Poorskimi angallattoqaleruttortoq Tasiilami helikopteri teknikkikkut ajutoortoq
Tasiilamit angalaniartut ulluni makkunani naammagittartariaqarput. Helikopteri teknikkikkut ajoquteqarpoq, tamatuma saniatigut silapiluttaqattaarnera angallannermut akimmisaartitsisoq Air Greenlandimit oqaatigaat.
Helikopteri Tasiilamiit Kulusumut ilaasunik angallassiinnartanngilaq, nunaqarfinnulli allanut aamma atorneqartarluni.
Assiliisoq: Oscar Scott Carl
Tunumi piffissap imaalinerani silarloqattaarnerani angallannerup kipusoortarnera nutaajunngilaq. Taakkuali saniatigut helikopteri Tasiilamit mittarfeqarfimmut Kulusumut nunaqarfinnullu allanut angallassissutaasartoq teknikkikkut ajoquteqarpoq.
Tamatuma kinguneranik Tasiilamit Tasiilamullu angalaniat kinguaattooqqapput. Arfininngormammi angalanissaraluit silarlunnera peqqutigalugu taamaatiinnarneqarput, helikopterilu teknikkikkut ajoquteqartoq ippassaq paasineqarmat angallanniarneq ilungersunartumik inisseqqavoq.
- Soorunami ajuusaarnarpoq, Air Greenlandimi piujuartitsinermut attaveqaqatigiinnermullu pisortaq Inga Dóra G. Markussen oqarpoq.
Ippassaq Kulusummut timmisartuussinermi helikopterip kingoraartissaanik kiisalu nassiussanik Nuummiit Kulusumukaassisoqarpoq.
Helikopteriutillillu namminersortut GreenlandCopterimeersut kingoraartissaq
Tasiilamut ippassaq apuuppaat.
- Massakkut helikopteri passuppaat, kisianni aamma misilittarneqaqqaartussaavoq. Silarlullunilu. Aqagu silaqqissippat aatsaat misilittarneqartussaavoq, taamaammat naluarput piareeqqanersoq. Piareernersoq aqagu paasissagunarparput.
Tasiilami mittarfeqanngimmat kitaanukarniat allanulluunniit angalaniat Kulusumi mittarfik aqqusaaqqaartarpaat.
Assiliisoq: Oscar Scott Carl
Timersoriat Tasiilamut Kulusumut ikaartut
Timmisartoq Nuummiit ippassaq Kulusuliaassimmat angalaniartut ilaat namminneerlutik Tasiilamiit Kulusuliarput. Taakkua ilaat poorskikkunni timersorluni unammiuaarnermi kitaani pisussani peqataassagamik angumersiniarlutik Kulusuliarnissartik nammineq isumagisariaqarsimavaat.
Periarfissaqarsimanngila angallassisunik allanik atuinissarsi?
- Ukiuni siuliini GreenlandCopteri suleqatigisarparput, backuperalugit (pisariaqarfiini atorlugit aaqq.) uagut helikoptererput teknikkersimatillugu. Aamma eqqaamassavarput isumannaallisaaneq taanna pingaarutilerujussuuvoq.
- Attartuinermili
sillimaniarneq peqqutaalluni piumasaqaataavoq attartukkatta piumasaqaatitsinnut
naapertuunnersut misissorneqarnissaa akuerineqarnissaallu, GreenlandCopterikkut
helikopterii misissorneqareerput maannalu missiuinerup inerneri utaqqivagut, Inga
Dóra G. Markussen oqarpoq.
Tasiilamiit angalaniartut ilaat imaatigut Kulusuliarsimammata imaatigut aqqut qanoq innersoq, aamma angallatinik inunnik angallassinissamut akuersissutilinnik peqarnersoq misissuereerlutik, angallassisussamik maannakkorpiaq attartornissaq ajornartoq Inga Dóra G. Markussenip ilanngullugu ilisimatitsissutigaa. Aamma apingaatsiarnerata kingorna imaatigut, angallaviullu ilaa snescooterinik angallassinissaq ajornarsisimasoq ilanngullugu ilisimatitsivoq, imalu naggasiilluni.
- Angalanermut pilersaarutit suut naammassisinnaanerlugit ilisimaleriarutsigu, angalasussanut piaartumik ilisimatitsiumaarpugut.
