Politiit saassussinermik takunnissimasinnaasunik ujartuisut

Sisimiuni pingasunngornermi unnukkut nakuuserluni saassusisoqarnera takuiuk, imaluunniit pisumut atatillugu ilisimasaqarpit? Taava Kalaallit Nunaanni politiit tusarfigiumavaatsit.

Angut 26-nik ukiulik Christian 28-ip Aqq. 12-ip silataani inuppassuarnit saassunneqarsimavoq. Politiit pingasunngornermi unnukkut nalunaaqutaq 23.48 nalunaarut tiguaat.

– Pineqartut tassaapput angutit arfineq-marluk tikillugit amerlassusillit majuartarfikkut umiarsualiviup tungaanut qimagussimasut. Taakkua taartunik atisaqarput. Taakkua ilaat orangemik kavaajaqarpoq, Kalaallit Nunaanni Politiit allapput.

Takunnissimasinnaasut allallu paasissutissaateqartut Sisimiuni politiinut saaffiginneqqullugit kajumissaarneqarput. Oqarasuaat 70 12 22 sianerfigalugu imaluunniit politeeqarfimmut ornigulluni saaffiginnittoqarsinnaavoq.