Polar Seafoodip pisortaa oqaasissaminut tunuarsimaarneq ajortoq siunnersortinngorpoq

Polar Seafood Denmarkip pisortaanera Henrik Leth Nunatsinni inuussutissarsiornermi siuttuni ukiuni kingullerni sunniuteqarnerpaat ilagaat.

Pisortaaneq nuimasoq sunniuteqarluartorlu isummaminik nangaanngivilluni oqaaseqartartutut ilisimaneqarpoq. Oqaatsinilu kusasssarneq ajorpai. 

Henrik Leth sakkortuunik akerleriissutaasunillu isumaqartarpoq. Isummertarneri soorlu Naalakkersuisunit, Inatsisartunit Royal Greenlandimilluunniit, Polar Seafoodip unammillertiginerpaasaanit aamma aalisakkanik qalerualinnillu tunisassiornermi nunarsuarmi niuerfinni unammillertiginerpaasaanit, nuannarineqartuaannarneq ajorput.

Sermitsiap oqaloqatigisaasa arlallit tamanna oqaatigaat.

Henrik Leth 64-inik ukiulik suliffeqarfimmi milliardikkaanik kaaviiaartitaqartumi Polar Seafood Denmarkimi novembarip aallaqqaataanni pisortaanertut tunuassaaq.  

Polar Seafoodimit oqaatigineqartut naapertorlugit tamanna nammineq aalajangersimavaa. Leth oktobarimi 65-iliissaaq, aamma aalisakkanik suliffissuarni sulisartutut taama ukiulittut sulerulunnikuutiginngilaq. Aamma suli piumassuseqarluarpoq nukissaqarluarlunilu.  

Tunuarsimaarfeqanngitsoq

Henrik Leth Helsingørimeersoq Københavnip Universitetiani aningaasarsiornermik ilinniagaqarsimavoq.

Taamaattumik novembarip aallaqqaataanni Polar Seafood Denmarkimi pisortaanertut tunuassaaq ulluinnarnilu aqutsisutut suliunnaassalluni.

Henrik Leth Polar Seafoodip ingerlataanni aamma Nunatsinni inuussutissarsiornermi ukiorpassuarni malunnaateqarluarpoq. Polar Seafood Denmarkimi pisortaanertut ilaatigut suliffeqarfiup allaffissornikkut qarasaasianillu atortuinik nutarterinermut siuttuusimavoq. 

Nunatsinni suliffeqarfinni pisortaanerit politikikkut pisut pillugit oqaaseqaqquneqaraangamik mianersortarput. 

Henrik Leth taamaanngilaq. Inuussutissarsiornermi pisortaq taanna ilaannikkut mamiatsatsitsisinnaasartoq, nangaanngivilluni takkukkaangami isummani unneqqarilluni isornartorsiuininilu oqaatigisarpai.

Henrik Leth tunuarsimaarnani, erseqqissumik toqqaannartumillu periaaseqarpoq. Tamanna Kalaallit politikeriisa atorfilittallu amerlasuut aalisarnermik inuussutissarsiornermilu siulersuisuni aamma pisortatut ukiuni 30-ni atuuffeqarnerani misigisarsimavaat.

Oqaaseq tunuarsimaarfeqanngitsoq Den Danske Ordbogimi ima nassuiarneqarpoq: Nangagassaanngitsoq, ingasattoq aamma innuttaasut nalinginnaasut ileqquinik assortuisartoq — amerlanertigut ulorianartumik inerteqqutaasumillu taamaalillunilu alutornarluinnartunik isumaqartunik.

Henrik Lethip pissusii allat tassaapput nuannaartuunera, ammasuunera oqaloqatikkuminarneralu. 

Siunnersuisartutut suliassai

Polar Seafood Gruppenimi ukiuni 15-ini kingullerni aqutsisutut qitiusumik inissisimasimavoq. Polar Seafood Denmark peqatigalugu siorna suliffeqarfiullu oqaluttuarisaanerani kaaviiaartitat amerlanerpaartaasa tulliinik, 172 millionit koruuninik sinneqartooruteqarpoq.

Lethilli suliffeqarfissuaq Polar Seafood qimannavianngilaa, tassami Polar Seafood Gruppenimi siunnersortitut sulinini ingerlatiinnassagamiuk, tassa suliffeqarfissuarni marluusuni tassaasuni Polar Seafood Greenland aamma Polar Seafood Denmark.

