Portørit sulinerminnik unititsigallalersut

Nuummi portørit sulinerminnik suliaminnillu juunip 26-anni, minutsini 59-ini, ullaakkut quliniit aqqarnup tungaanut, unititsigallartussanngorput. Nunatsinni portørit peqatigiiffianni siulittaasoq, Ludvig Larsen Sermitsiamut taama oqarpoq.

Portørit sulinerminni atugaat aningaasarsiaallu pillugit Sulinermik Inuussutissarsiuteqartut Kattuffiat, SIK, Namminersorlutik Oqartussanut isumaqatigiinniarpoq. Isumaqatigiissut apriilip aallaqqaataani atuukkunnaartoq suli nutarterneqanngilaq. Tamannalu utaqqikatanneqarpoq.

- Nioqqutissat akiligassallu akitsoraluttuinnartut aningaasarsiagut malinnaatinneqanngillat. Taanna pissutigalugu isumaqatigiinniartunut tapersersuiniarlutik portørit taama iliuuseqalerput, siulittaasoq oqarpoq.

Minutsini tallimani isumaqatigiinniarneq

Illuatungeriit, tassa SIK aamma Namminersorlutik Oqartussat, portørit atugaat pillugit isumaqatigiinniarlutik kingullermik naapikkamik sivisunaarsimanngikkaat siulittaasoq oqarpoq. 

- SIK-p immikkoortortaqarfianit paasisagut naapertorlugit isumaqatigiinniartut kingullermik minutsini tallimani naapissimapput. Tassa imminnut taama ungasitsigerpalupput. Taamaattumik alloriaqqittoqartariaqalerpoq, sulisut aningaasarsiaat qaffaatissaannik utaqqikatapput, Ludvig Larsen oqarpoq.

Isumaqatigiissut apriilimi atuukkunnaartoq isumaqatigiinniutaammat, 2022-imi, portørit sulinerminnik aamma unititsipput. 

- Kingullermik isumaqatigiinniarnermi ukiunut sisamanut aningaasarsiat qaffaataat 8 procenti anguneqarpoq, siulittaasoq oqarpoq.

Taakkuli tamarmik naammakkunnaareersutut taassuma nalilerpai.

- Taamanikkut qaffaataasut 2022-ip kingorna pisiassat akiligassallu qaffannerinut sanilliullugit isumaarukkamik. Aningaasarsiagut pisissutaasinnaajunnaarput. Pisissutigineqaqqissinnaalernissaat erinitsaapparput.

Maannalu isumaqatigiissutissamut kingullermik angusap assinganik minnerpaamik angusaqartoqarnissaa kissaatigaat.

- Minnerpaamik 8 procenti ukiunut sisamanut angusinnaappassuk taanna inooqataaffigisinnaavarput.

Pinartut unitsinngikkaat

Sulinerup unitsikkallarneqarnerani suliarineqartariaqavissunik suliassaqalerpat taakkua suliarineqassapput.

- Suliassat naliginnaasut unitsikkallassuagut. Illup iluani qinnguartaaviliartussat, pilattaaviliartussat imaluunniit illoqarfimmit aasassat, kiisalu tikittut aallartussallu tamarmik sullikkallarunnaassuagut. Pinartut minillugit.

- Tassa imaappoq assersuutigalugu uummammik unittoortoqassagaluarpat noqartoqassagaluarpalluunniit taakkua pinartuummata aassuagut, Ludvig Larsen oqarpoq.

Nuummi portørit 22-iupput paarlattaasartut ilanngullugit 30-it missaanniillutik.