Paamiuni takornariaqarneq siuariartortoq

Paamiuni takornariaqarneq ukiuni kingullerni arfineq pingasuni annertuumik pitsaasumik ineriartorpoq 2025-milu umiarsuarmik takornariartaammik takornariaqarnikkut 29.873-inik tikeraartoqarnikkut Paamiut sinerissami tikeraartut amerlassusaat malillugit pingajuattut inissisimavoq.

Taama Kommuneqarfik Sermersooq nittartakkamini allappoq.

Tikeraartut amerleriarneri malillugit takornariaqarnermut soqutiginninneq annertuseriangaatsiarpoq. Taamaattumik Paamiuni takornarialerisut takornariaqarnermik inuussutissarsiornermillu ineriartortitsinermi peqataalluarsimapput.

Ineriartortitsineq najukkami suliaqartartut Kommuneqarfik Sermersuullu akornanni qanimut suleqatigiinnikkut pivoq. Visit Paamiut, kommunimi Inuussutissarsiornermut Immikkoortortaanut ilaasoq takornariaqarnermik inuussutissarsiornermik pilersitsinermut tapersersuinermi pingaarutilittut atuuffeqarpoq, ilaatigut siunnersuinikkut, piginnaasanik ineriartortitsinikkut aamma najukkami aallarnisaasunik ingerlataqartitsinikkut.

Angallatinik ingerlatsisut Paamiuni sisamaallutillu ataatsimik nunami takornarialerisoqarpoq, taakkualu ilaat arlallit kommunip isumannaallisaanermut tunngasumik PAX 12-imik pikkorissartitsineranut peqataasimapput.

- Ukiuni arlalinni Paamiuni takornariaqarnerup qanoq ineriartorsimanera takullugu pitsaasorujussuuvoq. Najukkami annertuumik tunniusimasoqarpoq aamma takusinnaavarput suliffeqarfiit kommunillu akornanni suleqatigiinneq aalajangersimasunik angusaqarfiusoq, borgmester Avaaraq Olsen (IA), Aningaasaqarnermut Inuussutissarsiornermullu Ataatsimiititami siulittaasoq, oqarpoq.

Takornarissanik sullissivik nutaaq pilersinneqassasoq

Takornariaqarneq annertusiartortoq umiarsuarnik takornariartaatinik takornariaqarnerulernermut attuumassuteqarluinnarpoq.

Paamiuni takornarialerinermik ingerlatsivik nutaaq, ukiup ingerlanerani pilersinneqartussaq, aamma pilersaarutigineqarpoq. Inniminniinerit, pilersaarusiorneq misigisassanillu aaqqissuussineq – ingammik umiarsuarnut takornariartaatinik tikittoqartillugu- ataqatigiinnerusumik ingerlanneqarnissaat qulakkeerniarlugu najukkami ingerlatseqatigiiffiit ataatsimoortinneqarnissaat ataqatigiissaarinissaallu siunertaavoq.

Suliniut Paamiuni suliffeqarfiit arlallit suleqatigiinnerannik tunngaveqarpoq, takornariartitsinermullu tunngatillugu nukittunerusumik ataqatigiinnerusumillu nioqqutissiorneq siunertaavoq. Tamanna ingammik umiarsuarnik takornariartitsinerup soqutigineqaraluttuinnarnera ilutigalugu Paamiut tikiffittut pitsaassusissaanut sullissisinnaassutsimullu iluaqutaasussatut nalilerneqarpoq.

- Tunngavissaqarluarpugut ineriartortitseqqissinnaasatsinnik. Najukkami arlalinnik suliniuteqarnikkut aamma takornariartitsisarnernik ineriartortitsiinnarnikkut ukiuni aggersuni Paamiut tikeraartoqarnerunissamut piareersimalluarpoq, Avaaraq Olsen oqarpoq.

Paamiuni ineriartorneq ukiuni aggersuni ingerlaannassasoq Kommuneqarfik Sermersuumit naatsorsuutigineqarpoq.