Politikeri Dubaimiit aallarnaveertoq: Sorsuffimmiit allamut sorsuffimmut
Ane Lone Baggerip Siumumeersup Kangiani qiterlermiit angerlarluni qineqqusaarsinnaanini nuannaarutigaa. Inuujuk Petersernip Demokraatineersup qineqqusaarneq sukkaannaq ingerlavoq.
Ane Lone Bagger Nuummi illorsuarmut timersortarfimmut marlunngornermi ullaap tungaani ingerlaartoq.
Assi: Oscar Scott Carl
Politikerit partiinit assigiinngitsuneersut Sermitsiamiit marlunngornermi naapippavut, taakku ileqquusoq malillugu Nuummi illorsuarmut Timersortarfimmi qinersiviusumi aqquserngup sinaani naapitassaapput.
Taakkua Siumut tunuliaqutaralugu qinigassanngortittoq Ane Lone Bagger ilagaat, taassumalu qineqqusaarnera pissanganarluinnartumik aallartippoq. Taannami Israelip USA-llu Iranimut sorsunnerat pissutigalugu Dubaimiit aallarnaveeraluarpoq.
Qineqqusaarsimanerit kingumut qiviassagukku qanoq oqaasertalersinnaaviuk?
- Pikkunaalunnikuuvoq, nunat avataninngaanneersut isaat aattaat taama immaqa annertutigimmata ukiormanna allaanerulaarpasittorujuuvoq. Taavalu aalajangiisooqqissinnaagunaratta kikkut qallunaat nunaanni naalakkersuisunngortitsinissamik oqimaalutaasinnaalluta, annertunerpaamillu kalaallit nunaat pissarsitinnissaa pingaaruteqarmat.
Qineqqusaarneq aallarnermat nunani kiattorsuarniipputit, massakkullu maani qinersinerup ulluani najuullutit, qanoq misigisimavit?
- Qinersinissaq ministeriunerup suaarutigimmagu Dubaimiippunga, taavalu kingunitsianngua sorsunneq aallartimmat anineq ajulerlunga. Sapaatip-akunnersua takanani ernumanikuuvunga. Qinersinissamullu iluamik piareersarnanga. Kisianni qujanartumik ajornata apissippugut, Ane Lone Bagger oqarpoq, nangipporlu:
- Allamik oqarfiunngilaq sorsuffimmiit allamut sorsuffimmut, taamatulluunniit oqarusunnangajappoq. Tassalimi ilungersornikuunermut aamma tikinniutaa. Taava ullup sinnera maani sarsakataassaagut, neriulluta amerlanerpaat qinersisartussasut, qinersiartortartut ikittaramik folketinngimut qinersinermi. Tunuliaqutsertariaqarparput nunatsinninngaanniit tamakkiisumik amerlasoorsuit taasiartornerisigut.
Ullumikkut ulloq qanoq atussamaarpiuk?
- Tassa eqqisseqqinnaarlunga maani aloortaqattaarluta oqaluuttaqattaarlugit, nalornisut nalorniunnaartinniarlugit suli, piffissaq kingullerpaamut allaat sorsussaagut.
Siullerpaamik qinigassanngortittoq: Qineqqusaarneq sukkasuumik ingerlavoq
Qinersiup aqqutaani naapitassaq alla tassaavoq Demokraatineersoq Inuujuk Petersen, taanna siullermeerluni qineqqusaarpoq.
Qineqqusaarsimanerit kingumut qiviassagukku qanoq oqaasertalersinnaaviuk?
- Qineqqusaarsimanera sukkasoorujussuartut ingerlasutut misigaara, angalasaqattaarlunga oqaluussassarpassuit qineqqusaarnerillu, tamakku eqqarsaatigalugit sukkasoorujussuarmik uanga misigivara. Nutaajulluni pissanganarnermik, suna tamaat pissanganaannavittoq. Nukissaqarnarluni ajunngitsumik ingerlarusuinnaavilluni, nukissaqarlunga tamaviaarnikuuvunga.
Inuujuk Petersen Demokraatineersoq.
Assi: Oscar Scott Carl
Qineqqusaaqqaarlutit sassaqqaaravit qanoq eqqaamasaqarfigiviuk?
- Suna tamarmi nutaajusoq, kisianni aamma eqqarsarpunga aamma misilitassaasoq, kisianni qangalili politikkimut soqutigisaqarama, kisianni takorloortarsimanagu sassarnissaq. Taava suaarutigineqariasaarpoq, piareersarfikinnikuuvunga, kisianni aamma misigalunga piareersarujussuarnissara pisariaqartippallaarnagu.
Ullumikkut ulloq qanoq atussamaarpiuk?
- Una ulloq qilanaarinikuuara, kiisami nalleqaaq. Inuit oqaluuterujuullattaassavakka naapitakka, ulapinnikuunermut qineqqusaarnerup ingerlanerani, ullumikkut ulloq atorluarniarpara inuit oqaloqatigalugillu, aamma taanna nuannarisarigakku.
