Politiit ajoqusersimasut ikiorserneqartarnissaat isumaqatigiissutigineqartoq
Air Greenlandip aamma peqatigiiffiup Thin Blue Linep suleqatigiissusiornerisigut politiit, ilaqutaasut sulisullu ajoqusersimasut nunami angalasinnaalerput.
Air Greenlandip aamma Thin Blue Linep politiit, sulinerminni inuttut annertuumik pilliuteqarsimasut, tapersersorpaat.
Tusagassiorfinut nalunaarummi assitaliussaq.
Air Greenland aamma Thin Blue Line Denmark politiinut sulinerminni kingunerluuteqartut iluaqutissaannik suleqatigiilerput.
Suleqatigiinneq 2026-p atuuteqqaarallassaaq, piffissamilu tassani Thin Blue Linep ikiurniarneranut sulineranullu Air Greenland bilitsinik ikiuuttassalluni.
Thin Blue Line Denmark peqatigiiffiuvoq Danmarkimi, Kalaallit Nunaanni Savalimmiunilu politiiusimasut maannakkullu politiiusut timikkut tarnikkullu ajoqusersimasut ilaqutaallu tapersersornissaat pingaarnertut siunertaralugu suliniuteqartut.
- Kalaallit Nunaanni politiit, reservebetjentit kommunefogedillu ajoqusersimasut timikkut tarnikkullu ikiorneqarsinnaanerat ungasissinnaasarpoq. Isumaqatigiissutip uumap kingunerisaanik pisariaqartitsisunut qaninnerulerpugut, qulakkeerlugulu sulitillutik ajoqusersimasut kisimiinnginnissaat, Thin Blue Line Denmarkimi pisortaaneq Stinne Ølshøj oqarpoq.
Suliffik imaannaanngitsoq
Kalaallit Nunaanni politiit quliugaangata ataaseq PTSD-mik atugaqartartoq misissuinerit takutippaat, politiillu sisamararterutaat sulinerminni nanertuuteqarnertik pissutigalugu sulisinnaarallarnikuupput. Suleqatigiit tusagassiutitigut nalunaarummi allapput.
Taamaattumik Thin Blue Line Denmark Kalaallit Nunaanni suliniutinik arlalinnik aallartitsivoq, nunamili sumiiffiit avinngarusimammata aningaasatigullu periarfissat killeqarnerat pissutigalugit annertuumik angusaqarnissaq ajornakusoorsinnaavoq. Ajornartorsiullu taanna suleqatigiilernisskkut aaqqivigineqarniarluni.
- Thin Blue Linep suliaqarnera immikkorluinnaq ippoq, inunnut ullut tamaasa toqqissisimanissatsinnik suliaqartunut ikiuisartuugamik. Air Greenlandimit suleqatigiinneq aqqutigalugu iliuuseqarnerup nunami maani sumiiffinni annertuninngorsinnaanera ajornarunnaarsinneqarpoq, oqarpoq Air Greenlandimi piujuartitsinermik attaveqaqatigiinnermilu pisortaq Inga Dóra G. Markussen oqarpoq.
Thin Blue Line Denmarkimit parnaarussivinni sulisut ajoqusersimasut sulinerminni kingunerluutaasinnaasunik nalaataqarsimasut suliami ilaatilernissaat pilersaarutaavortaaq.
