Pinngitsaaliinerit pingasut Avannaani pisut Nunatta Eqqartuussisuuneqarfiani aalajangiiffigineqartut
Nunatta Eqqartuussisuuneqarfianiit Ilulissanukartoqarluni Avannaani pinngitsaaliinerit pingasut sapaatip-akunnerata siuliani eqqartuussissutigiartorneqarput. Eqqartuussutaasimasut suliani marlunni atuutsiinnarneqarput ataaserlu pinngitsuutinneqarluni.
Nunatta Eqqartuussisuuneqarfiata Ilulissani sapaatip-akunnerata siuliani tikeraarnermini eqqartuussiviup inaatai atorpai.
Assi: Nukannguaq Geisler
Nunatta Eqqartuussisuuneqarfia Nuummiit Ilulissanut sapaatip-akunnerata siuliani sivikitsumik nuutsinneqarallarluni. Suliat pinerlunnermut tunngasut arlallit, pingaartumik Avannaaneersut, suliarineqarput. Taakkua pinngitsaaliinernut suliat pingasut ilagaat.
Eqqartuussutit angutiniit suliareqqitassanngortinneqarput, taakku pinngitsaaliisimasutut Eqqartuussisoqarfik Qaasuitsumi siorna pisuutinneqarput. Suliat imminnut attuumassuteqanngillat.
Nunatta Eqqartuussisoqarfiani suliani pingasuusuni marluk aalajangiiffeqarnikuunerat attatiinnarneqarput, ataaserlu pinngitsuutinneqarluni:
Nunatta Eqqartuussisuuneqarfiani angut Qaanaameersoq arnamik sinittumik pinngitsaaliisimasutut marsip 17-ianni pisuutinneqarpoq.
Nunatta Eqqartuussisuunearfiata eqqartuussut isumaqatigaa, tassa qaammatini marlunni pineqaatissinneqarsimasut inissiisarfianniittussanngortinneqarnera naleqquttutut aalajangiiffigineqarluni.
Angut Upernavimmiu pinngitsaaliisimasutut Nunatta Eqqartuussisuuneqarfiata marsip 18-iani pisuutinneqarpoq. Nakuusersimasutut kannguttaatsuliorsimasutullu aamma pisuutinneqarpoq.
Nunatta Eqqartuussisuuneqarfiani eqqartuussut aamma attatiinnarneqarpoq, angullu ukiumil ataatsimi qaammatinilu arfineq-pingasuni pineqaatissinneqarluni.
Angut inuusuttoq pinngitsaaliisimasutut pisuutinneqarnikuunera marsip 19-ianni allanngortinneqarpoq. Angut suliareqqitassanngortitsinermini ajugaavoq, tassami pinngitsaaliisimasutut pisuunngitsutut aalajangiiffigineqarluni.
Avannaani nunaqarfimmi ilaquttani inuusunnerungaartoq pinngitsaalisimagaa eqqartuussivimmi pisuutinneqarpoq. Taamanilu ukioq ataaseq pineqaatissinneqarsimasunut inissiisarfimmiittussanngortinneqarluni.
