KL

DK

Periuseq nutaaq ilaqutariinnik ataatsimut pisitsinissamut killiliisoq— minnerpaamik ilaqutariit ataatsit eqqugaareerput

Kalaallit Nunaanni innuttaasut nunani allaneersunik aappaqartut amerlasuut, ilaqutariinnik ataatsimut pisitsinissamut iliuuseqarnissaq piffissami qaninnermi ajornarnerulerpoq. Periuseq nutaaq inatsit allanngortinnagu aallartinneqarpoq. Tamannalu annertuumik ilaqutariinnut siunissami kingunerluuteqassaaq.

Nunanit allaneersut Danmarkimi Kalaallit Nunaannilu tikeraarsinnaanerat najugaqarsinnaanerallu pillugit suliat Nunani allani najugaqartunut aqutsisoqarfimmit suliarineqartarput.
Morten Okkels Morten Okkels Tusagassiortoq
Saqqummersinneqarpoq

Nunani allani najugaqartunut aqutsisoqarfik innuttaasunut aappaminnik inooqatigisaminnillu nunanit allaneersunik Kalaallit Nunaanni ilaqutariinni ataatsimut pisitsinissamik piumasaqaatinik nutaanik pingaarutilinnik qaammatini kingullerni atuutilersitsipput.

Piumasaqaat tamanna pissutigalugu innuttaasut aappartik ilaquttatillu nunanit allaneersut Kalaallit Nunaanni najugaqartissinnaanngilaat.

Nutaartaasoq tassaavoq kalaaleq danskisut innuttaassusilik ilaqutariinnik ataatsimut pisitsinissamut qinnuteqarnermini qanigisamik piumasaqaateqarnerup atuutilersinneqarsimanera.

– Kalaallit Nunaannut ataatsimut attuumassuteqarnersi minnerpaamik nunamut allamut ataatsimut attuumassuteqarnertut issaaq (attaveqaatinut piumasaqaat), Nunani allani najugaqartunut aqutsisoqarfik nittartakkami NyiDanmark-imi taama piumasaqarsimavoq.

Aappariit aappaa danskisut innuttaassuseqaruni, aappaa Kalaallit Nunaanni ilaqutariittut ataatsimoornissamut piumasaqaatinik eqqortitsisariaqarnavianngilaq siornatigut atuutsinneqarpoq.

NyDanmark nittartagaata juunip 25-ani 2026-mi nutarterneqarnerani, tamanna allanngorpoq. Allannguutit atuutilersinneqarnerata kingunerisaanik sapaatip-akunnera ataaseq qaangiutiinnartoq ilaqutariinnut ataatsinut tamanna siunissami pilersaarutaannut sunniuteqareersimasoq, Sermitsiaq paasisaqarpoq.

Kalaaleq allamiorlu aappariit nunami allami najugallit, Kalaallit Nunaanni ilaqutariinnik ataatsimut pisitsinissamut qinnuteqaataat juulip pingajuani 2026-mi itigartinneqarpoq.

ATTUUMASSUTEQARNERMUT PIUMASAQAAT SUNAAVA?

Aappariit Kalaallit Nunaanni ilaqutariinnik ataatsimut pisitsinissamut piumasaqaatit naammassissagunikku, aappariit tamarmik immikkut atugaat eqqarsaatigalugit minnerpaamik nunamut allamut attaveqarnertulli Kalaallit Nunaannut Attuumassuteqartariaqarput.

Ilaatigut taakkua sumi najugaqarsimanerat, suliffeqarsimanerat ilinniagaqarsimanerallu, ilaqutaat oqaatsinillu piginnaanerat oqartussaasunit misissorneqartarput. Nunamut allamut attaveqarneq aanneruppat ilaqutariinnut ataatsimut pisitsinissaq itigartitsissutigineqartarpoq.

Meeqqat Kalaallit Nunaanniittut eqqarsaatigalugit imaluunniit perulunnartumik nappaateqarnerup nunami allamiinnissap ajornakusoorneranik kinguneqarnera pissutigalugu, piumasaqaat tamanna immikkut ittumik pinngitsoortinneqarsinnaavoq.

Attuumassuteqarnermut piumasaqaat aappariinnut nunani avannarlerni innuttaassuseqartunut sunniuteqarneq ajorpoq. Taakkua Kalaallit Nunaanniinnissaminnut periarfissaqareerput, taamaattumillu ilaqutariinnik ataatsimut pisitsinissamut qinnuteqartariaqaratik.

– Nunani allani najugaqartunut aqutsisoqarfiup itigartitsissuteqarpoq, illit aapparpillu Kalaallit Nunaannut ataatsimut attaveqarnersi minnerpaamik Savalimmiunut, Danmarkimut nunamulluunniit allamut ataatsimut attaveqarnissitut ittoq pissutigalugu, itigartitsinermi allagaqaatip Sermitsiap pissarsiarisimasaani atuarneqarsinnaavoq.

Aappariit taakkua kinaassutsiminnik isertuusserusupput.

Aalajangiineq pissutigalugu periutsit allanngortinneqarput

Periuseq nutaaq tamanna nutaamik inatsiseqalernermik aallaaveqanngilaq. Inatsit atuuttoq naapertorlugu danskisut innuttaassusillit attuumassuteqarnermut piumasaqaatinut ilaatinneqanngillat.

Nunani allani najugaqartunut aqutsisoqarfiup nittartagaani aamma oqartussaaffiup itigartitsinerup allagaqaataani allassimavoq nunat tamalaat akornanni pisussaaffeqarnertik pissutigalugu taamaaliortoqarsimasoq:

- Europami Inuit Pisinnaatitaaffii pillugit Eqqartuussiviup aalajangiinera pissutigalugu attuumassuteqarnermut piumasaqaat suliani tamani nalilersorneqartariaqarpoq, immikkut ittumik tunngavissaqanngikkaangat piumasaqaatip naammassineqartannginneranik kinguneqartinneqartassaaq, nittartakkami allassimavoq.

EMD tassaavoq Europami Inuit Pisinnaatitaaffii pillugit Eqqartuussivik, taassumalu aalajangiineri aamma Kalaallit Nunaanni atuupput.

Nunani allani najugaqartunut aqutsisoqarfiup nittartagaani itigartitsinermilu allagaqaammi allassimanngilaq ilaqutariit ataatsimoortinneqarnissaat pillugu aqutsisoqarfiup periaasianut nutaamut EMD-mit aaliangiinermit tunngaveqarnersoq.

Sermitsiap Nunani allani najugaqartunut ministereqarfik aamma Nunani allani najugaqartunut aqutsisoqarfik Danmarkimilu nunanut allanut oqartussat apeqqutinik arlalinnik apeqquteqarfigai akisoqarnissaalu maanna utaqqillugu.

Aappariit ilaqutariillu allat taamatut periuseqalernermik eqqugaasut Sermitsiamit tusarfigineqarusupput.

inuiaqatigiit nunani allani najugaqartunut aqutsisoqarfik ilaqutariinnik ataatsimut pisitsineq europami inuit pisinnaatitaaffii pillugit eqqartuussivik attaveqarnermut piumasaqaat kalaallit nunaat

Atorfiit tamaasa takukkit

PODCASTI

Powered by Labrador CMS