Pele: Trumpip toqqaanera Kalaallit Nunaat pissaanilissuarnut pingaaruteqarneranik ersersitsivoq
Donald Trumpip Kalaallit Nunaannut immikkut aallartitamik toqqaanera Kalaallit Nunaata pingaaruteqarneranik naqissusiivoq, pisorlu USA-p Kalaallit Nunaatalu akornanni toqqaannaq oqaloqatigiinnerannik kinguneqartariaqarpoq, Naleqqami siulittaasoq Pele Broberg oqarpoq.
- USA-p Kalaallit Nunaat pingaaruteqartutut nalilerlugu immikkut aallartitamik toqqaaguni, oqaloqatigiinneq tamanna Kalaallit Nunaannik toqqaannartumik ingerlanneqartariaqarnera pissusissamisuuginnartussaagaluarpoq — naalagaaffik Kalaallit Nunaata kunngeqarfimminut ilaasutut suli aqutsisua pinnagu, Pele Broberg oqarpoq.
Assi: Leiff Josefsen
Præsident Donald Trumpip Kalaallit Nunaannut immikkut ittumik aallartitamik toqqaasimalluni unnuaq nalunaarutigereeraalu, USA-p Kalaallit Nunaannut soqutiginninnera oqallisaaqqilerpoq.
Naleqqamiit Kalaallit Nunaata USA-mut ilanngunnissaa kissaataanngitsoq, partiip illuatungiliuttup Naleqqap siulittaasua Pele Broberg Sermitsiamut allakkatigut naqissusiivoq:
- Kalaallit Amerikamiunngornissaat Naleqqap kissaatiginngilaa, soorluttaaq aamma qallunaanngorusunngitsugut. Kalaallit Nunaat kalaallit nunaraat, siunissarpullu kalaallit kisimik aalajangiiffigisinnaavaat, Pele Broberg allappoq.
Kalaallit Nunaata pingaaruteqassusia naqissuserneqartoq
USA-p nunanut ataasiakkaaginnarnut immikkut aallartitanik toqqaasarnerat qaqutigoortorujussuusoq, Pele Brobergip aamma erseqqissaatigaa:
- Taamatut toqqaasarneq nuna Amerikap isumannaallisaanermut nunanullu allanut politikkianut pingaaruteqarluinnarsorineqaraangat aatsaat pisarpoq.
- Kalaallit Nunaata taamatut pineqarnera, Kalaallit Nunaat pissaanilissuit politikkianni qanoq pingaaruteqartigisoq naqissuserpaa, Pele Broberg allappoq.
Kalaallit Nunaat toqqaannartumik oqaloqatigineqartariaqarsorigaa
Kalaallit Nunaat nunat tamalaat akornanni nammineerluni oqaaseqarsinnaanerusariaqartoq taanna isumaqarpoq:
- Kalaallit innuttaasut qinikkallu pinnagit qallunaat ministerii suli oqaloqatigineqartarmata suli ajornartorsiutaavoq.
- USA-p Kalaallit Nunaat pingaaruteqartutut nalilerlugu immikkut aallartitamik toqqaaguni, oqaloqatigiinneq tamanna Kalaallit Nunaannik toqqaannartumik ingerlanneqartariaqarnera pissusissamisuuginnartussaagaluarpoq — naalagaaffik Kalaallit Nunaata kunngeqarfimminut ilaasutut suli aqutsisua pinnagu.
Illersornissaq niuernerlu pillugit isumaqatigiinniartoqarnissaa kajumissaarutigigaa
Pele Brobergip Naalakkersuisut qallunaat naalagaaffiat kalaallit sinnerlugit oqalutsikkunnaarlugu namminneq USA oqaloqatigeqqullugu kajumissaarpai:
- Uani politikkikkut oqariartuuteqaannarani imaluunniit narrujuummerneq pitsaasumillu nipeqaqqusineq tusagassiuutitigut oqariartuutiginnarneqarnissaat pineqanngillat, illersornissarliuna, niuernikkut attaveqarnerit, aningaasaqarneq Kalaallit Nunaatalu siunissaa pillugu isumannaallisaanermut tunngasunik isumaqatigiinniarnerit piviusut pillugit attaveqartoqartariaqartoq, Pele Broberg oqarpoq.
Donald Trumpip Louisianami guvernøri Jeff Landry USA-p Kalaallit Nunaannut immikkut aallartitatut toqqarmagu qisuariartut imaaginnavipput.
Ingammik Landryp Kalaallit Nunaata USA-mut ilanngunnissaanut peqataanissani qilanaaralugu oqarnera assut isorineqarpoq.