Siunnersortaanertut siulersuisut qullersaqarfiillu marluusut tapersersorlugillu siunnersortassavai. Suliffittaamini suliffeqarfissuarmi ineriartortitsinissanut aamma politikikkut suliniutinut ilaatigut suliaqartassaaq.

Suliffissuaq ingerlanerliortoq 

Henrik Lethip suliassaasa ilagaat Polar Seafood Denmarkip Esbjergimi aalisakkanik suliffissuata Hjerting Laks-ip ineriartortinnissaa. Suliffeqarfik kanngunartuliorfigineqarsimasoq pineqarpoq, taanna 2025-mi akileraarutit ilanngaatigereerlugit 25 millionit koruuninik amigartooruteqarpoq. Kapisilinnik tunisassiorfik ukiup ingerlanerani tappiorannartumik napparsimalissutaasinnaasumik listeriamik nassaartoqarneranit eqqugaavoq. Pujoorivik ajunaarutaavoq, Henrik Leth Qallunaat tusagassiorfiannut Fødevarewatchimut oqarpoq.

Inuussutissalerinermut Aqutsisoqarfiup nerisassanik kanngunartuliortoqarnerata kingorna sukannersumik nakkutilliiunnaarnerata kingorna tunisassiorfik maanna ingerlalluaqqilerpoq.

Kingoraartaasussaq: - Henrik inunnik assigiinngisitsineq ajorpoq 

Kinguaariit nikinnerannut atatillugu Polar Seafood Denmarkimi ingerlatsinermut pisortaq, Lethip suleqataa Islandimiu Jonas Engilbertsson pisortaanertut atorfeqalissaaq. 

- Henrik isummaminik oqaatiginnittarami. Angutaavoq oqaaseqaraangami sakkortuunik akerleriissutaasinnaasunillu isummertartoq, aamma eqqortumik iliortarpoq pissuserissuullunilu.

- Henriup Naalakkersuisut siulittaasuat ministeriunerlu aalisakkerivimmi sulisartututulli oqaloqatigilluarsinnaatigivai. Qujanarniarneq ajorpoq, inunnillu immikkoortitsisarani, Jonas Engilbertsson oqarpoq.

Aviisiliortup allaaserisamik matuminnga allaaserinnittup Henrik Leth ukiuni 30-nit amerlanerusuni Nunatsinni inuussutissarsiornermi siulersuisunilu qaffasissumik akisussaaffeqartarsimanera malinnaaffigisarsimavai.  

Inuussutissarsiornermi pisortap assortuussutaasartup taassuma tusagassiuutitigut assersuutigalugu politikerit, tassa Naalakkersuisut, Inatsisartut Namminersorlutillu Oqartussat isornartorsioraangamigit mianersuutinngisaannarpai.  Aamma maanna taamaaliorpoq. 

Oqaaqqissaarineq

Suliffeqarfimmi pisortaanertut tunuanngitsiarnermini Nunatsinni Naalakkersuisut Inatsisartullu oqaaqqissaarpai.

- Pisortat aningaasaqarnerisa ilarujussuat politikerinit aqunneqaranilu ingerlanneqanngimmat ajornartorsiutaavoq, tamakkunanimi aqutsisut tassaammata Namminersorlutik Oqartussat suliffeqarfiutaanni siulersuisut.  

- Namminersorlutik Oqartussat suliffeqarfiutaat soorlu Royal Greenland, KNI, Royal Arctic Line aamma Tusass Kalaallit Nunaata aningaasaqarneranut sunniuteqartorujussuupput. Suliffeqarfiit pisortanit pigineqartut Kalaallit Nunaata aningaasaqarnerata ilarujussuanik aqutsisarput. Tamannalu politikikkut nakkutigineqarneq ajorpoq.

- Ingerlatseqatigiiffiit politikikkut suliassanik assigiinngitsorpassuarnik suliakkerneqartarunarput, kisianni qanoq akeqarnersut kikkullu taakkuninnga suliaqartitsisimanersut, kikkulluunniit naluaat, Henrik Leth oqarpoq.  

 Tamanna annerusumik nassuiarsinnaaviuk?

