
KASSAALUK KRISTENSEN Digitalredaktøri
Saqqummersinneqarpoq

Ilulissat arfininngormat Nukissiorfiit pisariaqartitsisoqartillugu sarfalersuisarfiata illoqarfimmik innaallagissiortitsinerata tungaanut ullaap tungaani innaallagiaaruppoq.

Maanna sarfaaruttoqarneranut suna pissutaanersoq Nukissiorfiit nalunaarput:

- Sarfamut sakkortuumut kabelersuup ajoqusernerata kingunerisaanik Paakitsumi sillimmatitut innaallagissiorfik artorsalernini peqqutigalugu aamma ajutoorpoq, Nukissiorfiit nittartakkaminni allapput.

Kingoraartissat Paakitsumut nassiunneqartut

Innaallagissiorfiit soorlu innaallagissiortut napasuliallu attaveqarfiusut tamarmik ajunngitsut, qaqqalli nakkaanerani kabelit sakkortuumik sarfallit, innaallagissiorfimmut mikinerusumut pilersuisut, eqqorneqarlutillu aserorsimammata tamanna Ilulissani innaallagiaarutsitsinermut pissutaavoq.

Paakitsumi erngup nukinganik nukissiorfiup sillimmatitut innaallagissiorfiup qaqqap nakkaanerata kingorna sarfamik atuivallaarneq pissutigalugu ajoqusersimasoq Nukissiorfiit nassuiaapput. Sillimmatitut innaallagissiorfik Paakitsumiittoq erngup nukinganik innaallagissiorfiup ingerlaleqqinnissaata tungaanut atuutissaaq.

Paakitsumi sillimmatitut innaallagissiorfimmut kingoraartissat ataasinngornerup ualinerani Ilulissanit tikiunneqarumaartut Nukissiorfiit naatsorsuutigaat.

Ilulissat maanna illoqarfiup innaallagissiorfiani pisariaqartitsisoqartillugu innaallagissiuummik dieselitortumik innaallagialersorneqarpoq.

ilulissat paakitsoq nukissiorfiit innaallagiaaruttoqarneq inuiaqatigiit qaqqap nakkaanera

Atorfiit tamaasa takukkit

PODCASTI

Powered by Labrador CMS