Pizza ilittoortoq majuartarfinnilu ajornartorsiutit

Februari naasoq tallimanngornermi unnulersukkut unnuap qeqqariartortoq illoqarfimmi annerusumik tusarnaartitsinermik aaqqissuussaqanngilaq, qaammallu naagaluartoq qaammatip qiteqqunnerani tallimanngornertut isikkoqarneruvoq. Illoqarfimmi inukippoq biilinillu angallattoqarpiarnani.

Politiit peqatigisassagut biilini issiavinnut saarlernut ingipput, uangalu saamiup tungaani aquttorisatta tunuanut ingissasunga oqarput.

- Anorersuanngilaataa qatsunganersuaq, politeeq oqarpoq.

Politiit unnummi malinnaaffigisatta atitik saqqummiuteqqunngilaat, tamannalu AG-mit kissaataat ataqqillugu, politiit aqqi saqqummiutissanngilagut.

Angerlarsimaffeqanngitsut toqqissisimatitsinngitsut

Biilillu iluanni taartumi nipeqarpianngitsumilu nipi ersarluttoq tutsiuppoq, Qapiarfiusaami inissiarsuit ilaanni inuk sinittoq alakkarneqassasoq ilisimatinneqarput. Naliginnaasumiit sukkalisaarnerulaarlutik piffiup taaneqartup tungaanukarput. Angerlarsimaffeqanngitsuusinnaasoq imaluunniit toqusimasinnaasoq politiip pisunut taamaattunukarnermi sillimaffissat pillugit ilisimatinneqarpunga. 

Sila nillertumik anorlilaarpoq qiianarluni. Tummeqqatigullu majuarnitsinni politiit sissuerlutik majuarput, tarrajulaarmallu siulliup sakissamini qaammartartuni ikillugu.

- Tipi ikuallassunnitsoq naamasinnaaviuk?, politeeq aperivoq.

Quleriimmi arfiniliusut affaannut killikkatta majuartarfiit kissakkiartornerat ilutigalugu tipi ikuallassunnitsumik tipilik anguarput. Qullerpaamut apuukkatta inuk qernertumik kavaajarsualerluni natiinnarmi nalasoq siumorparput.

- Halloo! Iterit, halloo, politiip aappaata seeqqummerluni angut itersarniarsaraa.

Itersagaalu iteqqannilluni panertooqqarpaluttutut nipeqarluni akiorniarsaraa.

- Aah illinuna, qanoq ikiorsinnaavatsigit? Sumukarfissaqarpit? Herbergimukaatissavatsigit?, politiip ilisarsilluni aperaa.

- Naamik sumukarfissaqanngilanga, aalakoorama taakunnarsinnaanngilanga, iseqqunavianngilaannga, angutip inuusuttup 30-t missaani ukioqartup akivaa.

- Sumunnarfissaqaruit biiliussinnaavatsigit, sumukassavit?, politiip apereqqippaa.

Qinngutsinnukaatsinniarlunilu oqalukkaluarluni piffimmiit nammineerluni ingerlavoq.

Ikuallattoqarneranik nalunaarfigineqarneq

Industrivejikkut putorsuup eqqaatigut biilerluta ingerlaartugut, radioaqqakkut politiit nalunaarfigineqarput Nuussuarmi inissiat ilaanni ikuallassunnitsumik tipimik naamasaqartoqartoq. Piffimmullu sumukassanersut politiip aquttuunngitsup oqarasuaatimini marserpaa.

- Tipi pikanngaanneerpoq, arnap qipimmik pooqqalluni qummut tikkuaatigaluni politiit ilitsersuuppai.

Najugaqarfimmi allat najugaqartut arlaqanngitsunnguit aamma aniapput susoqarnera alapernaappaserlugu. Ikuallassunnitsumik tipiliortup nalaanut suli apuutinngitsugut matu ammarpoq. Angullu iteqqaannisutut isikkoqartoq, naatsunnguanik tukattunillu nujalik anillappoq. Matulu ammaraa tipi ilittoorsunneqaluni pujorsuani nassataralugu aniavoq.

- Ikuallattoqarpa? Isersinnaavugut?, politeeq aperivoq.

- Naa, pizzaana iliinnartoq, sinilersimagama pizzaliorlunga, angutip qungujulalluni susoqarnera nassuiaatigaa.

Illup ilua ilittoornerup kingunerisaanik putserpoq tipeqaluni, pizzalu qernertuinnaq qaqinneqarsimalluni iggaviup nerrivianut ilineqarsimavoq.

- Nerissaviuk?, politiip ikasarluni qungujoqaluni angut aperaa.

