Politikerit nuimasut USA-mik isumaqatigiissummut oqaaseqartut: – Kalaallit Nunaat sinnerlugu nuannaarpunga

USA-p præsidentiata Donald Trumpip tallimanngornermi unnukkaa SoMemini Truth Socialimi USA-p Danmarkimik Kalaallit Nunaannillu isumaqatigiissuteqarsimanera nalunaarutigaa.

Isumaqatigiissut ‘USA-p Kalaallit Nunaanni isumannaallisaanermik pisariaqartitanillu allanik tamanik ataavartumik nakkutilliilersikkaa, tamannalu Amerikamiorpassuusugut aarleqqutitsinnik tamanik iliuuseqarfiginnittoq’, Donald Trump allappoq.

Trumpi malillugu isumaqatigiissut USA-mut aningaasartuuteqarfiussanngilaq. USA-p akeraasa arlaannaalluunniit Kalaallit Nunaanni sakkutooqarfimmik sakkutuunilluunniit najuutsitsinermik pilersitsinngisaannarluniluunniit, USA erseqqilluinnartumik allakkatigut akuersiteqqaarnagu mianernartunik aningaasaliinavianngitsoq, ilanngullugu allappoq.

– Ukiut 100-t sinnerlugit præsidentit Kalaallit Nunaata isumannaallisaanikkut pingaarutaa ilisimaaraat, ARLAANNAATALUUNNIILLI tamanna iliuuseqarfigisinnaasimanngilaa. Præsidentitut ataavartumik inaarutaasumillu suliap pingaaruteqartupiluussup taassuma naammassillugu suliarinera tulluusimaarutigaara, Trump Truth Socialimi allappoq.

Trump malillugu USA-p Kalaallit Nunaanni piffinni naleqquttuni sakkutooqarnikkut annertuumik najuunnissamik pilersitsinermik suliaqarnini aallartissavaa.

– Ineriartorneq sanarfinerlu pillugit Kalaallit Nunaanni innuttaasunik suleqatiginnikkumavugut. Aaqqissut manna Aaqqissut manna Amerikami Naalagaaffinnut Ataatsimoortunut, Danmarkimut, Kalaallit Nunaannut iligisatsinnullu tamanut pitsaalluinnartuuvoq. Danmarkimi Kalaallit Nunaannilu inutsialassuit nunarujussuup isumannaallisaanermi pingaaruteqarluinnartup siunissaa pitsaalluinnartoq pillugu suleqatigissavagut, Donald Trump Truth Socialimi allappoq.

Donald Trumpip piffissap præsidentiuffimmi aappaani USA-p Kalaallit Nunaannik piginninnissamik nakkutilliinissamillu pisariaqartitsinera pillugu arlaleriarluni oqaaseqartarnermini Kalaallit Nunaannik Danmarkimillu ilungersunartorsiortitsisarpoq. Naalakkersuisut arlaleriarlutik Kalaallit Nunaata USA-mut ilanngunnissamik kissaateqarnera itigartittarpaat.

Kalaallit innuttaasut nammineerlutik aalajangiisinnaassusaat akueraa

Naalakkersuisut siulittaasuata Jens-Frederik Nielsenip (D) ministeriunerlu Mette Frederiksenip ataatsimut tusagassiuutinut nalunaarutiminni isumaqatigiissut oqaaseqarfigaa. Facebookimi quppernermi oqaaseqarnerminni Kalaallit Nunaat sinnerlugu isumaqatigiissummik nuannaarutiginninnini itisilerpaa:

– Kalaallit Nunaat sinnerlugu nuannaarpunga, isumaqatigiissullu naammasseqqajarparput. Isumaqatigiissut tamatta isumannaatsuunitsinnut iluaqutsiiginnanngilaq, nunatsinnilu maani ineriartortuarnissamut aamma iluaqutsiivoq, Jens-Frederik Nielsen allappoq.

Jens-Frederik Nielseni malillugu isumaqatigiissummi Kunngeqarfiup oqartussaaffia ataqqivaa:

– Isumaqatigiissutip Kunngeqarfiup oqartussaanera nunatatigullu innarligassaannginnera inuiallu kalaallit namminneerlutik aalajangiisinnaassuseqarnerat akueraa, taanna allappoq.

Múte: Illuatungeriinnut tamanut pitsaasoq  

Nunanut allanut Naalakkersuisoq Múte B. Egede (IA) tassunga assingusumik aamma Facebookikkut oqariartuuteqarpoq. Taassuma isumaqatigiissut aaqqiissutitut taavaa:

– Kalaallit Nunaata, Danmarkip USA-llu akornanni isumaqatigiissutip naammassigaluttuarnera tikipparput. Isumaqatigiissut Kalaallit Nunaata inissisimaneranik nammineerlunilu aalajangiisinnaassuseqarneranik akuerinnittoq. Nunatta pingasut suleqatigiinnerannik nukittorsaasoq. Illuatungeriinnut tamanik pitsaasumik aaqqiisoq – taamatullu aamma USA-p, Kalaallit Nunaata kitaanilu iligiinnik tamanik isumannaatsuunermik nukittorsaasoq.

Naalakkersuisut pingasut Naalagaaffiit Peqatigiit sapaatip akunnerani tullermi Ataatsimeersuarnerannut atatillugu isumaqatigiissut atsiussagaat naatsorsuutigineqartoq, Naalakkersuit ilisimatitsipput. Isumaqatigiissut atsiorneqareeruni atulersinnissaa pillugu inatsisartutigut pisariaqartumik suliarineqassasoq, Naalakkersuisut nalunaarput.