Pisiniarfiutileqatigiit Brugseni eqiiallannartunik pisinissamut ukiunik killiliisut

Pisiniarfiutileqatigiiffik Brugseni meeqqat inuusuttullu imeruersaatinik eqiiallannartortalinnit atuinnginnissaat anguniarlugu ataasinngornermi nutaamik iliuuseqalerpoq.

Brugsenini imeruersaatinik eqiiallannartunik koffieninik akulinnik 16 ataallugit ukiullit ataasinngorneq aallarnerfigalugu pisisinnaajunnaassapput.

Brugseni tusagassiuutitigut nalunaarummi ilisimatitsivoq meeqqat inuusuttullu koffeinimik atuinerisa killilersimaarneqarnissaat pillugu peqqinnissakkut ilisimasallit innersuussutaat tunngavigalugit taama aalajangiisoqartoq.

– Fødevarestyrelsenimit meeqqat eqiiallannartunik imernissaat innersuussutigineqanngilaq, koffeini annertuallaartoq ilaatigut eqqissiviilliornermik, sininniarnermik ajornartorsiuteqarnermik, ukkassiniarnermik ajornartorsiuteqarnermik uummatillu tillerulunneranik

kinguneqarsinnaammat. Nunani avannarlerni Europamilu nunani arlalinni misilittakkat aamma takutippaat ukiunut killiliineq meeqqat inuusuttullu eqiiallannartunik pisinissamut periarfissaannik killiliissutaasinnaasoq, Brugseni allappoq.

Allan Kristoffersen, pisortaaneq, aalajangernermut pissutaasoq ima nassuiarpaa:

– Nalunngilarput eqiiallassaatit koffeinimik annertuumik akullit meeqqanut innersuussutigineqanngitsut. Taamaattumik peqqinnarnerusumik atugassaqartitsinermut tapersiiumavugut, inuusuttullu angajoqqaatik ilaginagit pisiniaraangamik ulluinnarni peqqinnarnerulersitsisunik nioqqutissanik pisinissaannut kajumissaarnerorusuppavut. Ukiunut killiliineq kisimiilluni unammillernartoq aaqqinngilaa, meeqqanulli inuusuttunullu peqqinnarnerusumik atugassaqartitsinissamut tigussaasumik tapersiutaavoq, Brugsenimi pisortaaneq Allan Kristoffersen oqarpoq.

Amerlasuut atuarfimmi atualerfissaanni, ukiunut killiliussat ataasinngorneq aallarnerfigalugu atuutilissaaq.