Pilersitseqqinnissamut pilersaarut: 100 million koruuninik taaarsigassarsineq kommuunip eqqagassalerivianut iluaqutaassaaq

Eqqakkanik isumaginnittoqarfik ESANI ukiut aappassaa tulleriisiinnarlugit, 30 millionit koruuninik amigartooruteqarpoq. Aammattaaq ingerlatseqatigiiffiup aningaasaatai nungukkiartulerput.

Tamanna Kommuneqarfik Sermersuumi Aningaasaqarnermut Inuussutissarsiornermullu Ataatsimiititap ataatsimiinnissaanut oqaluuserisassani atuarneqarsinnaavoq.

Allakkami kommunip ingerlatseqatigiiffiutaata aningaasatigut qanoq innera nassuiarneqarpoq. Ataatsimiititaliap ataatsimiinnerani politikkerit iluarsaasseqqinnissamut pilersaarutit isummerfigissavaat, pilersaarutillu uku pingaarnertut imarai:

Kommunit piginnittut akisussaassuseqarlutik taarsigassarsiaat katillugit 70 mio. kr.-it nammineerluni anigaasaatinut nuunneqarnissaat siunnersuutigineqarpoq. Kommuneqarfik Sermersuumut taarsigassarsiat 17,5 mio. kr.-iupput. Taarsiinermi aningaasat ingerlatseqatigiiffiup naatsorsuutaani akiitsunit nammineq aningaasaataanut nuunneqassapput, aamma akiliisinnaassuseq 0,8 procentimiit 12 procentip missaanut qaffanneqassaaq, tamannalu nutaamik taarsigassarsinissamut piumasaqaataavoq.

ESANI KommuneKredit-imi 100 millionit koruunit tikillugit ukiunut 30-ni taarsersorneqartussanik taarsigassarsissaaq.Taarsigassarsiat ilaatigut piffissami sivikitsumi aningaasaleeqataanissamut, atorneqassapput. Ingerlatsinermi akiliisinnaassuseqarnissap qulakkeernissaanut aningaasaliinernullu sinneruttunut, soorlu sanaartornerup naammassineqarnissaanut, Sullivinnik Nakkutilliisoqarfimmit piumasaqaatinut aamma timmisartup arsaanik isumaginninnermut.

Aningaasalersuinermut aningaasartuutissanullu tunngatillugu aaqqiissutissamik ataavartumik nassaarniarlutik, ESANI-p Namminersorlutik Oqartussat isumasioqatigissavai .

Aningaasanik nutaanik piumasaqanngilaq

Akisussaassuseqarluni taarsigassarsiat nammineq aningaasaatinut nuussinermut atatillugu erseqqissarneqarpoq pilersaarutip kommuninit piginnittunut aningaasanik nutaanik aningaasaliisoqarnissaanik pisariaqartitsisoqannginnera.

- Allanngortitsinermi kommuni aningaasanik nutaanik pisariaqartitsinngilaq, kommunillu aningaasaqarnikkut inissisimaffia allanngortinneqanngilaq, ingerlatseqatigiiffimmi maanna tunngavigineqartut naapertorlugit taarsigassarsiat utertinneqarsinnaanissaat ilimanaateqanngimmat.

Kommunilli aningaasanik amerlanerusunik atuinissaat aappaagu naatsorsuutigisinnaavaat.

Kommunit ingerlatseqatigiiffimmut atuinermut akiliutaat aappaagu qaffanneqassapput. Kommuneqarfik Sermersuumi 2026-mi 16 mio. kr.-nit 2027-mi 32 mio. kr.-nut qaffanneqassapput.

Siunnersuutigineqarpoq kommunit akiligassaat 2027-mi katillugit 55,7 million koruuninik qaffanneqarnissaat, tassa 2026-mut sanilliullugu 28 million koruuninik qaffassasut.

ESANI-p puukunik utertsitsisarnermui tatineqartoq

Sermitsiami siusinnerusukkut allaaserineqarpoq, Naalakkersuisut aningaasanut inatsisissatut siunnersuutaanni ESANI nunatta karsianit 15 million koruuninik taarsigassarsisinneqarnissaa siunnersuutigineqartoq, ingerlatseqatigiiffik akiligassaminik utertitsisarnermik ingerlatsinermigut aningaasatigut tatineqarnera pissutigalugu.

Pilersitseqqinnissamut pilersaarummi allassimavoq ESANI 13,3 million koruuninik ukiup affaani siullermi amigartooruteqartoq.

– 2026-p ukiup affaani siullermi ESANI-p utertitsisarnermi akiliutinik 24,8 mio. kr.-inik isertitaqarpoq, 35,0 mio. kr.-inillu akiliuteqarluni, taamaalilluni aningaasalersuinermi 10,2 mio. kr.-inik nikingassuteqarluni. Puukunik utertitsisarnermik immikkoortortaqarfik 2026-mi juulip naaneranut 13,3 mio. kr. inik amigartooruteqarpoq, allakkiami allassimavoq.

ESANI-p Namminersorlutik Oqartussat 2027-mi januaarip aallaqqaataaniit atuutilersumik nutaamik isumaqatigiissusiorfigeqqammerpai, pisortarlu Nicolai Odgaard Jensen Sermitsiamut allakkatigut nassuiaateqarpoq utertitsissut qaffasippallaarnera pissutigalugu ESANI aningaasatigut tatineqarsimasoq:

- Aningaasat tunniunneqartut suli utertinneqanngitsut ilanngullugit 100 procentit missaanniipput. Aningaasanik tunniussisoqaraangat 90 procentit missaat utertinneqartarput, tamannalu amigartooruteqarnernut aningaasanut inatsisissatut siunnersuutip sammisaanut pissutaavoq, Nicolai Odgaard Jensen allappoq.