Piffissap qiteqqunnerani qinersinermi Republikanerit ajugaanissaat Trumpip qularigaa
Apersorneqarnermini nutaami aappaagu piffissap qiteqqunnerani qinersinerup inernissaa pillugu Trump qularnerminik ersersitsivoq.
USA-p præsidentia, Donald Trump, tallimanngornermi The Wall Street Journalimut præsidentip allaffiani apersorneqarpoq.
Assiliisoq (Toqqorsivimmit): Francis Chung/Politico/Ritzau Scanpix
USA-p præsidentia, Donald Trump, nalornivoq partiini, republikanerit, tulliani piffissap qiteqqunnerani USA-p Inatsisartuini (repræsentanternes hus) qinersinissamut amerlanerussuteqarlutik aquummik tigumminniinnassanersut.
Aviisimut The Wall Street Journalimit præsidentip allaffiani tallimanngormat apersorneqarnermini tamanna oqaatigaa.
Tamatumunnga pissutaavoq aningaasaqarnikkut politikkimik ingerlatsinermini suli malunnaatilimmik takussutissaqanngimmata, Trump oqarpoq.
Apersorneqarnermini Trumpip erseqqissarpaa milliardilikkaanik nalilinnik USA-mut aningaasaliinerit sulissutiginnilluni, oqarluni aningaasaliissutit amerikami aningaasaqarnikkut allannguinissamut iluaqutaassasut.
Taamaakkaluartoq taassuma nassuerutigaa ilimagisinnaanngikkini tulliani piffissap qiteqqunnerani qinersinermi aappaagu pisussami Republikanerit qinigaalluarumaarnersut.
Aviisimit apeqqutigineqarpoq Republikanerit Kongressimi (USA-mi inatsisartut aappaat) inatsisartunut ataatsimut amerlanerussuteqarnertik annaassagaat ilimagineraa.
- Taamanna oqaatigisinnaanngilara. Naluara qaqugu aningaasat taakku tamarmik sunniuteqalissasut, taanna oqarpoq nangillunilu tamanna 2026-p aappaata kvartaliani pisinnaasoq.
Amerikami aningaasaqarnikkut ineriartorneq ingerlaavartumik qaffakkiartoraluartoq, Trumpip januaarimi ivertinneqarneraniit, tamanna amerikamiut tamarmik iluaqutissarsiffiginngilaat.
Suliffissat amerliartortinniarneqarnerat kigaatsuinnarmik ingerlavoq, suliffissaaleqisut amerleriarput, ulluinnarnilu nioqqutit akiisa qaffakkaluttuinnarnerat amerikamiunut millionilippassuarnut sunniuteqarnerluppoq.
Tassarpiaavorlu amerikamiut aningaasaqarnerminnik ernumassuteqarnerat qinersinermi kingullermi Trumpimut iluaqutissiissoq, kisianni præsidentip illorsuanut utermalli qinersisartut amerliartuinnartut præsidentip aningaasaqarnikkut politikkianut nalorninerulerput.
Trumpip apersorneqarnermini kimigiisissutigaa, akit apparsimasut.
- Isumaqarpunga qinersineq pillugu oqaloqatigiissagutta, qaammatit arlaqanngitsut qaangiuppata, taava akit pitsaasumik inissisimassasut, taanna oqarpoq, Demokratillu akit qaffakkiartuinnarnerannut pisuutillugit.
Nangilluni oqarpoq, qinersineq ajornakusoorsinnaasoq, kisianni Republikanerit angusarissaarnissartik pillugu tamaviaarumaartut.
- Aningaasaqarnikkut oqaluttuarisaanermi pitsaanerpaamik pilersitsivunga. Kisianni inuit piffissaq sivisooq atorlugu paasisinnaalissavaat. Aningaasarpassuit nunatsinnut isaapput, maannakkorpiaq sanaartornermut atorneqarput - biililiorfissuit, silassorissuusiaasiviit, sorpassuillu.
- Oqarfigisinnaanngilakkit qanoq qinersisartunut sunniuteqassanersoq, tassami suliarisinnaasara tassaavoq suliama ingerlannissaa, The Wall Street Journalimut oqarpoq.