- Namminersorlutik Oqartussat suliffeqarfiutaanni aningaasaqarnerup ammasumik ingerlanneqarnera ajornartorsiutaasoq, isumaqarpunga. Kalaallit Nunaanni suliffeqarfiit annersaat Royal Greenland immikkut pikkorissutut isigineqarpoq, Kalaallit Nunaanni politikerinit aamma Namminersorlutik Oqartussanit oqaatigineqartut naapertorlugit inuiaqatigiinnut suliassarpassuaqarami, Henrik Leth isumaqarpoq.

Royal Greenland assersuutigalugu soorlu Polar Seafood Greenlandimit, Nunatsinni suliffeqarfiit namminersortut annersaannit, pisassiissutinik Naalakkersuisunit ajornannginnerusumik pissarsisarpa?

- Aap, taamaappoq. Ukiut kingulliit qulit ingerlaneranni Royal Greenlandimut qaleralittassiissutit saarullittassiissutillu Polar Seafood Greenlandimut sanilliullugit marloriaammik amerleriarsimapput. Ingerlatseqatigiiffiit taakku marluk 2014-imi aalisakkanik naqqarmiunik amerlaqatigiinnik pisassinneqartarput.  

 Taamaattumik isumaqarpit Naalakkersuisut Royal Greenland salliutittaraat?

- Naalakkersuisut nikerartut suliffeqarfik pisortanit pigineqartoq Polar Seafoodimit suliffeqarfimmit namminersortumit pingaarnerutittarpaat. Royal Greenland immikkut pisassiissutinik ukioq manna siullermeerluni pissarsinngitsoorpoq, oqarpoq.

Henrik Lethip taama oqaaseqarnermini innersuussutigaa, Naalakkersuisut ingerlatseqatigiiffimmut nutaamut Qeqertalik Seafoodimut Kitaani qaleralittassanik 2.468 tonsinik Tunumilu saarullittassiissutinik 5.000 tonsinik ukiumut pisassiisimanerat. Pisassiissutit taakku ingerlatseqatigiiffiup piffissami 2026-2036-mi pisassarai.

Taamaalilluni Polar Seafoodip Aasianni aalisakkanik suliffissuata matuneqariaannaasup ukioq kaajallallugu ammasinnaanissaa qulakkeerneqarpoq. Tassami Qeqertalik Seafoodimut ukiut qulit sinnerlugit pisassiissutigineqartut milliardikkaanik naleqarput.

Polar Seafood Greenlandimik piginnittut Miki Brønsip, Bent Sallingip aamma Laila Sallingip saniatigut inuit allat arlallit, aamma soraarnerussutisiaqalernissamut aningaasaateqarfik SISA Pension kilisaatinillu ingerlatseqatigiiffiit pingasut Qeqertalik Seafoodimik piginneqataapput.

Qeqertalik Seafood aamma ingerlatseqatigiiffik Royal Greenlandip ilaannakuusumik pigisaa kisimik Naalakkersuisut neqeroorutigisaata aappassaannik suliariumannittussarsiuussineranni neqerooruteqarsimapput, siulliullu pisassiissutit naleqarluartut pissarsiarai. 

Henriup Verallu ilaqutarpassuatik ilaqutariittut angalaqatigisaraat

Henrik Lethip nuliaraa inatsisileritooq ukiorpassuarnilu Inatsisartuni ombudsmandiusimasoq, Vera Leth. Københavnip Universitetiani ilinniartuutillutik taakku naapipput, 20-t sinnilaarlugit ukioqarlutik.

Aappariit meeraqanngitsut nunarsuaq tamakkerlugu angalaneq nuannarisarpaat ukiunilu arlalinni Kangianut angalasarlutik.

Ilaqutaminnut ikinngutiminnullu tukkortupilussuupput, ingammik ilaquttatik qaaqqullugit akiliullugit angalaqatigisarpaat.

- Qatanngutivut, Verap uangalu soralussavut, taakkua aapparisaat meeraallu nukatsillugit ilagisarpavut. Ukiut ingerlaneranni tamakkerlugit angalaqatigisarpavut.

- Vietnamimiinnikuuvugut allaniittarlutalu. Oktobarimi Cyperniliassaagut. Angalanissatsinni tassani 27-ussaagut. Ilaquttatta peqatigaluta misigisaqartinnissaat, Veramut uannullu pingaaruteqarami.

- Aningaasaatitta sinneri ilaquttatta angalaqatiginerinut atorusukkatsigik.

Kingornussisussat aningaasanik naalagaaffimmut akitsuutinik tunniussinissaannut taarsiullugu, Henrik Leth oqarpoq.