Politikerip immap naqqani aatsitassarsiorneq inerteqqutaalersikkumagaa
Kalaallit Nunaata imartaata naqqani aatsitassarsiornissap pinngitsoortinnissaanut maanna inatsiseqanngilaq, peqartariaqarporlu. Inatsisartuni ilaasortaq Pipaluk Lynge (IA) taama isumaqarpoq, taassumalu Naalakkersuisut inerteqquteqalernissamik inatsisiliornissaannik peqquneqarnissaat pillugu aalajangiiffigisassatut siunnersuusiorpoq. Siunnersuut Intasisartuni pingasunngorpat oqaluuserineqassaaq.
Pipaluk Lyngep kalaallit imartaanni itisoorsuarmi aatsitassarsiornissaq inerteqqutaalernissaa kissaatigaa.
Foto: Oscar Scott Carl
Saffiugassat soorlu koboltip, kanngussaap, nikkelip immallu naqqani pinngoqqaatit qaqutigoortut nunani tamalaani niuernikkut politikkikkullu soqutigineqaraluttuinnarnerat Sermitsiamit siornatigut allaaserineqarnikuuvoq.
Norgep nammineq Kalaallit Nunaatalu akornanni immap naqqani misissuinissaq 2024-mi ammarmaguli immap naqqani aatsitassarsiorneq ukkatarineqalerpoq. Suliniulli kingorna unitsikkallarneqarpoq.
Pipaluk Lynge siunnersuummini ima tunngavilersuivoq:
Naak norskit imartatsinni aatsitassarsionissaraluartik kigaallatsikkunaraluaraat, pisussaaffeqartariaqannginnerpugut, nunatta imartaanni aatsitassarsiorneq akuerinerlugu, eqqissisimatinniarnerluguluunniit isummersorfigissallugu.
Assigiinngitsunik isummerfiusoq
Siunnersuut partiit akornini assigiinngitsunik isummerfiuvoq. Partiip naalakkersuisooqataasup Demokraatit inerteqquteqartinnani immap naqqani aatsitassarsiornermi kingunerusinnaasut sukumiisumik attuumassuteqanngitsumillu misissorneqartarnissaannik Naalakkersuisut isumaginnittassasut allannguutissatut ilaatigut siunnersuutigaat.
Kalaallit Nunaat ineriartortariaqartoq Demokraatit allapput:
Nunarput ineriartortitsinissamik pisariaqartitsivoq. Inuunerissaarnissaq, peqqinneq, ilinniartitaaneq aammalu toqqissisimaneq siunissami qulakkiissagutsigu isertitat suliffissallu aammalu aningaasaqarnermut
toqqammaviusoq patajaannerusoq pisariaqartippagut. Aatsitassarsiorneq ineriartortitsinermut tassunga
akuusinnaavoq. Pinngortitarsuarli, imartarput imaluunniit inuussutissarsiutitta pingaarnersaannik
innarliinissaq akigineqassanngillat. Taamaattumik oqimaaqatigiisitsineq pingaartuuvoq.
Naalakkersuisut isumaqataasut
Naalakkersuisut Lyngemut isumaqatiginnillutik nalunaaruteqarput:
- Naalakkersuisut nunatsinni aatsitassarsiorfinnik ingerlatsisoqarnissaa kissaatigaat, kisianni tamanna isumannaatsumik pissaaq. Taamaattumik Naalakkersuisut isumaqarput, imaani pitsaanerpaamik isumannaarisunik, avatangiisinik sapinngisamik inatsiseqartariaqartoq, Naalakkersuisut akissuteqaataanni siunnersuummut akuersinissamik innersuussisumi taama allassimavoq.
Akissuteqaat Aatsitassanut Naalakkersuisuusimasup Naaja H. Nathanielsenip (IA) nalunaarutaanut assinguvoq, taassumalu qinigaaffimmi matumani immap naqqani aatsitassarsiornerup inerteqqutaalernissaa pillugu siunnersuuteqarnissani naatsorsuutigalugu 2025-mi decembarimi nalunaaruteqarpoq:
- Imaani aatsitassarsiorsinnaanerit tamakkiisumik inerteqqutaalissappat ajornartorsiutaassaaq, tamannami aamma sermip aanneraneersut sioqqat qajuusaasat, sioqqanillu qalluinermut sunniuteqarnerlussinnaammat. Kisianni imaani itisuumi aatsitassarsiornerup akuerineqaannarnissaanut tunngavissaqanngitsutut isigaara, Naaja H. Nathanielsen taamanikkut oqarpoq.
Pipaluk Lyngep siunnersuutaa pilersaarutit malillugit upernaakkut ataatsimiinnermi kingusinnerusukkut aappassaaneerneqassaaq. Siunnersuut maannakkorpiaq aappassaaneerneqartinnagu ataatsimiititaliami suliarineqaqqaassangatinneqarpoq.
