Pinngortitaleriffimmi pisortat nutaat
Søren Lorenzen Post aamma Malene Simon Hegelund Pinngortitaleriffimmi immikkoortortaqarfinni pisortanngorput.
Immikkoortortaqarfinni pisortanngortut novembarip aallaqqaataani atorfinipput.
Assi: Christian Sølbeck
Pinngortitaleriffiup immikkoortortaqarfiini pisortat nutaat marluk novembarip aallaqqaataani atorfinitsinneqarput. Søren Lorenzen Post Aalisakkanut Qalerualinnullu Immikkoortortaqarfimmi pisortanngortoq, Malene Simon Hegelund Silap Pissusianut Ilisimatusarfimmi pisortanngorpoq.
Pinngortitaleriffik tusagassiuutitigut taama nalunaaruteqarpoq.
Immikkoortortaqarfimmi pisortanngortut Pinngortitaleriffimmi ilisimatusartuunerupput, ukiorpassuarnilu suliaqarfimminni misilittagaqarlutik.
Søren Lorenzen Postip Helle Siegstad kinguaariinni nikittoqarnissaa angorusullugu soraarmat taarserpaa.
- Aalisarnermut Qalerualinnullu Immikkoortortaqarfiup ingerlateqqinnissaanut ineriartorteqqinnissaanullu qilanaaqaanga. Kalaallimmi Nunaanni aalisarneq isertitsissutaanerpaajusarmat, qaffasissumik pitsaassuseqartumik siunnersuisarnissarput pingaaruteqaqaaq taamaasilluta imartatsinni pisuussutigut piujuartitsiniartumik atorluarsinnaaniassagatsigit.
- Aammali Helle Siegstadip ukiorpassuarni suliarisimasai ilisimalersimasatsinnut ullumikkullu ingerlaatsitsinnut pingaarute qaqisut pillugit nersualaarusoqaara, Søren Post oqarpoq.
Helle Siegstad Pinngortitaleriffiup umiarsuaani ilisimatusaammi siunnersortaanertut akisussaasuuginnassaaq. Taanna qalerallit Nunatsinni ineriartornerat pillugu ukiorpassuarni oqariartuuteqartarnikuuvoq.
Ilisimatusarnikkut suleqatigiinneruneq
Malene Simon Hegelundip Silap Pissusianut Ilisimatusarfimmi Mie Hylstofte Sichlau Winding, DTU-mi sulinini ingerlatiinnarniarlugu aalajangertoq, paarlappaa.
- Silap Pissusianut Ilisimatusarfimmi pisortanngornissara qilanaareqaara. Ilisimatusarfitsinni assigiinngitsunik suleqateqarluta silap pissusiata allanngoriartorneranut tunngasutigut imaani ilisimatusarnerit imaanilu uumasoqatigiiaat pillugit ilisimatusarnerit minnerunngitsumillu ilisimatusarnitsinni kalaallinut inuiaqatigiinnut iluaqutaanissaanik eqqumaffiginnilluarnissarput pingaarteqigakku.
- Kalaallit Nunaanni ilisimatusarluni suliaqarnerup pitsanngorsaaffiginissaa qilanaareqaara, nunatsinneersut nunaniluunniit tamalaaneersut suleqatigiillutik nunatsinni ilisimatusarnerup silarsuaata ineriartorteqqinnissaa eqqarsaatigalugu, Malene Simon Hegelund oqarpoq.
Pinngortitaleriffiup Søren Lorenzen Post kiisalu Malene Simon Hegelund tikilluaqquai, suleqatigiinnerullu pitsaasumik pissarsiaqarnartumillu ingerlanissaa qilanaaralugu, allapput.
