Pippi Langstrømpip silarsuaa nunani assigiinngitsuni TV-kkut nangeqattaartuliarineqarpoq

Svenskeq meeqqanut atuakkiani inuttaq Pippi Langstrømpi titartakkatut nangeqattaartulianngorluni utissaaq.

Taama tusagassiorfik aliikkusersuinermik sammisaqartoq Variety allappoq.

StudioCanal, Heyday Films Astrid Lingren Aktiebolagilu, Lindgrenip pilersitaanut piginnittuunermik isumaginnittoq suliniuteqartuupput.

TV-kkut nangeqattaartuliaq immikkoortunik 52-nik minutsinik aqqanilinnik sivisussuseqartunik imaqassaaq, suliarineralu ukioq manna oktobarimi aallartissasoq ilimagineqarpoq.

Heyday Films ilaatigut Paddington-imik filmilianik, attuumassuteqanngitsumik ilaqutariinnut filmiliani fanchiseni aningaasanik isaatitsiffiunerpaanik suliaqartuuvoq. Filmit nunarsuaq tamakkerlugu 800 million dollarinit amerlanerusunik billitsinik tunisaqarfiupput.

Variety malillugu TV-kkut nangeqattaartuliami Pippi illoqarfeeqqamut illugiinngitsunik alerseqarluni, gulerodip qalipaataanik nujaqarluni, milattuujulluni aapakaamik tuimminiititaqarluni tikittoq malinnaavigineqassaaq. Tommymullu Annikamullu Pippip silarsuaanut ilaasuni inuuneq uteqqiffissaqarnani allanngussaaq.

Max Hallén, Astrid Lindgren Akitiebolagimi pisortaq Pippi Langstrømpip sunniutaa pillugu oqaluttuarpoq:

- Astrid Lindgrenip oqaluttualiai nunarsuaq tamakkerlugu suli nutaanik atuartartutaajortorput, meeqqanullu kinguaariinnut nutaanut anngullutik.

- Pippi Langstrømpi suli ineriartornermi pingaarutilimmik ilaavoq. Sapiaatsuunera, nammineertuunera naalanngisaarlunilu nunarsuarmik ilungersuatitsinera nunarsuaq tamakkerlugu ukiut 80-t sinnerlugit meeqqanik isumassarsiortortitsivoq, sulilu taamaalluni, Hallén oqarpoq.

Pippi Langstrømpi 1945-mi svenskimit atuakkiortumit Astrid Lindgrenimit pilersinneqarpoq. Kingorna atuakkiai oqaatsinut assigiinngitsorpassuarnut nutserneqarput, niviarsiararlu aappalaartunik nujalik nalinginnaanngitsumik nukittooq nunarsuarmi meeqqanut atuakkiani inuttani ilisimaneqarnerpaat ilaanniilersillugu.

Lindgrenip atuakkiai nunarsuaq tamakkerlu 90 milliuuninit amerlanerusunngorlugit tunineqareerput sulilu ukiut tamaasa 1,5 milliuunit missaat tunineqartarput.

Qaqugu TV-kkut nangeqattaartuliaq saqqummissanersoq, TV-qarfiillu streamerisartullu sorliit nangeqattaartumik aallakaatitsissanersut suli nalunaarutigineqanngilaq.

/ritzau/