- Naa, ilimaginngilara, angutip illarluni akivaa.

Annerusumillu pisoqanngimmat biiliniilereersimalluta ingerlaqqippugut.

Baaboo

Nalunaaqutaq aqqanermut qiteqqutereersoq eqqissilluta Qinngorpumiit Nuussuarmut ingerlavugut. Politiit ulluinnarsiutinik oqaluuterujoorput, soraaliivippummi.

- Siulliit suliartorsimalissapput, aappaata qungujuutigaluni paarlatsissatik pillugit oqarpoq.

- Aap, takkutiaartaratta piffissaq sioqqullugu, taamaalillutik siuligut piffissaq eqqorlugu soraarsinnaaniassammata, aappaata aappi ilalerpaa.

Pisorli mumeriataarpoq. Politiit radioatigut nipi erseqqarluttoq, kisianni politiit tusaalluarsinnaasaat, tutsiuppoq.

- Qinngorpumi imminut toqunnissamik siorasaarisoqarpoq, ornigutipallassinnaavisi?, politiit pigaartut qullersaqarfianniit kalerriipput.

Qulliit tungujortut ikinneqarput, kaajallattariarlu suli angunatigu sangupiloorpugut, kinguporsoriarlutalu utimut sukkalluta aallarluta. Siunitsinni biileqarmat nipituumik nipiliortitsivugut, baaboo baaboo, biilillu siuaniittut aqqusernup sinaanut unittarput.

Politeerisattalu oqaloqatigiinnerat sukkatsippoq, nipitunerusumillu oqalulerlutik. Uippallinngillat, sungiussisimarpaloqalutilli ilungersunartumut ornigutilernertik sillimaffigerpasippaat.

- Pisumiit pisumut nalilersuiuaannarpugut. Sapinngisannguarput tamaat inuit artorsartut ikiorniartarpagut, politeeq nassuiaavoq.

Sukkalisaarluta pisumut ornigunnitta akerlianik eqqissilluta – qujarnartumik – illoqarfiup tungaanut biilerluta aallarpugut, politiit imminut toqunnissamut siorasaarisoq ernumananngitsumik qimassinnaaleramikku.

Angerlarsimaffeqanngitsut pillugit sianertoqaqqissimasoq

Unnuap qeqqa qaangeraa politiit pigaartui paarlaammata allat ikiffigaagut. Nipilersuummik tusarnaarput, unnuup ingerlanerani qiimmakkaluttuinnartunik. Eqqissillutillu aqqusinermi angalaarnerat aallartillugu.

Nalunaarfigineqarput inissiarsuarmi suli tassani, majuartarfinnili allami, angutit inuusuttut nipituuliortut najugaqartunut toqqissisimatitsinngitsut alakkartariaqartut.

Siullermik piffik politiit siulliit peqatigalugit orninnikuusaat alakkarpaat, inoqanngilarli. Majuartarfikkullu allakkut majualerpugut, siullermituulli majuartarfitsigut majuarnitsinni qullariartornitsinni silaannalussiartulerpoq, tipi inussunni naamajuminaassiartorluni. Apuuffigisarput tukappoq, pequteqaalulluni, puussiarsuillu qernertut atisanik imaqarpasissut arlaqarlutik inissinneqarsimallutik. Angut qaninnermi inissisimasoq siniffimmi qipeqqalluni nalavoq.

- Marluupput, aana aappaa aamma nalavoq, politiip aappani oqarfigaa.

- Haluu, iterit, suisi tamaani?, politiip aappaata nipini sukatsillugu angut qaninneq itersarpaa, isikkaminik sakkukitsunnguamik toortaatigalugu.

- Sususiuna maani? Sumunnarfissaqarpisi?, politiip aperai.

- Naamik sumunnarfissaqanngilagut. Angallammiuna ilaagaluaratta, ikuallattuuleraluarnikuugatta, umiartorneq nangiarilerlutigu niunikuuvut, angutip qaninnerusup nipikitsumik nassuiaappa.

- Ingerlasariaqarpusi, maani najugaqartunut nipituuliorlusi akornusersuigassi, politiip naalakkeerpasilluni oqarfiga.

- Sumukassaagummi? Qipiit nassaqitigit?, angutip qaninnerusup aappi aperaa.

Qipiit nassatassatik nammakkiuteriarlugit majuartarfiit tungaannukarput ammukalerlutillu. 

AG-miit politiit unnuakkut nalunaaqutaq qulingiluaniit pingasup qeqqata tungaanut malinnaaffigineranni pisunut sisamariarlutik ornigupput, aqqusinermilu biilinik angallattunik 14-inik unitsitsillutik.