Paakitsumiit pilersuineq uninngavoq - Ilulissani innaallagissiorfiit sillimmataasut pilersuitinneqarput

OBS: Allaaserisaq nutarterneqarpoq nal. 17.20.

Ilulissani innuttaasut arlallit ulloq aallartissimassagaat innaallagiaqaratik. Tassami illoqarfik tamakkerlugu innaallagiamik pilersorneqanngilaq. Nukissiorfiit Facebookikkut paasissutissiivoq Ilulissani innaallagiamik pilersuinerup kipitinneqarnera ajutoornermik pissuteqartoq.

Qanoq ajutoortoqarsimanersoq erseqqissarneqanngilaq

Nukissiorfiit ilanngullugu paasissutissiipput ajutoorneq iluarsiniarlugu sulisoqartoq.

Nalunaaqutaq 9.00 missaani Nukissiorfiit quppernerminni nutarterivoq, illoqarfimmi innaallagiamik pilersuineq suli kipisaqattaartoq:

- Innuttaasunut ilisimatitsissugerusupparput, suli maannamut Nukissiorfimmiit sulissutigineqarmat ajornartorsiut iluarsiniarlugu. Ajuusaarutigaarput arlaatigut persaqqusersuisoqarpat pilersuinerup ajutoornerata nalaani aammalu qujavugut naammagittarnissinnut.

Illoqarfimmi sillimmatinit innaallagialersuisoqarpoq

Nukissiorfiit arfininngornermi ualilluinnartoq ilisimatitsipput Ilulissat eqqaanni erngup nukissiorfia Paakitsumiittoq innaallagissamik pilersuiunnaarsimasoq. 

- Ilulissani sillimmataasutut innaallagissiorfiup illoqarfimmut innaallagissamik pilersuinera ingerlaannassaaq, erngup nukinganik nukissiorfiup pilersueqqilernissaata tungaanut.

Nukissiorfiit Ilulissani innuttaasunut kaammattuuteqarpoq:

- Ajoqutaasoq peqqutigalugu kiassarnermik pilersuineq qaminngagallarpoq, erngup nukinganik nukissiorfiup pilersuinerata ingerlaqqilernissaata tungaanut. Taamaammat kiassaatersi orsussatortoq nakkutigissavarsi, Nukissiorfiit allapput.

Innaallagissamik pilersuinermi unittoornermut peqqutaasoq suli misissorneqartoq Nukissiorfiit ilisimatitsivoq.

Tusass nittartakkamini ilisimatitsivoq innaallagissamik pilersuinerup kipisaqattaarnerani internetimut attaviit aamma attaveeruttarsinnaassasut.