KL

DK

Pinerluttulerinermi inatsisit pillugit immikkut ilisimasallit nutaat siulittaasussaa toqqarneqarpoq

Eqqartuussisoq Tine Rud immikkut ilisimasallit nutaat, pinerluttulerinermi inatsisip oqartussaaffiata angerlaannissaanut immikkut ilisimasalinni eqqartuussisoq Tine Rudip pilersaarutaasumut atatillugu pinerluttulerinermi inatsisinik qulaajaasut siulersortigissavaat. Taassumalu Kalaallit Nunaanni eqqartuussisoqarfiit ilisimaarilluarpai.

Naalakkersuisut pinerluttulerinermut inatsisip nunatsinnut angerlaannissaa aalajangerpaat, Kalaallit Nunaat nammineq pinerluttulerinermut inatsisinik pilersitsisinnaanissaa anguniarlugu.
Morten Okkels Morten Okkels Tusagassiortoq
Saqqummersinneqarpoq

Naalakkersuisut juulimi nalunaarput, Kalaallit Nunaat pinerluttulerinermut inatsisinik nammineq atuutilersitsissasoq. Siullermilli immikkut ilisimasallit suliamik tamatuminnga piareersaassapput.

Maanna uppernarsarneqarpoq eqqartuussisoq Tine Rud immikkut ilisimasalinni taakkunani siulittaasussatut toqqarneqartoq.

– Pinerluttulerinermi inatsisit angerlaanneqarnissaat nutarternissaallu Naalakkersuisut immikkut ilisimasalinnik suleqatigiissitaanni pingaarutilimmik suliaqarnermut peqataasinnaanera nuannaarutigeqaara, Tine Rud Sermitsiamut allappoq.

Pinerluttulerinermi inatsisit ilaatigut pinerlunnerit qanoq pineqaatissiissutigineqarnissaannik aamma eqqartuussisut pinerluttunik pillaanissamut aalajangiisinnaanerannik imaqarput.

Pinerlunnermut inatsit maannamut naalagaaffiup ataaniippoq. Tassa Danmarkimi inatsisinik atortitsinermut ministeri pinerluttulerinermut inatsimmut politikkikkut akisussaavoq, inatsisillu allanngortinneqarneri Folketingimi akisussaaffigineqarlutik.

Siulittaasoq nutaaq ukiorpassuarni inatsisilerinermik eqqartuussiveqartitsinermilu suliaqarpoq, Nunatta Eqqartuussivianilu maanna nunatta eqqartuussisorigallangaatut atorfeqarluni. Tine Rud ilaatigut aamma illersuisutut siusinnerusukkut atorfeqarsimavoq.

Immikkut ilisimasallit eqqartuussiveqarfinnit assigiinngitsunit assigiinngitsunillu suliaqartunit tunuliaqutaqarput.

– Suleqatigiissitami ilaasortat pikkorissorsuit suleqatigilernissaat qilanaaraara, ataatsimoorluta suliatigut tunngavissaqarluarnissaq pilersissinnaagatsigu Kalaallit Nunaata inuiaqatigiinnut pingaaruteqartumi tamatumani inatsisiliorsinnaatitaanermik tigusinissaanut, Tine Rud oqarpoq.

eqqartuussiveqarneq inuiaqatigiit kalaallit nunaat naalakkersuisut tine rud pinerluttulerinermi inatsit

Atorfiit tamaasa takukkit

PODCASTI

Powered by Labrador CMS