Pipaluk Lynge Jeff Landryp tikittussanngornera pillugu: - Suut anguniaratarsinnaanerai eqqummaariffigisariaqarparput
Donald Trumpip Kalaallit Nunaannut immikkut aallartitaa Future Greenlandertoqarnerani Nuummiissaaq. Tikeraarnermini Inatsisartut Nunanut Allanut Sillimaniarnermullu Ataatsimiititaliaa naapikkusussappagu mattussinnaanagu, taamali pisoqassappat amerikarmiuuniannginnerput erseqqissuliutigissallugu ataatsimiititaliap siulittaasua Pipaluk Lynge oqarpoq.
Jeff Landryp Nunanut Allanut Sillimaniarnermullu ataatsimiititaliaq naapikkumassagaluarpagu Pipaluk Lynge piareersimavoq. - Mattussinnaanngilara, kisianni naapinnerput isumaqatiginninniarfiunavianngilaq, Pipaluk Lynge oqarpoq.
Assiliisoq: Oscar Scott Carl
Jeff Landryp nunatsinnukartussanngornera Inatsisartuni ataatsimiititaliap ukiuni kingullerni ulapeqisup siulittaasuata ullaaq manna tusarpaa.
- Pissanganarpoq, taama Trumpimut qanitsigisumik Future Greenlandimi peqataasartoqarsorinnginnakku, Pipaluk Lynge taama oqarpoq.
Nunatta USA-mut ilanngutsinnissaa sulissutigissallugu Jeff Landryp nunatsinnut immikkut aallartitanngornermini ilaatigut oqaatiginikuuaa. Taamaammat Nunanut Allanut Ataatsimiititaliap siulittaasuata mianersorfissaqarnerarpaa.
- Eqqummaarittariaqarpugut, tikinnermini soqutiginninnerminilu suut anguniagareratarsinnaaneri pillugit, Pipaluk Lynge oqarpoq.
Jeff Landry imminerminik ataatsimiititaliamilluunniit naapitserusunnersoq naapitsiumanersorluunniit pillugu ilisimasaqarani Pipaluk Lyngep oqaatigaa.
- Ataatsimiititaliaq naapikkumassappagu taanna taamanikkussamut tigussavarput. Massakkut ilisimasakka taamaallaat nutaarsiassani saqqummersuninngaanneerput.
Mattussinnaanngilat naapikkumariataassappat?
- Mattussinnaanngilara, kisianni naapinnerput isumaqatiginninniarfiunavianngilaq, Pipaluk Lynge oqarpoq.
Tuniniagaanatalu amerikarmiuunianngilagut
Naapissagaluarunikkuli suut anngutissanerlugit ilisimalluarpaa.
- Naapikkusussappanga erseqqissuliorfissatut taamaallaat isigissavara. Uagut kalaaliusugut, amerikarmiuunianngitsugut. Tuniniagaanngilagut. Ataqqineqarniarpugut nalitut. Suleqateqassatilluta uagut nunatut inuiattullu ataqqineqarnissarput kissaatigaarput, Pipaluk Lynge oqarpoq.
Atorfilittat akornanni suleqatigiissitaq nunatta, Danmarkip USA-llu atorfilittaanit peqataaffigineqartoq maanna isumaqatigiinnialeruttorpoq. Landryp tikittussanngornera isumaqatigiinniarnermut sunniuteqarnavianngitsoq Lyngep nalilerpaa.
- Naamik, tassami taanna isumaqatiginninniaqataanngilaq. Taamaattumik taakkua suliassatik suliarissavaat, Pipaluk Lynge oqarpoq.
